زەلەنسكي ءبىتىم تۋرالى: ۋكراينا رەسەيدىڭ ارەكەتىنە اينا-قاتەسىز جاۋاپ بەرەدى

كيەۆ. KAZINFORM - ۋكراينا پرەزيدەنتى ۆلاديمير زەلەنسكي رەسەي تاراپىنان سوعىس قيمىلدارىن توقتاتۋ تۋرالى شەشىم قابىلدانعان جاعدايدا، ۋكراينا دا ءدال سونداي ارەكەت ەتەتىنىن مالىمدەدى، دەپ جازدى انادولى.

ونىڭ ايتۋىنشا: «تىنىشتىققا - تىنىشتىقپەن، شابۋىلعا - قورعانىسپەن جاۋاپ بەرىلەدى».

- ەگەر رەسەي شىنىمەن دە تولىق ءارى ءسوزسىز تىنىشتىق ورناتۋعا دايىن بولسا، ۋكراينا دا ءدال سولاي ارەكەت ەتەدى. ەگەر تىنىشتىق شىن مانىندە ورناسا، ءبىز ونى پاسحا كۇنى اياقتالعان سوڭ دا ۇزارتۋدى ۇسىنامىز، - دەپ جازدى زەلەنسكي Telegram پاراقشاسىنا.

ول بۇعان دەيىن سوعىستى 30 كۇنگە تولىق توقتاتۋ تۋرالى ۇسىنىس جاسالعانىن، بۇل باستامانى ا ق ش كوتەرگەنىن، ۋكراينا ونى قولداعانىن، الايدا رەسەي وسى ۋاقىتقا دەيىن - 39 كۇن بويى بۇل ۇسىنىسقا جاۋاپ بەرمەي وتىرعانىن اتاپ ءوتتى.

زەلەنسكيدىڭ ايتۋىنشا، بۇل جاعداي رەسەيدىڭ شىنايى نيەتىن كورسەتەدى.

- 30 ساعات - تەك تاقىرىپ ءۇشىن، ال 30 كۇن - سەنىم ورناتۋعا مۇمكىندىك، - دەدى ول.

ءبىراق ۋكراينا قارۋلى كۇشتەرىنىڭ باس قولباسشىسىنىڭ مالىمەتىنە سۇيەنسەك، فرونتتىڭ كەيبىر باعىتتارىندا رەسەي تاراپىنان شابۋىلدار مەن ارتيللەريالىق سوققىلار جالعاسىپ جاتىر. سوندىقتان زەلەنسكي ماسكەۋدىڭ سوزىنە سەنىم جوق ەكەنىن ايتتى:

- ءبىز ماسكەۋدىڭ قالاي مانيپۋلياتسيا جاسايتىنىن جاقسى بىلەمىز، سوندىقتان بارلىق جاعدايعا دايىنبىز. ۋكراينا قورعانىس كۇشتەرى اقىلمەن جانە اينا-قاتەسىز جاۋاپ بەرەدى. ءاربىر رەسەيلىك سوققىعا لايىقتى جاۋاپ بەرىلەدى، - دەدى ۋكراينا پرەزيدەنتى.

بۇعان دەيىن حابارلانعانداي، ۆلاديمير پۋتين پاسحا مەيرامىنا بايلانىستى ۋاقىتشا بىتىمگە كەلەتىنىن مالىمدەدى.