پيتەر فوستەر Flyarystan بيلەتى قۇنىنا قاتىستى پىكىر ءبىلدىردى

استانا. قازاقپارات - Flyarystan بيلەتتەرىنىڭ باعاسى وزگە ەلدەردىڭ اۋە كومپانيالارىمەن سالىستىرعاندا باسەكەگە قابىلەتتى. بۇل تۋرالى ماجىلىستەگى ەلدىڭ كولىك-لوگيستيكالىق الەۋەتىن دامىتۋعا ارنالعان ۇكىمەت ساعاتىندا «ەير استانا» توبىنىڭ باسشىسى پيتەر فوستەر ايتتى.

- ەڭ الدىمەن Air Astana كومپانيالار توبى مونوپوليست ەمەستىگىن اتاپ وتكىم كەلەدى. ويتكەنى، 2011 -جىلدان بەرى ىشكى مونوپوليا جويىلدى. قازىر ليتسەنزيالانعان 4 كومپانيا جۇمىس ىستەيدى.

ولار: Air Astana group-قا كىرەتىن Air Astana مەن Flyarystan سونىمەن قاتار Scat پەن Qazaq air. ەندىگى ۋاقىتتا ىشكى دە، حالىقارالىق رەيستەردە دە مونوپوليا جوق.  FlyArystan  وسى جىلدىڭ قاراشاسىنا دەيىن 4,1 ميلليون جولاۋشى، ونىڭ ىشىندە ىشكى باعىتتا شامامەن 3,8 ميلليون، حالىقارالىق باعىتتا 270 مىڭ جولاۋشى تاسىمالدادى. Air Astana-عا قاراعاندا Flyarystan ىشكى نارىقتاعى الدەقايدا ءىرى وپەراتور سانالادى. سەبەبى Air Astana قازىرگى ۋاقىتتا نەگىزىنەن حالىقارالىق باعىتتاردى دامىتۋعا باسىمدىق بەرەدى، - دەدى ول ءماجىلىس دەپۋتاتتارىنىڭ ساۋالىنا وراي.

سونىمەن قاتار ول ۇشاق بيلەتى باعاسىنا قاتىستى ماسەلەگە توقتالدى.

- بيلەتتى ەرتەرەك الساڭ، سوعان وراي ارزان بولادى. بيلەت باعاسى سۇرانىسقا دا اسا بايلانىستى. سول سەبەپتى دەمالىس جانە مەرەكە كۇندەرى باعا جوعارى بولادى. بۇل سالاداعى ديناميكالىق باعا قالىپتاسۋعا بايلانىستى ءارى الەمدىك تاجىريبە، - دەدى پيتەر فوستەر.

ول كومپانيانىڭ بارلىق شىعىستارى نەگىزىنەن دوللارمەن جۇمسالاتىندىعىن اتاپ ءوتتى.

- ادەتتە اۋە كومپانياسىنىڭ بارلىق شىعىستارىنىڭ 66,6 پايىزى دوللارمەن ەسەپتەلەدى. ول - نەگىزىنەن ۇشاققا بايلانىستى شىعىستار. ارينە، كوۆيد كەزىندە سالادا كەدەرگىلەر بولدى. سونداي-اق وندىرۋشىلەر ءۇشىن جەتكىزىلىم تىزبەگىندە دە پروبلەمالار بولدى. دەگەنمەن، جەرگىلىكتى اۋە كومپانياسى رەتىندە Flyarystan رەيستەرىنىڭ ورتاشا باعاسى وزگە ەلدەردىڭ اۋە كومپانيالارى رەيستەرىنىڭ باعاسىمەن سالىستىرعاندا ءبىرشاما باسەكەگە قابىلەتتى دەپ سانايمىز، - دەدى كومپانيا باسشىسى.

بۇعان دەيىن ءماجىلىس دەپۋتات ەدىل جاڭبىرشين Air Astana اۋە كومپانياسىنىڭ قىزمەتىن سىنعا العانىن جازعان ەدىك.

مارلان جيەمباي

اۆتور