يزرايل ليۆاننان اسكەرىن شىعارۋ ءۇشىن قوسىمشا 30 كۇن سۇرادى

استانا. KAZINFORM - سوڭعى اپتالاردا يزرايل ليۆان ارمياسى شەكارالىق ايماقتا تىم باياۋ ورنالاسىپ جاتىر دەگەن قورىتىندىعا كەلدى. بۇل يزرايل اسكەرىن ليۆاننان شىعارىلۋىن كەشىكتىرىپ، «حەزبوللاعا» قايتا كۇش جيناۋعا مۇمكىندىك بەرۋى ىقتيمال، دەپ حابارلايدى Kazinform.

يزرايل امەريكا قۇراما شتاتتارىنان ليۆاننىڭ وڭتۇستىگىنەن اسكەرلەرىن شىعارۋ ءۇشىن قوسىمشا 30 كۇن سۇراعان. بۇل حەزبوللامەن اتىستى توقتاتۋ كەلىسىمىندە بەلگىلەنگەن 60 كۇندىك مەرزىمنەن اسىپ كەتەدى.

2024 -جىلدىڭ 27 -قاراشاسىنداعى اتىستى توقتاتۋ كەلىسىمىنىڭ شارتتارىنا سايكەس، يزرايل قورعانىس كۇشتەرى (ساحال) 26-قاڭتارعا دەيىن ليۆاننىڭ وڭتۇستىگىندەگى بارلىق پوزيتسيالارىن ليۆان قارۋلى كۇشتەرىنە تاپسىرۋى كەرەك.

امەريكا قۇراما شتاتتارى جانە فرانسيا دەلدالدىعىمەن جاسالعان كەلىسىم يزرايل اسكەرلەرىنىڭ ليۆاننىڭ وڭتۇستىگىنەن كەتۋىن جانە حەزبوللادان سودىرلار مەن قارۋ-جاراقتاردى ايماقتان شىعارۋدى تالاپ ەتەدى. ونىڭ ورنىنا ليۆان اسكەرلەرى شەكارالىق ايماققا ورنالاستىرىلۋى كەرەك.

الايدا يزرايل ليۆانداعى حەزبوللا توبى كەلىسىمشارتتارىن ورىنداۋعا اسىقپاي جاتقانىن ايتىپ شاعىمدانۋدا جانە بۇل تۇرعىدا ناقتى پروگرەسس كەرەك دەپ سانايدى.

ساحال ليۆاننىڭ وڭتۇستىگىندە ارەكەت ەتەتىن يزرايلدىك ساربازدار بۇگىنگى كۇنگە دەيىن حەزبوللاعا تيەسىلى قارۋلار مەن ينفراقۇرىلىمداردى انىقتاپ جاتقانىن ايتتى.

يزرايلدىڭ Haaretz daily گازەتى ا ق ش پەن فرانسيا يزرايل جانە ليۆان شەنەۋنىكتەرى سۇراعان ۇزارتۋدى تالقىلاپ جاتقانىن حابارلادى. ەگەر باسقا تاراپتار كەلىسسە، فرانسيا كەلىسىمدى ۇزارتۋدا ەشقانداي پروبلەما كورمەيتىنىن مالىمدەگەن.

وعان جاۋاپ رەتىندە حەزبوللا بارلىق تاراپتى، سونىڭ ىشىندە ليۆان بيلىگىن دە، جەكسەنبى، 26-قاڭتاردا 60 كۇندىك اتىستى توقتاتۋ كەلىسىمى اياقتالعان سوڭ ساحال- عا قىسىم كورسەتىپ، يزرايل اسكەرلەرىنىڭ شىعارىلۋىن تالاپ ەتۋگە شاقىردى.

حەزبوللا «ەگەر يزرايل ليۆاننىڭ وڭتۇستىگىندە 60 كۇننەن ارتىق قالسا، مۇنى كەلىسىمدى ورەسكەل بۇزۋ جانە ليۆاننىڭ ەگەمەندىگىنە جاسالعان شابۋىل دەپ سانايتىنىن» مالىمدەگەن.

يزرايل كەلىسىم كۇنى ۇزارۋىنان ءۇمىتتى، سول ءۇشىن دە ءالى ليۆاننان اسكەرىن شىعارۋ تۋرالى شەشىم قابىلداماعان.

- يزرايل مەن حەزبوللا كەلىسىمى 1,2 ميلليوننان استام ادامدى ءوز ءۇيىن تاستاپ، بوسقىنعا اينالدىرعان، 3500-دەن استام ادامنىڭ ءومىرىن قيعان يزرايلدىڭ ليۆانعا قۇرلىقتان شابۋىلىنا نۇكتە قويدى، - دەپ حابارلايدى ليۆان دەنساۋلىق ساقتاۋ مينيسترلىگى.

سونىمەن قاتار، قازىرگى تاڭدا يزرايل مەن حاماس ورتاسىندا گازا سەكتورىنداعى اتىستى توقتاتۋ كەلىسىمى ءوز جالعاسىن تاۋىپ جاتىر.

قوسا كەتەيىك، يزرايل دەلەگاتسياسى گازاداعى اتىستى توقتاتۋ كەلىسىمىنىڭ ەكىنشى كەزەڭىن جالعاستىرۋ ءۇشىن كايرگە كەلدى.

تاراپتار قازىردىڭ وزىندە العاشقى كەپىلدەرىن تۇتقىندارعا ايىرباستاپ ۇلگەردى.

يزرايل 90 پالەستينالىق تۇتقىندى بوساتتى.

ال گازا سەكتورىنىڭ تۇرعىندارى ۇيىندىلەردى تازارتىپ، تۋىستارىنىڭ مايىتتەرىن شىعارۋعا تىرىسىپ جاتىر.

يزرايل باتىس جاعالاۋىنداعى دجەنين قالاسىندا لاڭكەستىككە قارسى وپەراتسياسىن جالعاستىرۋدا.

اۆتور

جاراسقان نۇرىبايەۆ