ينتەرنەتتىڭ ءۇش ايعا وشەتىنى راس پا: ماماندار ءتۇسىندىردى

مۇنداي جازبالاردىڭ اۆتورلارى جاپپاي حاكەرلىك شابۋىلدار جاسالىپ، بانك جۇيەلەرى بۇزىلۋى مۇمكىن ەكەنىن، سونىڭ سالدارىنان شوتتارداعى اقشا جوعالۋى ىقتيمال ەكەنىن ەسكەرتەدى. وسىعان بايلانىستى تۇرعىندارعا ازىق-تۇلىك، اۋىزسۋ جانە قولما-قول اقشا جيناپ قويۋعا كەڭەس بەرگەن.

توتەنشە جاعدايلار مينيسترلىگى مۇنداي قاۋىپ تۋرالى ەشقانداي ەسكەرتۋ تاراتپاعانىن مالىمدەدى.

ال كيبەرشابۋىلداردى تالداۋ جانە تەرگەۋ ورتالىعى ءارتۇرلى دەڭگەيدەگى كيبەرقاۋىپتەر ۇنەمى بولاتىنىن اتاپ ءوتتى. الايدا 17 -قاراشادا ينتەرنەت وشىرىلەدى دەگەن اقپارات رەسمي دەرەككوزدەر ارقىلى راستالماعان.

— بىزدىڭشە، بۇل — الەۋمەتتىك جەلىلەردە ءىلىپ اكەتىپ، كەڭىنەن تاراتىپ جىبەرگەن كەزەكتى كونسپيرولوگيالىق حابارلاما، — دەيدى ماماندار.

ورتالىق ماماندارى ينتەرنەت، سەرۆەرلىك ينفراقۇرىلىم، بايلانىس جانە بانك جۇيەلەرى ءبىر عانا «تەتىكتەن» باسقارىلاتىن ورتاق جۇيە ەمەس ەكەنىن ءتۇسىندىردى. ولاردىڭ ءارقايسىسى كوپتەگەن وپەراتورلار مەن ۇيىمداردىڭ جەلىسىنە بولىنگەن.

سوندىقتان ءبىر جۇيەدە اقاۋ پايدا بولۋى نەمەسە وعان شابۋىل جاسالۋى قالعان جۇيەلەردىڭ ءبارى اۆتوماتتى تۇردە ىستەن شىعادى دەگەندى بىلدىرمەيدى. جەكەلەگەن اۋقىمدى نەمەسە ۋاقىتشا شەكتەۋلەر بولۋى مۇمكىن. الايدا بارلىق جۇيەنىڭ ءبىر مەزەتتە تولىق ءوشۋى — وتە كۇردەلى ءارى ىقتيمالدىعى تومەن سسەناري.

مامانداردىڭ ايتۋىنشا، مۇنداي اقپاراتتىق ارانداتۋلار الەۋمەتتىك جەلىلەردە قارالىم جيناۋ ءۇشىن تاراتىلۋى مۇمكىن. كەي جاعدايدا ونىڭ ماقساتى — حالىق اراسىندا دۇربەلەڭ تۋعىزۋ نەمەسە قولدانۋشىلاردى الاياقتىق سحەمالارعا تارتۋ.

كيبەرشابۋىلداردى تالداۋ جانە تەرگەۋ ورتالىعى وكىلدەرى وسىنداي اقپاراتتى بەلگىسىز اۆتورلاردىڭ جازبالارىنا سەنىپ قابىلداماي، ءتيىستى مەملەكەتتىك ورگانداردىڭ، كومپانيالار مەن باسقا دا ۇيىمداردىڭ رەسمي ارنالارى ارقىلى تەكسەرۋگە كەڭەس بەرەدى. اسىرەسە، جازبا كوپ قارالىم مەن پىكىر جيناعان جاعدايدا دا اقپاراتتىڭ راس- وتىرىگىن انىقتاعان ءجون.