يزرايلدەگى «بولاشاق» ستيپەندياتتارى ەلگە قايتادى

«حالىقارالىق باعدارلامالار ورتالىعى» ا ق يزرايلدەگى سوعىس جاعدايىنا بايلانىستى ونداعى «بولاشاق» ستيپەندياتتارى ەلگە قايتارىلاتىنىن مالىمدەدى، دەپ حابارلايدى Kazinform اگەنتتىگىنىڭ ءتىلشىسى.

Израильдегі «Болашақ» стипендиаттары елге қайтады
Фото: Фото: Сыртқы істер министрлігі

«يزرايلدە «بولاشاق» باعدارلاماسى ارقىلى 16 ادام ءبىلىم الىپ جاتقان. ونىڭ ىشىندە حايفا قالاسىندا 12 ستۋدەنت بار. قالعان 4 ستۋدەنت باسقا قالالارداعى ۇيىمداردا تاعىلىمداماعا كەتكەن. ولار بۇگىن قازاقستاننىڭ ەۆاكۋاتسيالاۋ ۇشاعىمەن ەلگە قايتارىلادى»، - دەدى ورتالىقتىڭ باسپا ءسوز قىزمەتى.

سونداي- اق ورتالىقتىڭ باسپا ءسوز قىزمەتى ولاردىڭ وقۋىن جالعاستىرۋ ماسەلەسىن ارنايى قاراستىراتىنىن جەتكىزدى.

ايتا كەتەيىك، يزرايلدەگى قازاقستان ەلشىسى ساتىبالدى بۇرشاقوۆ Kazinform اگەنتتىگىنە بەرگەن ەكسكليۋزيۆ سۇحباتىندا قازاقستان ازاماتتارىن ەۆاكۋاتسيالاۋ جۇمىسى قالاي ءجۇرىپ جاتقانىن بايانداعان ەدى.

«قازىردىڭ وزىندە قازاقستاننىڭ 150 ازاماتىن تىزىمگە تىركەدىك. ارنايى رەيستىڭ اشىلعانىن تاڭەرتەڭ جاريالاعاندىقتان، كۇندىز قوڭىراۋ شالعان ادام كوپ بولدى. باعانا ايتقانداي، ءبىز ءتىزىمدى ءاۋ باستان جاساپ قويعانبىز، كىمنىڭ قايدا ەكەنىن الدىن الا ءبىلىپ وتىردىق. سونىڭ ارقاسىندا جۇمىس جەڭىل ءوتتى»، - دەدى ساتىبالدى بۇرشاقوۆ.

بۇگىن تاڭعى 8:00-دە Air Astana ۇشاعى تەل اۆيۆكە ۇشىپ كەتكەن بولاتىن. قازاقستاندىق ستۋدەنتتەر مىنگەن ۇشاق ەلگە تۇنگى ۋاقىتتا جەتەدى.

اۆتور

ايجان سەرىكجان قىزى

سوڭعى جاڭالىقتار