يزرايل حاماس- پەن دوحا كەلىسىمىنە قول قويعانىن راستادى
استانا. KAZINFORM - يزرايل پرەمەر- ءمينيسترىنىڭ كەڭسەسى دەلەگاتسيالار دوحاداعى كەلىسسوزدەر كەزىندە اتىستى توقتاتۋ تۋرالى كەلىسىمگە قول قويعانىن رەسمي تۇردە راستادى، دەپ حابارلايدى ВВС.

پرەمەر- مينيستر نەتانياحۋ كەڭسەسىنىڭ حابارلاۋىنشا، يزرايل ۇكىمەتى كەلىسىمدى تالقىلاپ، ونى سەنبىدەن ەرتە ەمەس بەكىتە الادى.
نەتانياحۋ كەڭسەسى بۇعان دەيىن حاماس سوڭعى ساتتە ءبىرقاتار كەلىسىمدەردەن باس تارتىپ، كەلىسىمگە جاڭا تارماقتار ەنگىزۋگە تىرىسقانى سەبەبىمەن يزرايل ۇكىمەتى حاماس- پەن اتىستى توقتاتۋ كەلىسىمىن ماقۇلداۋ ءۇشىن داۋىس بەرە المايتىنىن مالىمدەدى.
يزرايلدىڭ رۇقساتىنسىز كەلىسىم كۇشىنە ەنبەيدى. پرەمەر جۇما كۇنى كەلىسىم بويىنشا داۋىس بەرۋ ءۇشىن اسكەري كابينەتىن جينايدى.
دەگەنمەن، حاماس- پەن كەلىسىمدى ۇكىمەتتىڭ تولىق قۇرامى ماقۇلداۋى كەرەك، ال نەتانياحۋدىڭ باسپا ءسوز قىزمەتىنىڭ حابارلاۋىنشا، ولار سەنبى كەشىنەن ەرتە كەزدەسە المايدى.
- مامىلەگە قارسىلىق بىلدىرگەندەرگە جوعارعى سوتقا ءوتىنىش جازۋ ءۇشىن 24 ساعات ۋاقىت بەرۋ كەرەك، ال جۇما كۇنگى كۇندىزگى سەسسيادان كەيىن ولاردىڭ ۋاقىتى جەتپەيدى، ويتكەنى كوپشىلىگى ءدىندار جانە شاببات ساقتايدى، - دەپ كەلتىردى Times of Israel نەتانياحۋ باسپا ءسوز قىزمەتىنىڭ تۇسىنىكتەمەسىن.
يزرايل مەن حاماس اراسىندا كاتارداعى كەلىسسوزدەر كەزىندە قول جەتكىزىلگەن كەلىسىم تۋرالى حابار قاقتىعىستىڭ ەكى جاعىندا دا قاتتى رەاكسيا تۋدىردى. بۇل جاڭالىقتى يزرايل مەن گازا سەكتورىندا قالاي قابىلداعانىن Kazinform اگەنتتىگىنىڭ ءتىلشىسى باياندادى.
اۆتور
زارينا تۋعانبايەۆا