زاڭ جوباسى: بايلانىس وپەراتورلارى كوپقاباتتى ۇيلەرگە ستانسانى ەركىن ورناتا الادى

استانا. KAZINFORM - قازاقستاندا بايلانىس وپەراتورلارىنا كوپقاباتتى تۇرعىن ۇيلەردىڭ شاتىرلارىنا بازالىق ستانسانى ورناتۋعا تۇرعىنداردىڭ كەلىسىمىنسىز رۇقسات بەرىلۋى مۇمكىن.

اتالعان جاڭاشىلدىق سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى ازىرلەگەن زاڭ جوباسىندا قاراستىرىلعان. قۇجات «اشىق ن ق ا» پورتالىندا جاريالانىپ، 4 -ماۋسىمعا دەيىن قوعام تالقىلاۋىنا ۇسىنىلدى.

جوباعا سايكەس، ەگەر بايلانىس وپەراتورىندا سانيتاريالىق-ەپيدەميولوگيالىق قورىتىندى بولسا، كوپقاباتتى تۇرعىن ءۇي جانە عيماراتتاردىڭ مەنشىك يەلەرى تەلەكوممۋنيكاتسيالىق جابدىقتى ورناتۋدان باس تارتا المايدى.

- كوندومينيۋم نىساندارىنىڭ، عيماراتتاردىڭ، قۇرىلىستاردىڭ، پاتەرلەر مەن تۇرعىن ەمەس ءۇي-جايلاردىڭ مەنشىك يەلەرىنە نەمەسە ولاردىڭ ۋاكىلەتتى وكىلدەرىنە سانيتاريالىق-ەپيدەميولوگيالىق قورىتىندى بولعان جاعدايدا تەلەكوممۋنيكاتسيالىق جابدىقتى ورناتۋدان باس تارتۋعا تىيىم سالىنادى، - دەلىنگەن قۇجاتتا.

سونىمەن قاتار تۇرعىندار بايلانىس ساپاسىن قامتاماسىز ەتۋ ءۇشىن شاتىر مەن وزگە دە الاڭدارعا بايلانىس وپەراتورلارىنا تەڭ دارەجەدە رۇقسات بەرۋگە مىندەتتى.

زاڭ بويىنشا وپەراتور الدىمەن مۇلىك يەلەرىنىڭ بىرلەستىگى وكىلىنە، كووپەراتيۆ نەمەسە تۇتىنۋشىلار كووپەراتيۆىنىڭ ءتوراعاسىنا جۇگىنەدى. ول 15 جۇمىس كۇنى ىشىندە جابدىقتى ورنالاستىرۋ شارت جاساۋى ءتيىس.

بۇعان دەيىن ەلىمىزدە بازالىق ستانسا ورناتۋدىڭ داۋعا اينالىپ وتىرعانى تۋرالى جازعان ەدىك. اتاپ ايتقاندا، زاڭگەرلەر قارسى، وپەراتورلار قولداپ وتىر.

ەسكە سالا كەتسەك، بازالىق ستانسا ورناتۋعا ءۇي تۇرعىندارىنىڭ %70 كەلىسىمى كەرەك.

اۆتور

داۋلەت ىزتىلەۋ