ۇزاق جاساۋدىڭ سىرى ەڭبەك پەن جان تىنىشتىعىندا - 114 جاستاعى كەيۋانا
جاڭاارقا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدەگى جۇزدەن اسقان قاريالار ءتىزىمىن جاريالادى. بەلگىلى بولعانداي، وڭتۇستىك وڭىرلەردە سولتۇستىك وبلىستارمەن سالىستىرعاندا جاسى 100-دەن اسقان قازاقستاندىقتار كوبىرەك.
ال ەڭ قارت قازاقستان تۇرعىنى - 114 جاستا. اجەي Kazinform اگەنتتىگىنىڭ تىلشىسىنە ۇزاق ءومىر ءسۇرۋدىڭ قۇپياسىن ايتىپ بەردى.
114 جاستاعى تۇيمەگۇل تەمىربايەۆا 1910 -جىلى 1-قاڭتاردا جامبىل وبلىسى بايقادام اۋدانىندا دۇنيەگە كەلگەن. 22 جاسىندا ايازباي تەمىربايەۆقا تۇرمىسقا شىققاننان بەرى 92 جىل بويى ۇلىتاۋ وبلىسىنىڭ جاڭاارقا اۋدانىندا تۇرادى.
عاسىر جاساعان كەيۋانا ءتورت بالاسىنان 15 نەمەرە مەن 25 شوبەرە سۇيگەن. اجەنىڭ ۇلكەن بالاسى زەينەتكە شىعىپ، 70-كە جەتىپ قالعان، ال كەنجەسى 60 جاستا.
ايتا كەتۋ كەرەك، تۇيمەگۇل اپانىڭ ومىرلىك جولداسى دا ۇزاق عۇمىر كەشكەن. وتاعاسى 96 جاسىندا دۇنيەدەن وزعان.
«جۇبايىممەن ۇزاق ءارى باقىتتى ءومىر سۇردىك. ءتورت بالا تاربيەلەدىك. قازىر بالالارىمنىڭ، نەمەرە-شوبەرەلەرىمنىڭ ورتاسىندا، سولاردىڭ قىزىعىن كورىپ وتىرمىن. بالالارىم ءاردايىم مەنى قۋانتىپ، قامقور بولىپ جۇرەدى. مۇمكىن ۇزاق ءومىر ءسۇرۋىمنىڭ ءبىر قۇپياسى وسىندا شىعار»، - دەيدى تۇيمەگۇل تەمىربايەۆا.
اجەيدىڭ ايتۋىنشا، ۇزاق عۇمىر كەشۋدىڭ تاعى ءبىر باستى قۇپياسى - ەڭبەكتە، جان تىنىشتىعىندا. قاريانىڭ ءومىر جولىندا قانداي قيىندىقتار بولماسىن، ءبارىن تاباندىلىقپەن جانە ەڭسەسىن تۇسىرمەي جەڭە بىلگەن.
«وتباسىمىزدا ءۇش بالا بىرگە ەسەيدىك. اتا-انام جىلقىشى بولاتىن. ەسىمدى بىلگەلى ءومىرىم جىلقىلارمەن بىرگە ءوتىپ كەلەدى. بيە ساۋىپ، قىمىز اشىتتىم، ءۇي شارۋاسىنا كومەكتەستىم. نەبارى ءۇش جاسىمدا انامنان ايىرىلىپ، جەتىم قالدىم. سوندىقتان ءۇي شارۋاسىن ەرتە جاستان باستاپ ۇيرەنۋگە تۋرا كەلدى. تۇرمىس قۇرعاننان كەيىن دە جۇبايىما كومەكشى، دەمەۋ بولدىم. ەشقاشان اۋىر جۇمىستان قاشقان ەمەسپىن. جاس كەزىمدە جىلقىلارعا سۋدى شەلەكپەن تاسىدىق. بيە ساۋىپ، جۇزدەگەن ليتر ءسۇت تاپسىردىق. مەنىڭشە، ۇزاق ءومىر ءسۇرۋدىڭ تاعى ءبىر قۇپياسى - ءارقاشان اتقا مىنگەندى ۇناتقانىمدا دەپ ويلايمىن. قارتايعانشا ەردەن تۇسكەن جوقپىن. جۇمىستىڭ باسىم بولىگى ات ۇستىندە اتقارىلدى»، - دەيدى تۇيمەگۇل اپا.
اجەي قازىر دە قول قۋسىرىپ وتىرمايدى. نەمەرەلەرىنىڭ ايتۋىنشا، ول ءالى دە ءۇي شارۋاسىنا كومەكتەسىپ كۇيبەڭدەپ جۇرەدى. ءبارى اجەسىن ۇلگى تۇتادى جانە ولاردىڭ وتباسىندا ۇزاق جاسايتىندار ءالى دە از بولمايتىنىنا سەنىمدى.
بۇعان دەيىن تۇيمەگۇل اجەي Jibek Joly ەفيرىندە قازاقستاندىقتارعا باتاسىن بەرگەن بولاتىن.
ەڭبەك مينيسترلىگىنىڭ مالىمەتىنشە، قازاقستاندا جۇزدەن اسقان 423 ادام تۇرادى.
«ايتا كەتۋ كەرەك، ەلدىڭ وڭتۇستىك ايماعىندا ءجۇز جاساعاندار كوبىرەك. تۇركىستان وبلىسىندا 100-دەن اسقان 64 ادام بار. ۇزاق ءومىر سۇرەتىندەر سانى بويىنشا ەكىنشى ورىندا ەلىمىزدىڭ ەڭ ءىرى قالاسى - الماتى ورنالاقان. وندا 100 جاستان اسقان 48 ادام تۇرادى. عاسىر كەشكەندەر سانى بويىنشا ءۇشىنشى ورىندا الماتى وبلىسى تۇر، وندا 100 جانە ودان جوعارى جاستاعى 38 ادام تۇرادى. ەڭ قارت قازاقستاندىقتاردىڭ ۇشتىگىنە ۇلىتاۋ وبلىسىنىڭ تۇرعىنى - 114 جاس، پاۆلودار وبلىسىنىڭ تۇرعىنى - 112 جاس جانە 110 جاستاعى قاريا تۇراتىن تۇركىستان وبلىسى كىردى»، - دەلىنگەن ەڭبەك مينيسترلىگىنىڭ حابارلاماسىندا.
ەستەرىڭىزگە سالا كەتەيىك، 1- قازاندا بۇكىل الەمدە حالىقارالىق قارتتار كۇنى اتالىپ وتەدى. بۇل مەرەكە 1990 -جىلى 14 -جەلتوقساندا بىرىككەن ۇلتتار ۇيىمى باس اسسامبلەياسىنىڭ 45 -سەسسياسىندا جاريالاندى.
قازاقستان ب ۇ ۇ ستاندارتى بويىنشا قارتايعان ەلدەر قاتارىنا كىرەدى.
اۆتور
ايزادا اگيلبايەۆا
