زاڭسىز يەمدەلگەن 1,5 تريلليون تەڭگەنىڭ اكتيۆتەرى مەملەكەتكە قايتارىلدى
استانا. KAZINFORM - زاڭسىز يەمدەلگەن 1,5 تريلليون تەڭگەنىڭ اكتيۆتەرى مەملەكەتكە قايتارىلدى. بۇل تۋرالى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتوراعاسى نۇرداۋلەت سۇيىندىكوۆ ايتتى.
«مەملەكەت باسشىسىنىڭ تاپسىرماسىمەن، جاۋاپتى مەملەكەتتىك ورگانداردىڭ بىرلەسكەن كۇش-جىگەرىمەن زاڭسىز يەمدەلگەن اكتيۆتەردى مەملەكەتكە قايتارۋ بويىنشا جۇيەلى جۇمىس جۇرگىزىلىپ وتىر. وتكەن جىلى پارلامەنت بەيىندى زاڭ قابىلدادى. ونىڭ نورمالارى 2023 -جىلدىڭ 12 -قىركۇيەگىندە تولىعىمەن كۇشىنە ەندى. ياعني، سوڭعى 1 جىل كولەمىندە سول زاڭدا بەلگىلەنگەن جاڭا تەتىكتەر ارەكەت ەتەدى. اكتيۆتەردى قايتارۋ جونىندەگى ءىس- قيمىل زاڭ قابىلدانعاننان ەداۋىر بۇرىن باستالعان بولاتىن. 2022 -جىلدىڭ باسىنان ەلىمىزدىڭ قۇقىق قورعاۋ، ارناۋلى مەملەكەتتىك، ۋاكىلەتتى مەملەكەتتىك ورگانداردىڭ شارالارىمەن قۇنى 1,5 تريلليون تەڭگەدەي بولاتىن اكتيۆتەر قايتارىلدى. بۇل - قىلمىستىق، ازاماتتىق، اكىمشىلىك ىستەر بويىنشا مەملەكەت پايداسىنا وندىرىلگەن سومالار مەن مۇلىكتەر جانە مەملەكەتتىك ورگانداردىڭ باقىلاۋ- قاداعالاۋ قىزمەتى اياسىنداعى وندىرۋلەر»، - دەدى ول ورتالىق كوممۋنيكاتسيالار قىزمەتىندەگى بريفينگتە.
كوميتەت باسشىسىنىڭ ايتۋىنشا، وسى جىلدان باستاپ بەيىندى زاڭدا بەلگىلەنگەن تەتىكتەر مەن قايتارۋ تاسىلدەرى قولدانىلا باستادى.
«بۇل جۇمىستا اكتيۆتەردى زاڭدى اينالىمعا تارتۋ ارقىلى قازاقستان حالقىنىڭ يگىلىگى ءۇشىن ەلىمىزدىڭ ەكونوميكالىق جانە الەۋمەتتىك تۇرعىدان ورنىقتى دامۋىن قامتاسىز ەتۋ جونىندەگى زاڭنىڭ قابىلدانۋ ماقساتتارىن قاتاڭ ۇستانۋدامىز. زاڭنىڭ نەگىزگى قاعيداتتارىنىڭ ءبىرى - ول ەرىكتى قايتارۋدى ىنتالاندىرۋ. ەرىكتى قايتارۋدىڭ ارتىقشىلىعى سۋبەكت مۇلكىنىڭ ءبىر بولىگىن وزىندە ساقتاپ قالا الادى. سونىمەن قاتار ازاماتتارىمىزدىڭ ءال-اۋقاتىن ارتتىرۋعا تىكەلەي اسەر ەتەتىن ەلگە قاجەتتى جوبالاردى ىسكە اسىرادى. ەڭ باستىسى - قاراجاتتىڭ قازاقستاندا جۇمىس ىستەۋى، سالىقتىڭ وسىندا تولەنۋى، جاڭا جۇمىس ورىندارىنىڭ اشىلۋى. سونداي-اق ەرىكتى تۇردە قايتارۋ كەزىندە سۋبەكت ءبىرقاتار زاڭدا كورسەتىلگەن قۇقىقتىق مۇمكىندىكتەر مەن كەپىلدىكتەر الادى. ونىڭ ىشىندە جاۋاپتىلىقتان دا بوساتىلۋى مۇمكىن»، - دەدى نۇرداۋلەت سۇيىندىكوۆ.
اۆتور
مارلان جيەمباي
