زاڭسىز الىنعان 15 ميلليارد تەڭگەنىڭ اكتيۆتەرى مەملەكەتكە ماجبۇرلەپ قايتارىلدى
استانا. KAZINFORM - زاڭسىز الىنعان 15 ميلليارد تەڭگەنىڭ اكتيۆتەرى مەملەكەتكە ماجبۇرلەپ قايتارىلدى. بۇل تۋرالى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتوراعاسى نۇرداۋلەت سۇيىندىكوۆ ايتتى.
«كوميتەت اكتيۆتىڭ پايدا بولۋ زاڭدىلىعىنا قيسىندى كۇماندانسا، وندا ماجبۇرلەۋ تەتىكتەرى قولدانىلادى. نەگىزگى قۇرال - پايدا بولۋى تۇسىنىكسىز اكتيۆ تۋرالى تالاپ-ارىز. مۇنداي سوت ىستەرى بويىنشا دالەلدەۋدىڭ نەگىزگى اۋىرتپالىعى جاۋاپكەرگە جۇكتەلەدى. ەگەر جاۋاپكەر كوميتەتتىڭ اكتيۆتىڭ پايدا بولۋىنىڭ زاڭسىزدىعى تۋرالى ۋاجدەرىن سەنىمدى تۇردە جوققا شىعارا الماسا، وندا مۇلىك سوت شەشىمى بويىنشا مەملەكەت كىرىسىنە اينالادى. جىل باسىنان بەرى كوميسسيا 15 ميلليارد تەڭگەدەن استام سوماعا وسىنداي 3 تالاپ-ارىزدى ماقۇلدادى. ءبىر تالاپتى جاۋاپكەر بىردەن مويىنداپ، زاڭسىز يەمدەنىلگەن مۇلىكتى مەملەكەتكە ءوز ەركىمەن قايتارىپ بەردى. ەكىنشى تالاپ بويىنشا مۇلىكتى پايدا بولۋى تۇسىنىكسىز اكتيۆتەر دەپ تانۋ تۋرالى سوت شەشىمى شىقتى. وعان شاعىم كەلتىرىلىپ، اپپەلياتسيالىق ساتىدان ءوتتى. كۇشىنە ەنىپ، جالپى سوماسى 5 ميلليارد تەڭگەدەن اساتىن بۇل سوت اكتىسى تولىعىمەن ورىندالدى. مەملەكەتكە قايتارىلعان اكتيۆتەردىڭ ىشىندە ءتۇرلى ۆاليۋتاداعى اقشا قاجاراتتار، زەرگەرلىك بۇيىمدار مەن برەندتىك اكسەسسۋارلار، سونداي-اق تاريحي جانە مادەني قۇندىلىعى بار زاتتار بار»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، وتكەن اپتادا كوميتەتتىڭ زاڭسىز جەكەشەلەندىرىلگەن كومپانيانى مەملەكەت كىرىسىنە اينالدىرۋ تۋرالى ءۇشىنشى تالابى قاناعاتتاندىرىلدى.
بۇعان دەيىن زاڭسىز الىنعان 450 ميلليارد تەڭگەنىڭ اكتيۆى مەملەكەتكە ەرىكتى تۇردە قايتارىلعانىن جازعان بولاتىنبىز.
اۆتور
مارلان جيەمباي
