يتاليا يران ەلشىسىن س ءى م- نە شاقىرىپ، ۇستالعان جۋرناليستىڭ بوساتىلۋىن تالاپ ەتتى

استانا. KAZINFORM - سەسيليا سالا 19 -جەلتوقساندا تەگەراندا جۋرناليست بولىپ جۇمىس ىستەپ جۇرگەن كەزىندە قاماۋعا الىنعان.

بەيسەنبى كۇنى يتاليا سىرتقى ىستەر مينيسترلىگىنىڭ باس حاتشىسى ريككاردو گۋاريليا يران ەلشىسى موحامماد رەزا سابۋريمەن كەزدەسۋ بارىسىندا وتانداسىن تەز ارادا بوساتۋدى تالاپ ەتتى. بۇل تۋرالى ۆەدومستۆو مالىمدەمەسىندە حابارلانعان.

- ريكاردو گۋاريليا تەگەرانداعى ەلشىلىك قىزمەتكەرلەرىنە سالاعا بارۋعا رۇقسات بەرۋدى جانە وعان «وسى ۋاقىتقا دەيىن باس تارتىلعان نەگىزگى قاجەتتىلىكتەرمەن» قامتاماسىز ەتۋدى تالاپ ەتتى، - دەلىنگەن حابارلامادا.

29 جاستاعى سەسيليا سالا 19 -جەلتوقساندا ۇستالعان. شەتەلدىك جۋرناليستەردى اككرەديتتەيتىن يراننىڭ مادەنيەت مينيسترلىگى ونىڭ تۇتقىندالۋىنا «يران يسلام رەسپۋبليكاسىنىڭ زاڭدارىن بۇزۋ» سەبەپ بولعانىن ايتتى. مينيسترلىك بۇدان باسقا قوسىمشا اقپارات بەرمەگەن.

سالا يرانعا 13 -جەلتوقساندا جۋرناليستىك ۆيزامەن كەلگەن، ءبىراق التى كۇننەن كەيىن قاماۋعا الىنعان.

- بەيسەنبى كۇنگى مالىمدەمەدە يراننىڭ ريمدەگى ەلشىلىگى گۋاريليا مەن سابۋري «دوستىق كەزدەسۋدە» سەسيليا سالا ماسەلەسىن تالقىلاعانىن ايتتى. ولار سونداي-اق «جالعان ايىپپەن ميلاندا تۇرمەدە وتىرعان يران ازاماتى موحامماد ابەديني ماسەلەسىن دە قوزعادى، - دەلىنگەن ەلشىلىك مالىمدەمەسىندە.

38 جاستاعى يراندىق كاسىپكەر موحامماد ابەديني جەلتوقسان ايىندا ا ق ش بيلىگىنىڭ ءوتىنىشى بويىنشا ميلان اۋەجايىندا قاماۋعا الىنعان. ولار ونى ا ق ش سانكسيالارى تۋرالى زاڭداردى بۇزا وتىرىپ، يراندىق اسكەريلەرگە ۇشقىشسىز ۇشاقتاردىڭ ناۆيگاتسيالىق بولشەكتەرىن جەتكىزىپ بەردى دەپ ايىپتاعان.

ا ق ش- تىڭ قۇقىق قورعاۋ ورگاندارىنىڭ وكىلدەرىنىڭ ايتۋىنشا، ول بولشەكتەر قاڭتاردا سيريا شەكاراسىنا جاقىن ماڭداعى يوردانيالىق اسكەري بازاعا ۇشقىشسىز ۇشاقپەن جاسالعان سوققى كەزىندە قولدانىلىپ، ءۇش امەريكالىق اسكەري قازا تاپقان.

يران بۇل شابۋىلعا قاتىسى بارىن جوققا شىعاردى، ال سىرتقى ىستەر مينيسترلىگى ابەدينيدىڭ تۇتقىندالۋىن حالىقارالىق قۇقىقتى بۇزۋ دەپ اتادى.

قازىرگى ۋاقىتتا ابەديني يتالياندا تۇرمەدە وتىر.

بەيسەنبىدە يتاليا پرەمەر- ءمينيسترى دجوردجيا مەلوني سىرتقى ىستەر ءمينيسترى انتونيو تايانيمەن، ادىلەت ءمينيسترى كارلو نورديومەن جانە يتاليانىڭ بارلاۋ قىزمەتتەرىنىڭ باسشىلارىمەن سەسيليا سالانىڭ ءىسى بويىنشا كەزدەسۋ وتكىزدى.

جاراسقان نۇرىبايەۆ
اۆتور