ۇزىناعاشتان الماتىعا: كۇن سايىن اۋىل ادامدارى قالاعا جۇمىسقا بارۋعا قانشا ۋاقىت جۇمسايدى
الماتى. KAZINFORM - الماتىعا الىس-جاقىن ماڭداعى اۋىلداردان كولىگىمەن نە قوعامدىق كولىكپەن قاتىناپ جۇمىس ىستەيتىن ادامدار از ەمەس. مەگاپوليسكە اركىم ءارتۇرلى جولمەن كەلسە دە، ءبارىنىڭ شاعىمى ءبىر، ول - ساعاتتاپ ۋاقىت الاتىن كەپتەلىس.
وسى ورايدا Kazinform ءتىلشىسى قالا كىرەبەرىسىندەگى تاڭعى جانە كەشكى ۋاقىتتاعى كەپتەلىس ماسەلەسىمەن تانىسىپ قايتتى.
پوليتسيا دەپارتامەنتىنىڭ مالىمەتىنە سايكەس، 10 نەگىزگى ماگيسترال بويىنشا الماتى اۋماعىنا جۇمىس كۇندەرى ورتا ەسەپپەن 400 مىڭنان استام اۆتوموبيل كىرەدى.
ال وبلىستان قالاعا كىرەتىن قوسىمشا 17 جولمەن 300 مىڭنان استام كولىك كەلەدى.
بۇل كولىكتەردىڭ ءبىرىن باسقارىپ، جۇمىس ءۇشىن كۇندەلىكتى ۇزىناعاشتان الماتىعا جول جۇرەتىن تۇرعىنداردىڭ ءبىرى - باۋىرجان تۇرعىنبايەۆ. ول ق ت ج «الماتى ماگيسترالدى جەلى بولىمشەسىنىڭ» الماتى ەلەكترمەن جابدىقتاۋ ديستانتسياسىندا جۇمىس ىستەيدى. مۇندا قىزمەت ەتىپ جۇرگەنىنە 20 جىلدان اسقان.
- 2000 -جىلى شۋ قالاسىنان كەلىپ، الدىمەن الماتى ەنەرگەتيكا كوللەدجىندە «تەحنيك- ەلەكتريك» ماماندىعىن، كەيىن قازاق ۇلتتىق اگرارلىق ۋنيۆەرسيتەتىندە «ينجەنەر- ەلەكتريك» ماماندىعىن الىپ شىقتىم. قازىرگى جۇمىس ورنىما 2003 -جىلى كىردىم. انام دا 40 جىلداي تەمىرجولدا جۇمىس ىستەگەن. قازىر اپكەم دە وسى سالادا قىزمەت ەتەدى. 2014 -جىلدان باستاپ دەپارتامەنتتىڭ ورتالىق زەرتحاناسىندا جەتەكشى ينجەنەر بولىپ ەڭبەك ەتەمىن، — دەدى ول.
باۋىرجان تۇرعىنبايەۆتىڭ جۇمىس ورنى الماتى-1 تەمىرجول ۆوكزالىنىڭ ماڭىندا. ول مۇندا جەتۋ ءۇشىن كۇندەلىكتى تاڭعى 5.00-5.30 اراسىندا ۇيقىسىنان تۇرىپ، 6:00 شاماسىندا جولعا شىعادى.
11-قاراشا دۇيسەنبى كۇنى Kazinform ءتىلشىسى ايتىلعان ازاماتپەن بىرگە الماتىعا دەيىن جول ءجۇرىپ كوردى.
بۇل كۇنى 05:20 شاماسىندا ويانعان ول جۇبايىمەن بىرگە 06:10-دا ۇيدەن شىقتى.
ۇزىناعاش اۋىلىنىڭ ىشىندە ءبىرىنشى كوزگە تۇسكەنى - تاكسي ۇستاپ جانە اۆتوبۋس كۇتىپ تۇرعان ادامداردىڭ كوپتىگى بولدى.
باۋىرجان سەرىك ۇلى بۇل اۋىل تۇرعىندارى ءۇشىن ۇيرەنشىكتى كورىنىس ەكەنىن ايتادى.
- ۇزىناعاشتىڭ تەڭ جارتىسى قالاعا بارىپ جۇمىس ىستەيدى. سەبەبى مۇندا بارىنە جۇمىس جوق. مەن ءوزىم كۇندەلىكتى 5-تەن اسا ويانىپ، جارتى ساعات جولعا جينالامىن. سوسىن 6-لار شاماسىندا جۇمىسقا شىعامىن. جولعا ەڭ كەم دەگەندە 2 ساعات، ايتپەسە كۇندەلىكتى 3 ساعات كەتەدى، - دەيدى تۇرعىن.
كولىك «الماتى- بىشكەك» اۆتوجولىنا 06:18-دە جەتتى. جولدا الماتى مەن ۇزىناعاش اراسىندا جاقىندا قاتىناي باستاعان № 245 اۆتوبۋسىن بايقادىق.
قالاعا بارار جولدا العاشقى كەپتەلىس قاسكەلەڭ بۇرىلىسىنا كەلگەندە 06:36-دا باستالدى.
2gis قوسىمشاسى وسى جەردەن ۇلكەن الماتى اينالما اۆتوموبيل جولىنا دەيىن كولىك قوزعالىسى قيىنداعانىن كورسەتتى.
- «التىن وردا» ماڭىندا كوپىر مەن جولايرىقتىڭ اشىلۋى ماسەلەنى شەشكەن جوق، كەپتەلىس وبلىس جاققا قاراي ىعىسىپ كەتتى. 19- شاقىرىم بۇرىلىسىنان المالىباققا دەيىن ۇزىن-سونار كولىك كەزەگى كوبەيدى. سەبەبى جول ەكى-اق جولاق، سونى تورتەۋگە دەيىن كوبەيتۋ كەرەك. ونىڭ وزىندە كەپتەلىس تولىعىمەن كەتپەيدى. ءبىراق قازىرگىدەي كوپ ۋاقىت المايتىن بولادى. 19- شاقىرىم جاقتا كولىك اينالاتىن كوپىر جاساعان ءجون، - دەپ اتاپ ءوتتى جۇرگىزۋشى.
كەپتەلىس كەزىندە جولدان شىعىپ، جولسىز جەرمەن شاڭداتا جۇرگەن كولىكتەر دە بولدى. تاجىريبەلى جۇرگىزۋشىنىڭ ايتۋىنشا، مۇنداي ءجۇرىستى پوليتسيا قىزمەتكەرلەرى كورگەن جاعدايدا جۇرگىزۋشىگە 50 مىڭ تەڭگەدەن استام ايىپپۇل سالىنادى.
دەگەنمەن كەپتەلىستە تۇرىپ الماتى ءوڭىرىنىڭ جۇرگىزۋشىلەرىنە ءتان جاقسى ادەتكە دە كوزىمىز ءتۇستى. كولىك يەلەرى ۇزاق ۋاقىت قيمىلسىز تۇرعانىنا قاراماستان الدىمەن پوليتسيا كولىگىنە، كەيىن جەدەل جاردەم كولىگىنە اشىلا جول بەردى.
ءبىز كەپتەلىستەن شىعا بەرگەندە پوليتسيا مەن مەديتسينا قىزمەتكەرلەرىنىڭ قايدا اسىققانى بەلگىلى بولدى. اباي اۋىلىنا اپاراتىن اباي كوشەسىنە جەتپەي جەڭىل كولىك قورشاۋعا سوعىلىپتى.
- جولدا كولىك اپاتى بولىپ، كەپتەلىس كۇشەيىپ، قانشا ەرتە شىقساڭ دا جۇمىسقا كەشىگىپ قالاتىن كەزدەر بولادى. ونداي كەزدە مەن جۇمىسقا حابارلاسىپ، كەشىگىپ جاتقانىمدى ەسكەرتەمىن. ءبىراق كوبىنە ۋاقتىلى بارامىن. قار مەن جاڭبىر جاۋعان كەزدە قالا ىشىندە دە، سىرتىندا دا قوزعالىس قيىندايدى. جولىم تاعى جارتى ساعاتقا ۇزارادى، - دەپ اتاپ ءوتتى كەيىپكەرىمىز.
ۇلكەن الماتى اينالما اۆتوموبيل جولىن وتكەننەن كەيىن شاعىن كەپتەلىستەر «اسىل ارمان» تۇرعىن ءۇي كەشەنى جانە «التىن وردا» بازارىنىڭ ماڭىندا جانە رايىمبەك كوشەسىنىڭ بويىمەن مومىش ۇلى كوشەسىنە دەيىن ءار تۇستا بولدى.
قالاعا ءبىر ساعات كەپتەلىستەن كەيىن جەتكەن كەيىپكەر 07:48-دە جۇبايىن باۋىرجان مومىش ۇلى مەترو بەكەتىنەن قالدىردى. ءارى قاراي ول مومىش ۇلى كوشەسىمەن تومەن قاراي ءتۇسىپ، ۇلكەن الماتى جولىنىڭ بويىمەن سولتۇستىك اينالما جولىنا شىعىپ، 08:51-دە جۇمىسقا جەتتى.
- دۇيسەنبى كۇنى جۇمىسقا جەتۋ جەڭىلدەۋ بولادى. سەبەبى بازار جۇمىس ىستەمەيدى. ال سەيسەنبىدەن جۇماعا دەيىن كەپتەلىس كوبەيەدى. سونداي-اق جۇما كۇنى كەشكە الماتىدا وبلىسقا قايتۋ قيىندايدى. سەبەبى كولىك تە، ادام دا كوپ بولادى. ونداي كەزدە قالاعا كوشۋدى ويلاپ كەتەمىن، - دەيدى ول.
ال كەشكى ساعات 18:07-دە ۇزىناعاش تۇرعىنى ۇيىنە قاراي جولعا شىقتى. قايتار جولدا «اقكەنت» ت ۇ ك پەن قالقامان ايالداماسى اراسىندا، «اپورت» ويىن-ساۋىق كەشەنىنەن «التىن وردا» بازارىنان وتكەنشە جانە 19- شاقىرىم بۇرىلىسىنان المالىباق اۋىلىنا دەيىن كەپتەلىس بولدى.
باۋىرجان تۇرعىنبايەۆ كەشكە 20:49-دا ۇيىنە جەتتى.
ونىڭ الماتىداعى جۇمىس ورنى مەن ۇزىناعاش اۋىلىنىڭ اراسى - 55-57 شاقىرىم. ايتۋىنشا، ورتا ەسەپپەن ءبىر اپتاعا 60-65 ليتر جانارماي كەتەدى، وعان 14-16 مىڭ تەڭگە جۇمسايدى.
ەسكە سالايىق، بۇعان دەيىن قازاۆتوجول كومپانياسىنىڭ التىن وردا ماڭىنداعى كەپتەلىس ماسەلەسىن قالاي شەشەتىنىن جازعانبىز.
اۆتور
دوسبول اتاجان
