ۆيتسە-مينيستر قۇتقارۋشىنىڭ قالاي پىشاقتالعانىن ايتتى

استانا. KAZINFORM - توتەنشە جاعدايلار ۆيتسە-ءمينيسترى باۋىرجان سىزدىقوۆ باتىس قازاقستان وبلىسىندا قۇتقارۋشىنىڭ پىشاقتالۋىنا بايلانىستى ءوز نۇسقاسىن ايتتى.

«وكىنىشكە قاراي، حالىقتىڭ ىشىندە كومەككە كەلگەن قۇتقارۋشىلاردىڭ ارقاسىنا پىشاق قادايتىن ادامدار بار بولىپ شىقتى. بۇل قالاي بولدى؟ باتىس قازاقستان وبلىسىندا ءبىزدىڭ ەكى قۇتقارۋشى وزەن جاعاسىنا بارىپ، ادامداردى جاعانىڭ ەكىنشى جاعىنا قايىقپەن باعىتتاپ تۇرعان. ولارعا ەكى جەرگىلىكتى تۇرعىن جاقىنداپ، ىلىك ىزدەي باستاعان. اۋپىرىمدەپ ىمىراعا كەلگەننەن كەيىن، الگى ەكەۋ كەتىپ بارا جاتىپ قۇتقارۋشىلاردىڭ بۇل جاقتا قانشا ۋاقىت بولاتىندارىن سۇرايدى. ء«بىز بۇل جەردە اپتانىڭ جەتى كۇنىندە، تاۋلىكتىڭ 24 ساعاتىندا وسى جەردە بولامىز»، - دەپ جاۋاپ بەرەدى. كەشكە الگى ەكەۋ ءىشىپ الىپ، ماس كۇيىندە قايتا كەلەدى دە توبەلەس باستاپ كەتەدى. وسى كەزدە بىرەۋى پىشاق سۇعىپ الادى»، - دەدى ول.

باۋىرجان سىزدىقوۆ زارداپ شەككەن قۇتقارۋشىنىڭ جاعدايىنا دا توقتالدى.

«قۇدايعا شۇكىر، قازىر قىزمەتكەرىمىز اۋرۋحانادا جاتىر. جاعدايى تۇراقتى. دارىگەرلەر جاقسى بولىپ كەتەدى دەپ وتىر. زاڭ بۇزعاندار ۇستالدى. ولار كىنالارىن مويىندادى جانە اۋرۋحانادا جاتىر»، - دەدى ۆيتسە-مينيستر.

ەسكە سالساق، باتىس قازاقستان وبلىسى كازتالوۆ اۋدانىندا سۋ تاسقىنىنان زارداپ شەككەن تۇرعىندارعا كومەكتەسۋگە بارعان قۇتقارۋشى پىشاق جاراقاتىن الدى.

پوليتسەيلەر توتەنشە جاعدايلار ءبولىمىنىڭ قىزمەتكەرىن پىشاقپەن جاراقاتتاعان كازتالوۆ اۋدانى جالپاقتال اۋىلىنىڭ تۇرعىنىن ۇستادى.

جاراقاتتانعان قۇتقارۋشى ازاماتتىق قورعاۋ ورگانىندا 2021 -جىلدان بەرى، ال جالپاقتال اۋىلىنداعى №17 ءورت ءسوندىرۋ بەكەتىنىڭ بولىمشە كومانديرى لاۋازىمىندا 2023 -جىلدان بەرى قىزمەت اتقارىپ كەلەدى.

اۆتور

ەسىمجان ناقتىباي