يپوتەكالىق نەسيەنىڭ پايىزدىق مولشەرلەمەسى وزگەرە مە - ساراپشىلار پىكىرى

الماتى. KAZINFORM - جاڭا سالىق كودەكسىنىڭ جوباسىنا سايكەس، ەلدەگى بانكتەرگە كورپوراتيۆتىك تابىس سالىعىن 25 پايىزعا دەيىن كوتەرۋ ۇسىنىلىپ وتىر. بۇل يپوتەكا قۇنىنا قالاي اسەر ەتەدى؟

Kazinform ءتىلشىسى وسى ماسەلە بويىنشا ساراپشىلارعا جۇگىندى.

باسپانا باعاسىنا قاتىستى بولجامدار قانداي؟

ەلىمىزدەگى بارلىق يپوتەكانىڭ 50 پايىزعا جۋىعى «وتباسى بانكى» ارقىلى بەرىلسە، قالعانى ەكىنشى دەڭگەيلى بانكتەر ارقىلى جۇزەگە اسادى.

- يپوتەكا مولشەرلەمەسىنىڭ ىقتيمال وسۋىنە كەلەتىن بولساق، «وتباسى بانكى» ۇسىناتىن نارىقتىڭ جارتىسى تۇراقتى ايماقتا قالۋى ابدەن مۇمكىن. مەن بۇل سەگمەنتتە پايىزدىق مولشەرلەمەنىڭ وسۋىنە ەشقانداي العىشارتتاردى كورىپ تۇرعان جوقپىن. مەملەكەت نارىقتىق جانە سۋبسيديالاناتىن مولشەرلەمەلەر اراسىنداعى ايىرماشىلىقتى وتەيدى جانە بانكتىڭ بارلىق باعدارلامالارى قۇنى 30-35 ميلليون تەڭگەگە دەيىنگى قولجەتىمدى باسپاناعا باعىتتالعان، - دەيدى Arbat Real Estate جىلجىمايتىن مۇلىك اگەنتتىگىنىڭ باسقارۋشى ديرەكتورى ۆيتالي شالايەۆ.

كوممەرتسيالىق بانكتەرگە كەلەر بولساق، ساراپشى جاعداي ءاربىر قارجى ينستيتۋتىنىڭ ىشكى ساياساتىنا بايلانىستى بولاتىنىن ايتادى.

- قازىر ورتاشا كورسەتكىش 20- 21 پايىزدى كورسەتىپ وتىر، ءتىپتى 1,5- 2 پايىزدىق تارماققا وسسە دە نارىققا ايتارلىقتاي قاۋىپ توندىرمەيدى. مۇنداي بانكتەردىڭ كليەنتتەرى - ادەتتە تۇراقتى تابىسى بار قارىز الۋشىلار، سوندىقتان جۇكتەمەنىڭ شامالى ءوسۋى ولاردىڭ تولەم قابىلەتىنە اسەر ەتپەيدى، - دەيدى ول.

جىلجىمايتىن مۇلىك جونىندەگى ساراپشى جاني تۇرىسوۆ 2025 -جىلى باسپانا باعاسى 10 پايىزعا دەيىن كوتەرىلۋى مۇمكىن دەپ سانايدى. ول مۇنى ينفلياتسيامەن، مۇناي باعاسىنىڭ تومەندەۋىمەن جانە قۇرىلىس قۇنىنىڭ جالپى وسۋىمەن بايلانىستىرىپ وتىر.

- كورپوراتيۆتىك تابىس سالىعى كوتەرىلۋىنىڭ بانكتەرگە تيگىزەتىن اسەرىنە كەلسەك، مەنىڭ ويىمشا، تۇتىنۋشى كۇرت وزگەرىستەردى بايقامايدى. ءاربىر بانك ىشكى ستراتەگيالارعا سايكەس ءوز قارقىنىمەن بەيىمدەلەدى، - دەدى ساراپشى.

جىلجىمايتىن مۇلىك نارىعى قۇلدىراۋى مۇمكىن بە؟

ۆيتالي شالايەۆتىڭ ايتۋىنشا، اۋىتقۋلارعا قاراماستان جىلجىمايتىن مۇلىك نارىعى قالىپتى بەلسەندىلىكتى ساقتاپ وتىر.

— 2025 -جىلدىڭ ءبىرىنشى توقسانىندا ساتىلىم 20-30 پايىزعا تومەندەگەن. دەگەنمەن، بۇل ماۋسىمدىق قۇلدىراۋعا بايلانىستى — قاڭتار ءداستۇرلى تۇردە ءالسىز اي. 2024 -جىلدىڭ باسىمەن سالىستىرعاندا سۇرانىس ايتارلىقتاي وسكەن جوق. مۇنىڭ سەبەبى ينفلياتسيا فونىندا ساتىپ الۋ قابىلەتىنىڭ تومەندەۋى جانە قىزمەتتەر مەن ونىمدەر باعاسىنىڭ ءوسۋى بولىپ قالا بەرەدى، — دەيدى مامان.

ول سونداي-اق مىناداي ستاتيستيكانى كەلتىردى: ءۇش جىل ىشىندە «وتباسى بانكتىڭ» يپوتەكالىق نەسيە نارىعىنداعى ۇلەسى %66- دان %53- عا دەيىن تومەندەگەن. بۇل حالىقتىڭ باسىم بولىگىنىڭ قارجىلىق مۇمكىندىكتەرىنىڭ ازايعانىن كورسەتەدى.

ۆيتالي شالايەۆتىڭ بولجاۋىنشا، 2025 -جىلدىڭ سوڭىنا قاراي نارىق وتكەن جىلمەن سالىستىرعاندا شامامەن %5- عا وسەدى. «وتباسا بانك» قاتىساتىن سەگمەنت قولجەتىمدى مولشەرلەمە جانە ۇنەمدى تۇرعىن ۇيگە باعىتتالعاندىقتان تۇراقتى بولادى.

— دەگەنمەن، ەكىنشى دەڭگەيلى بانكتەردە بەلسەندىلىك %5-10- عا تومەندەۋى مۇمكىن، — دەيدى ول.

ساراپشى جاني تۇرىسوۆتىڭ سوزىنشە، سالىق اۋىرتپالىعى ارتقاننىڭ وزىندە قازاقستانداعى جىلجىمايتىن مۇلىك نارىعى توقىراۋعا ۇشىرامايدى. ونىڭ ايتۋىنشا، قازىرگى نارىق 30 جىل بۇرىنعىدان الشاق: ول جەتىلگەن، تۇراقتى جانە قۇرىلىمدى بولدى.

- قازىر سالادا جۇيەلى قۇرىلىس سالۋشىلار جۇمىس ىستەيدى، باسەكەگە قابىلەتتى يپوتەكالىق ونىمدەرى بار دامىعان بانكتىك ينفراقۇرىلىم بار. سونىمەن قاتار، ۋربانيزاتسيا سۇرانىستى قولداۋدى جالعاستىرىپ جاتىر، — دەپ اتاپ ءوتتى تۇرىسوۆ.

سونداي- اق ساراپشى قازاقستاننىڭ تۇرعىن ءۇي نارىعى جالپى العاندا، اسىرەسە ءبىلىمدى جانە بەلسەندى حالىق ءۇشىن قولجەتىمدى بولىپ قالا بەرەتىنىن اتاپ ءوتتى.

— جىلجىمايتىن مۇلىك ساتىپ الۋ الەمنىڭ كەز كەلگەن ەلىندە كۇردەلى ماسەلە. مەن ا ق ش نەمەسە ەۋروپا نارىعىن يدەاليزاتسيالاماس ەدىم. قازاقستاندا باسپانا العىسى كەلەتىندەردىڭ ءالى دە مۇمكىندىگى بار. مەن حالىقتىڭ وسال توپتارىنا كوڭىل بولۋگە شاقىرار ەدىم، — دەيدى سپيكەر.

ۆيتالي شالايەۆ بۇل پىكىردى قولداپ، «وتباسى بانكىنىڭ» قولجەتىمدى نەسيە بەرۋدەگى ءرولىن ەرەكشە اتاپ ءوتتى.

— ارنايى باعدارلامالاردىڭ ارقاسىندا 20-25 ميلليون تەڭگە نەسيەنىڭ اي سايىنعى تولەمى - 170-260 مىڭ تەڭگە. بۇل - وتباسى ءۇشىن ايتارلىقتاي اۋىرتپالىق، ءبىراق قولجەتىمدى بىرنەشە نۇسقانىڭ ءبىرى بولىپ قالا بەرەدى، - دەيدى ول.

ەسكە سالايىق، ءماجىلىس سالىق كودەكسىنىڭ جاڭا جوباسىن ءبىرىنشى وقىلىمدا ماقۇلداعان بولاتىن.

اۆتور

الما مۇقانوۆا