يتاليان تىلىنەن اۋدارىلعان «مىڭ عاجايىپ. يتالياعا ساياحات» كىتابى وقىرمانعا جول تارتتى
استانا. KAZINFORM - بۇگىن استاناداعى كىتاپ كورمەسى اياسىندا يتاليان تىلىنەن اۋدارىلعان قىزىقتى، شىتىرمان وقيعالارعا تولى «مىڭ عاجايىپ. يتالياعا ساياحات» كىتابىنىڭ تۇساۋكەسەرى ءوتتى.
اتالعان جوبا يتاليا مادەنيەت ينستيتۋتىنىڭ باستاماسىمەن جانە يتاليانىڭ استاناداعى ەلشىلىگىنىڭ قولداۋىمەن جۇزەگە اسقان. جاڭا كىتاپ رۋسلان ءادىلدىڭ اۋدارماسىمەن Steppe&World باسپاسىنان جارىق كورگەن.
«وسىعان دەيىن الەمنىڭ كوپتەگەن تىلدەرىنە اۋدارىلعان بۇل كىتاپتا جەرونيمو اتتى تىشقاننىڭ شتىرمانعا تولى وقيعالارى تۋرالى باياندالادى. وندا يتاليانىڭ ەڭ قىزىقتى جەرلەرى تۋرالى ايتىلادى. «مىڭ عاجايىپ. يتالياعا ساياحات» جاي عانا كىتاپ ەمەس، ول ءسىزدى ءبىرىنشى بەتىنەن باستاپ باۋىراپ الىپ، سوڭعى نۇكتەسىنە دەيىن جىبەرمەي وزىمەن بىرگە قيال الەمىنە ساياحاتتاتادى»، - دەيدى Steppe&World باسپاسىنىڭ باس رەداكتورى، جازۋشى ىرىسبەك دابەي ۇلى.
قازاق تىلىندە جارىق كورگەن جاڭا كىتاپتىڭ تۇساۋكەسەرىنە ارنايى كەلىپ قاتىسقان يتاليا مادەني ينستيتۋتىنىڭ باسشىسى ەدۋاردو كريسافۋلي Steppe&World باسپاسىنىڭ ۇجىمى مەن اۋدارماشى رۋسلان ادىلدىگە العىسىن ايتىپ، شىعارمانىڭ قۇندىلىعى مەن ماڭىزىنا توقتالدى.
«اتالعان تۋىندى وسىعان دەيىن ەۋروپا ەلدەرىنىڭ كوپتەگەن تىلدەرىنە جانە اراب، ۋكراين تىلدەرىنە اۋدارىلعان. ەندى وسى جولى قازاق تىلىنە دە ساپالى، جاقسى اۋدارىلىپ، وقىرماندارىن قۋانتاتىنىنا سەنىمدىمىن. شىعارما يتاليان تىلىندە اسا كوركەم جازىلعان. بالالارعا ارنالعان ادەبيەت ءاربىر ۇلت ءۇشىن وتە ماڭىزدى قۇندىلىق! سوندىقتان وسى شىتىرمان وقيعالارعا تولى تۋىندىنى اتا-انالار بالالارىمەن بىرگە وقۋىنا بولادى. الداعى ۋاقىتتا دا بۇل «يتالياندىق تىشقان» الەمدى ساياحاتتاۋىن جالعاستىرا بەرمەك. ءبىزدىڭ جەرونيمو وركەنيەتتى ەلدەن شىققان «مادەنيەتى جوعارى» تىشقان دەپ تۇسىنىڭىزدەر»، - دەگەن ەدۋاردو كريسافۋلي مىرزا ءسوزىنىڭ سوڭىن جاراسىمدى ازىلمەن تۇيىندەدى.
ايتا كەتەيىك، SteppeWorl Steppe&World - الەمدىك بەستسەللەرلەردى قازاق تىلىنە اۋداراتىن وتاندىق باسپا. بۇل كىتاپتاردىڭ قاتارىندا حارري پوتتەردىڭ وقيعالار سەرياسى، نارنيا شەجىرەسى، سونداي-اق حارۋكي مۋراكامي مەن ەليف شافاكتىڭ كىتاپتارى بار.
اۆتور
باقىتجول كاكەش
