يزرايلدە جۇرگەن 124 قازاقستاندىق ارنايى بورتپەن ەلگە جەتكىزىلەدى
يزرايلدەگى سوعىس جاعدايىنىڭ ورشۋىنە بايلانىستى سوندا جۇرگەن 124 قازاقستاندىق ارنايى رەپاترياتسيالىق رەيسپەن ەلگە جەتكىزىلەدى، دەپ حابارلايدى Kazinform اگەنتتىگى سىرتقى ىستەر مينيسترلىگىنە سىلتەمە جاساپ.

بۇگىن تاڭعى 8:00-دە يزرايلدەگى قازاقستاندىقتاردى ەلگە قايتارۋ ءۇشىن ارنايى Air Astana ۇشاعى اتتانعان ەدى.
«بۇگىن 10 - قازاندا استانا ۋاقىتى بويىنشا ساعات 16:45-تە يزرايلدىڭ تەل- اۆيۆ قالاسىنان قازاقستانعا رەپاترياتسيالىق رەيس ۇشىپ شىقتى. بورتتا 166 جولاۋشى بار، ولاردىڭ ىشىندە 124 ق ر ازاماتى جانە 42 شەتەلدىك ازامات. بۇگىن كەشكە ۇشاق الماتى قالاسىنا كەلەدى دەپ كۇتىلۋدە»، - دەپ جازىلعان مينيسترلىكتىڭ حابارلاماسىندا.
ايتا كەتەيىك، يزرايلدەگى قازاقستان ەلشىسى ساتىبالدى بۇرشاقوۆ Kazinform اگەنتتىگىنە بەرگەن ەكسكليۋزيۆ سۇحباتىندا قازاقستان ازاماتتارىن ەۆاكۋاتسيالاۋ جۇمىسى قالاي ءجۇرىپ جاتقانىن بايانداعان ەدى.
«قازىردىڭ وزىندە قازاقستاننىڭ 150 ازاماتىن تىزىمگە تىركەدىك. ارنايى رەيستىڭ اشىلعانىن تاڭەرتەڭ جاريالاعاندىقتان، كۇندىز قوڭىراۋ شالعان ادام كوپ بولدى. باعانا ايتقانداي، ءبىز ءتىزىمدى ءاۋ باستان جاساپ قويعانبىز، كىمنىڭ قايدا ەكەنىن الدىن الا ءبىلىپ وتىردىق. سونىڭ ارقاسىندا جۇمىس جەڭىل ءوتتى»، - دەدى ساتىبالدى بۇرشاقوۆ.
اۆتور
ايجان سەرىكجان قىزى