دارحان قىدىرالى: ەل گازەتىنىڭ 100 جىلدىعىن الاش قايراتكەرلەرىنىڭ مەرەيتويلارىمەن ۇشتاستىرىپ وتىرمىز
جيىنعا ەل گازەتىندە ەڭبەك ەتكەن ارداگەرلەر - ەلگە بەلگىلى قالامگەرلەر مەن تاريحشىلار قاتىسۋدا. كونفەرەنتسيادا ءسوز باستاعان «ەگەمەن قازاقستان» گازەتىنىڭ باسقارما ءتوراعاسى دارحان ءقىدىرالى بۇگىنگى شارا توي تويلاۋ ءۇشىن ەمەس، وي ويلاۋ ءۇشىن، تاعىلىم مەن تاعزىمعا تولى سيپاتتا ۇيىمداستىرىلىپ وتىرعانىن اتاپ ءوتتى.
«نەگىزىنەن ءبىز «Egemen Qazaqstan» گازەتىنىڭ 100 جىلدىعىن ەل گازەتىندە ەڭبەك ەتكەن الاش قايراتكەرلەرىنىڭ مەرەيتويلارىمەن ۇشتاستىرىپ وتىرمىز. قاراعاندىداعى Egemen-نىڭ كەزدەسۋىن ساكەن سەيفۋلليننىڭ 125 جىلدىعىمەن ۇشتاستىردىق. قوستانايدا بەيىمبەت ءمايليننىڭ 125 جىلدىعىمەن ورايلاستىردىق. سول سياقتى ءبىزدىڭ مەرەيتويىمىز ءىلياس جانسۇگىروۆتىڭ 125 جىلدىعىمەن دە ساباقتاسا ءوتتى. وڭتۇستىكتە تۇرار رىسقۇلوۆتىڭ 125 جىلدىعىنا وراي ارنايى شارا وتكىزدىك. باتىستاعى بوكەي ورداسىنا ارنايى ەكسپەديتسيا ۇيىمداستىرىلدى. باسقا دا شارالارىمىزدى Egemen Qazaqstan-دا - ەڭبەكشى قازاقتا - ۇشقىندا قىزمەت ەتكەن قايراتكەرلەردىڭ ەسىمدەرىمەن بايلانىستىرۋعا تىرىستىق»، - دەدى دارحان قىدىرالى.
«ەگەمەن قازاقستان» گازەتىنىڭ باسقارما ءتوراعاسى ءوز سوزىندە الماتىدا جۋىردا ۇلكەن شارا وتكىزىلىپ، وندا «Egemen Qazaqstan» گازەتىنىڭ رەداكسياسى ورنالاسقان، ەگەمەندىكتى ەلگە سۇيىنشىلەگەن، ءابىش كەكىلبايەۆ پەن شەرحان مۇرتازا قىزمەت ەتكەن ۇلكەن عيماراتقا ەسكەرتكىش تاقتا ورناتىلعانىن ايتىپ ءوتتى.
«كەزىندە ەگەمەندە قىزمەت اتقارعان، دۇنيەدەن وتكەن بارلىق اعالارىمىزعا ارناپ، ۇلكەن اس بەردىك. وعان ءابدىجامىل نۇرپەيىسوۆتەن باستاپ، بۇكىل وقىرماندارىمىز، تۇراقتى اۆتورلارىمىز، ارداگەرلەرىمىز قاتىستى. كورمە ۇيىمداستىرىلدى. كۇنى كەشە تاراز جەرىندە تاعىلىمدى شارا ءوتتى. ءبىراق، بۇگىنگى جيىننىڭ ءمان- ماعىناسى ەرەكشە. سەبەبى، بىرىنشىدەن بۇل جەردە (ل. گۋميلەۆ اتىنداعى ە ۇ ۋ) ءبىزدىڭ ارداگەر اعالارىمىز ەڭبەك ەتەدى. سەرىك اعامىزدىڭ (قيرابايەۆ) ەل گازەتىندە قىزمەت اتقارعانىن بىلەسىزدەر. سول سەكىلدى ءبىزدىڭ باسىلىمدا قويشىعارا اعامىز ءتىلشى بولعان. ومىردەن وزىپ كەتكەن اقاڭ دا (اقسەلەۋ سەيدىمبەك) «Egemen Qazaqstan» گازەتىنىڭ ءبولىمىن باسقارعان. سول سەكىلدى كوپ اعالارىمىز گازەتتە قىزمەت ەتتى»، - دەدى ول.
دارحان قىدىرالى، «Egemen Qazaqstan» گازەتىنىڭ ل. گۋميلەۆ اتىنداعى ە ۇ ۋ-دىڭ جۋرناليستيكا فاكۋلتەتىمەن تىكەلەي بايلانىستى ەكەنىن اتاپ ءوتتى.
«بىزدە وسى فاكۋلتەتتىڭ 13 تۇلەگى قىزمەت ەتىپ جاتىر. قازىرگى تاڭدا گازەت قىزمەتكەرلەرى ەداۋىر جاسارعان. بىزدە قازىر ورتاشا جاس - 30. سوندىقتان، ستۋدەنتتەردىڭ كوبى بىزدە پراكتيكادان وتەدى. سونىمەن قاتار، ءبىز وزىمىزگە كادر دايارلاۋ ماقساتىندا «ەگەمەن اكادەميا» دەگەن اتتى ستۋدەنتتەرگە ارنايى ءدارىس ۇيىمداستىرعان بولاتىنبىز. ونىڭ تۇراقتى قاتىسۋشىلارى - وسى ەۋرازيا ۇلتتىق ۋنيۆەرسيتەتىنىڭ ستۋدەنتتەرى»، - دەدى دارحان قىدىرالى.
كونفەرەنسيا بارىسىندا دارحان قىدىرالى «Egemen Qazaqstan» گازەتىنىڭ 100 جىلدىعىنا وراي عالىم سەرىك قيرابايەۆقا، جازۋشى، تاريحشى قويشىعارا سالعارا ۇلىنا ارنايى مەرەكەلىك مەدال تابىس ەتتى.
اۆتور: ايان بەكەن ۇلى