ينتەرنەت-الاياقتىققا قاتىسى بار قىتايدىڭ 13 ازاماتى ەلدەن شىعارىلدى
استانا. KAZINFORM- ۇلتتىق قاۋىپسىزدىك كوميتەتى زاڭسىز كوشى-قونعا قارسى كۇرەس اياسىندا قازاقستاننىڭ كوشى-قون زاڭناماسىن بۇزا وتىرىپ ەلدە جۇرگەن قىتايدىڭ 13 ازاماتىن انىقتاپ، ۇستادى. 2026 -جىلعى 16-قازاندا ولار اكىمشىلىك تارتىپپەن قازاقستان اۋماعىنان شىعارىلىپ، ودان ءارى تەرگەپ-تەكسەرۋ جۇرگىزۋ ءۇشىن قىتايدىڭ ۋاكىلەتتى ورگاندارىنا تاپسىرىلدى.
ق ر ۇلتتىق قاۋىپسىزدىك كوميتەتى باسپا ءسوز قىزمەتىنىڭ حابارلاۋىنشا، تەكسەرۋ بارىسىندا شەتەلدىكتەردىڭ قازاقستان اۋماعىندا حالىقارالىق ينتەرنەت-الاياقتىقتىڭ جاسىرىن سحەماسىن ۇيىمداستىرعانى انىقتالدى. ولاردان كوپتەگەن كومپيۋتەرلىك تەحنيكا، ۇيالى تەلەفوندار، «Starlink» سپۋتنيكتىك ينتەرنەت بايلانىسى جابدىقتارىنىڭ جيىنتىقتارى، سونداي-اق كريپتواميانداردا ساقتالعان ءىرى كولەمدەگى قاراجات تابىلدى.
توپتىڭ ارەكەتتەرى قازاقستان رەزيدەنتتەرى بولىپ تابىلمايتىن وزگە ەلدەردىڭ ازاماتتارىنا قارسى باعىتتالعان جانە شەتەلدەن ۇيلەستىرىلىپ وتىرعان.
- وسىعان بايلانىستى ودان ءارى تەكسەرۋ قىتاي حالىق رەسپۋبليكاسىنىڭ قوعامدىق قاۋىپسىزدىك مينيسترلىگىندەگى ارىپتەستەرمەن بىرلەسىپ جۇرگىزىلدى. تەكسەرۋ ناتيجەسىندە ۇستالعانداردىڭ كەيبىرى ءوز ەلىندە وسىعان ۇقساس ارەكەتتەرى ءۇشىن ىزدەۋدە جۇرگەنى انىقتالدى، - دەلىنگەن حابارلامادا.
