زاۋىتتار، ۆوكزالدار: وتكەن اپتادا وڭىرلەردە قانداي نىساندار اشىلدى

مەملەكەت باسشىسى قاسىم-جومارت توقايەۆتىڭ تاپسىرمالارىن ورىنداۋ اياسىندا ەل وڭىرلەرىندە ونەركاسىپتىك الەۋەتتى دامىتۋ، كولىك جانە تۇرعىن ءۇي- كوممۋنالدىق ينفراقۇرىلىمدى جاڭعىرتۋ، سونداي-اق ازاماتتاردىڭ ءومىر ءسۇرۋ ساپاسىن ارتتىرۋ ماقساتىندا الەۋمەتتىك سالانى دامىتۋ بويىنشا جۇيەلى جۇمىس جۇرگىزىلىپ جاتىر.

اقمولا وبلىسىندا ينۆەستيتسيا كولەمى 7,4 ميلليارد تەڭگە بولاتىن جاڭا مەتاللۋرگيالىق كەشەن ىسكە قوسىلدى.

رەكونسترۋكسيالانعان وندىرىستىك الاڭدا ايىنا 2-دەن 3 مىڭ تونناعا دەيىن قورعاسىن قۇرامدى شيكىزاتتى قايتا وڭدەۋ جولعا قويىلعان.

جوبا مەملەكەت باسشىسىنىڭ شيكىزاتتىق باعىتتان تەرەڭ وڭدەۋگە جانە قوسىلعان قۇنى جوعارى ءونىم شىعارۋعا كوشۋ جونىندەگى تاپسىرمالارى شەڭبەرىندە جۇزەگە اسىرىلدى.

ينفراقۇرىلىمدى دامىتۋ

الماتىدا ناۋرىزباي جانە بوستاندىق اۋداندارىنىڭ 15 مىڭعا جۋىق تۇرعىنىن سۋمەن قامتاماسىز ەتەتىن سۋ قۇبىرى الاڭىن رەكونسترۋكسيالاۋ اياقتالدى. جوبا اياسىندا جاڭا ەكىنشى كوتەرىلىمدەگى سورعى ستانساسى سالىندى، جالپى كولەمى 2 مىڭ م3 ەكى تازا سۋ رەزەرۆۋارى رەكونسترۋكسيالاندى، ينجەنەرلىك جەلىلەر جاڭارتىلدى جانە زاماناۋي اۆتوماتتى باقىلاۋ جۇيەسى ەنگىزىلدى.

جۇرگىزىلگەن جاڭعىرتۋ جۇمىستارى سۋ قۇبىرى جەلىسىندەگى قىسىمدى تۇراقتى ۇستاپ تۇرۋعا، اسىرەسە سۋ تۇتىنۋ كولەمى ارتاتىن ۋاقىتتا، سونداي-اق سۋ بەرۋدەگى ىركىلىستەردىڭ الدىن الۋعا مۇمكىندىك بەرەدى.

قوستاناي وبلىسىندا رەسپۋبليكالىق ماڭىزى بار قوستاناي —- مامليۋتكا اۆتوجولىنىڭ 43 شاقىرىمىنا ورتاشا جوندەۋ جۇمىستارى اياقتالدى. جوبانىڭ جالپى قۇنى - 5,6 ميلليارد تەڭگە.

جولدىڭ وسى ۋچاسكەسىن جاڭعىرتۋ قاۋىپسىزدىكتى ارتتىرۋعا، كولىك قاتىناسىن جاقسارتۋعا مۇمكىندىك بەردى، سونداي-اق مەملەكەت باسشىسىنىڭ قازاقستاننىڭ ترانزيتتىك حاب رەتىندەگى پوزيتسياسىن نىعايتۋ جونىندەگى مىندەتتەرى شەڭبەرىندە كاسىپكەرلىكتى دامىتۋعا جانە ءوڭىردىڭ كولىك- لوگيستيكالىق الەۋەتىن نىعايتۋعا ىقپال ەتتى.

اقتوبە وبلىسىنىڭ قاراۋىلكەلدى اۋىلىندا رەكونسترۋكسيادان كەيىن تەمىرجول ۆوكزالى پايدالانۋعا بەرىلدى.

جۇمىستار مەملەكەت باسشىسىنىڭ تاپسىرماسى بويىنشا ەلىمىزدىڭ ۆوكزالدارىن كەزەڭ-كەزەڭىمەن جاڭعىرتۋ شەڭبەرىندە ورىندالدى. جاڭعىرتۋ اياسىندا جالپى اۋدانى 207,73 شارشى مەتردى قۇرايتىن ءبىر قاباتتى ۆوكزال عيماراتى جاڭارتىلىپ، 25 ورىندىق كۇتۋ زالى جابدىقتالدى. سونىمەن قاتار ۆوكزال ماڭى اباتتاندىرىلىپ، جولدار مەن جاياۋ جۇرگىنشىلەر جولدارىنا قاتتى جابىن توسەلدى، اۋماق كوگالداندىرىلدى.

اۋىل شارۋاشىلىعى جانە قايتا وڭدەۋ

قوستاناي وبلىسىندا جوعارى ساپالى ءسۇتتىڭ وزىندىك ءوندىرىسىن ۇلعايتۋ جانە يمپورتقا تاۋەلدىلىكتى تومەندەتۋ جونىندەگى جۇمىس شەڭبەرىندە قۇنى 3,2 ميلليارد تەڭگە بولاتىن زاماناۋي تاۋارلى- ءسۇت فەرماسى پايدالانۋعا بەرىلدى. قۋاتتىلىعى 400 مالعا ارنالعان كاسىپورىن جىلىنا 4380 تونناعا دەيىن ءسۇت وندىرۋگە قاۋقارلى.

كاسىپورىندا گەرمانيادان ساتىپ اكەلىنگەن گولشتەين اسىل تۇقىمدى مال باسى تارتىلىپ، 30 جۇمىس ورنى اشىلدى. اقمولا وبلىسىنىڭ ەڭبەك اۋىلىندا قۇنى 8,1 ميلليارد تەڭگە بولاتىن ءسۇت-تاۋارلى فەرماسى ىسكە قوسىلدى. كەشەننىڭ جوبالىق قۋاتى 900 باس سيىرعا ەسەپتەلگەن، ال كۇتىلەتىن جىلدىق ساۋىن 4230 توننا ءسۇتتى قۇرايدى. كاسىپورىن ءۇشىن جوعارى تەحنولوگيالىق جابدىقتار ساتىپ الىندى، سونداي-اق قالدىقتاردى قايتا وڭدەۋ جانە كادەگە جاراتۋ جونىندەگى بيوكەشەن ورناتىلدى.

ەنەرگەتيكا

قوستاناي وبلىسىندا جالپى قۋاتى 100 مۆت جەل ەلەكتر ستانساسى پايدالانۋعا بەرىلدى. جوباعا سالىنعان ينۆەستيتسيا كولەمى 38,6 ميلليارد تەڭگەنى قۇرادى. نىساندا ءارقايسىسىنىڭ قۋاتى 6,25 مۆت بولاتىن 16 جەل گەنەراتورى ورناتىلعان.

ەكى ستانسا جىلىنا 380 ميلليون كۆت/ساع دەيىن ەلەكتر ەنەرگياسىن وندىرە الادى، بۇل ءوڭىردىڭ ەنەرگەتيكالىق قاۋىپسىزدىگىن نىعايتۋعا، ينفراقۇرىلىمدى دامىتۋ جانە حالىقتىڭ ءومىر ءسۇرۋ ساپاسىن ارتتىرۋ ءۇشىن سەنىمدى جاعدايلاردى قامتاماسىز ەتۋگە مۇمكىندىك بەرەدى.

پرەزيدەنتتىڭ جەتىسۋ وبلىسىنىڭ پانفيلوۆ اۋدانىنداعى حالىقتى تابيعي گازبەن قامتاماسىز ەتۋ جونىندەگى تاپسىرمالارىن ورىنداۋ اياسىندا بىردەن بەس ەلدى مەكەن گازبەن جابدىقتاۋعا قوسىلدى.

اتاپ ايتقاندا جيدەلى، اقارال، قىزىلجيدە، سارپىلداق، كەرىماعاش اۋىلدارىنا جالپى ۇزىندىعى 58 شاقىرىم گاز قۇبىرى تارتىلدى.

ناتيجەسىندە 1,5 مىڭعا جۋىق تۇرعىن كوگىلدىر وتىنعا قول جەتكىزدى.

بۇعان دەيىن شىمكەنتتە مۇگەدەكتىگى بار ازاماتتارعا ارنالعان 150 ورىندىق جاڭا وڭالتۋ ورتالىعى اشىلعانىن جازعانبىز.