يزرايل ءمينيسترى ەۆرەيلەردى گازاعا قونىستاندىرۋعا شاقىردى

استانا. KAZINFORM - يزرايلدىڭ تۇرعىن ءۇي ءمينيسترى يتسحاك گولدكنوپف باسىپ الىنعان گازا سەكتورىنا ەۆرەيلەردى قونىستاندىرۋعا شاقىردى. بۇل تۋرالى انادولى جازدى.

يزرايلدىك ب ا ق-تىڭ حابارلاۋىنشا، گولدكنوپف گازا شەكاراسىندا «ناحالوت» ۇيىمىنىڭ نەگىزىن قالاۋشى دانيەلا ۆايسپەن كەزدەسۋ وتكىزدى. ول باسىپ الىنعان پالەستينا اۋماقتارىندا - باتىس جاعالاۋدا، شىعىس يەرۋساليمدە، گولان بيىكتەرىندە جانە گازادا يزرايلدىك ەلدى مەكەندەردى قۇرۋدى قولداۋىمەن تانىمال.

كەزدەسۋ بارىسىندا ۆايس جانە ونىڭ سەرىكتەستەرى مينيسترگە گازا سەكتورىنىڭ ءارتۇرلى ايماقتارىندا ەۆرەيلەردى ورنالاستىرۋ ءۇشىن ەلدى مەكەندەر سالۋ جوسپارلانعان ايماقتاردى كورسەتەتىن كارتانى تابىس ەتكەن.

الەۋمەتتىك جەلىدەگى مالىمدەمەسىندە گولدكنوپف ەۆرەيلەردى گازاعا قونىستاندىرۋ 7 -قازانداعى وقيعالارعا، سونداي-اق حالىقارالىق قىلمىستىق سوتتىڭ پرەمەر-مينيستر بەنيامين نەتانياحۋ مەن بۇرىنعى قورعانىس ءمينيسترى يواۆ گالانتتى تۇتقىنداۋ وردەرىنە «جاۋاپ» بولاتىنىن اتاپ ءوتتى.

بۇعان دەيىن وسىنداي ۇسىنىستى ۇلتتىق قاۋىپسىزدىك ءمينيسترى يتامار بەن-گۆير مەن قارجى ءمينيسترى بەتسالەل سموتريچ جاساعان بولاتىن، ولار دا يزرايل ۇكىمەتىندەگى اسىرە وڭشىل قاناتتىڭ وكىلى.

ايتا كەتەيىك، يزرايل حالىقارالىق قىلمىستىق سوتتىڭ شەشىمىنە قارسى شاعىم ءتۇسىردى.

گازا سەكتورىندا مەرت بولعان ادامدار سانى 44 مىڭنان استى.

اۆتور

جاراسقان نۇرىبايەۆ