ەگىستىكتى كيىكتەردەن قورعاۋ: ءتورت وبلىستا قوسىمشا ينسپەكتورلار الىنادى
استانا. KAZINFORM - كيىك سانىن رەتتەۋ ماسەلەسى كوتەرىلمەيدى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ءمالىم ەتتى.
بۇگىن سەناتتا ەكوجۇيەنى ۇتىمدى پايدالانۋ تاقىرىبىنداعى وتىرىستا دەپۋتات جانبولات جورگەنبايەۆ كيىك جانە ەگىس القاپتارى ماسەلەسىن كوتەردى.
- كيىك پوپۋلياتسياسىن رەتتەۋ ماسەلەسى بىرنەشە جىلدان بەرى كۇن تارتىبىندە تۇر. ونىڭ ەكونوميكالىق ءارى الەۋمەتتىك اسپەكتىسى دە وتە ماڭىزدى. اتاپ ايتقاندا، قازىر كيىكتىڭ پوپۋلياتسياسى اۋىل شارۋاشىلىعىمەن اينالىساتىن فەرمەرلەر مەن جەرگىلىكتى تۇرعىندار ءۇشىن بەلگىلى ءبىر قيىندىقتاردى تۋدىرىپ وتىر. سوندىقتان ناقتى شەشىم قابىلداۋ كەرەك. مينيسترلىك كيىك پوپۋلياتسياسىن تۇراقتى باسقارۋ جانە ونى ءتيىمدى پايدالانۋ ءۇشىن قانداي ناقتى شارا قابىلداپ جاتىر؟، - دەپ سۇرادى سەناتور.
ءوز كەزەگىندە ە. نىسانبايەۆ 2021 -جىلدان بەرى ۇكىمەتتىڭ ىسكە اسىرىپ جاتقان شارالارىنىڭ ارقاسىندا 4 ميلليوننان استام كيىك بار ەكەنىن ايتتى. وسىعان بايلانىستى ينسپەكتورلار سانى كوبەيتىلەدى.
- كيىك سانى وسكەن سايىن، كيىكتىڭ جايىلۋى تۇرعىسىندا ءبىراز ماسەلە پايدا بولدى. اسىرەسە، باتىس قازاقستان وبلىسىنداعى ەگىس القاپتارىن قورعاۋعا ەكپىن قويدىق. بيىل ماماندار سانىن كوبەيتىپ، باتىس قازاقستان، اقمولا، قاراعاندى جانە قوستاناي وبلىستارىنا قوسىمشا ينسپەكتورلار الىپ، اۋىل شارۋاشالىعى جەرلەرىن قورعاۋ جۇمىستارىنا نازار اۋدارامىز. بيىل كيىك سانىن رەتتەۋ ماسەلەسىن كوتەرمەيمىز، تەك ەگىس القاپتارىن قورعاۋمەن اينالىسامىز، - دەدى مينيستر.
ايتا كەتەيىك، 2023 -جىلى ەل اۋماعىندا 42 مىڭ باس كيىك اتىلدى.
مەملەكەت باسشىسىنىڭ تاپسىرماسىنا سايكەس كيىكتەردى اتۋعا تىيىم سالىندى.
بۇعان دەيىن ەرلان نىسانبايەۆ 2025 -جىلى كيىك سانى 4,5 ميلليون باستان اساتىنىن ايتقان ەدى.
سونىمەن قاتار، ەلدەگى ەگىن اۋماقتارىن كيىكتەردەن قورعاۋ ءۇشىن ءتيىستى شارالار جۇرگىزىلەدى.
بۇل تۇرعىدا قازاقستان كيىكتەردى جازدا كوشىرۋ ءۇشىن رەسەيمەن كەلىسسوز جۇرگىزىپ جاتقانى ءمالىم بولدى.
اۆتور
رۋسلان عابباسوۆ
