ىستانبۇل مەرى ەكرەم يماموگلۋ ارنايى وپەراتسيا كەزىندە ۇستالدى

استانا. KAZINFORM - تۇركيا پرەزيدەنتى رەجەپ تايىپ ەردوعاننىڭ باستى ساياسي قارسىلاسى ىستانبۇل قالاسىنىڭ مەرى ەكرەم يماموگلۋ مەن ونىڭ باسپا ءسوز كەڭەسشىسى مۇرات ونگۋن ارنايى وپەراتسيا كەزىندە تۇتقىندالىپ، سوتقا بەرىلدى.

ءىس بويىنشا بارلىعى 100 ادام كۇدىكتى رەتىندە تەرگەلۋدە. بۇل تۋرالى CNN Turk حابارلادى. بۇعان دەيىن ىستانبۇل مەرى ەكرەم يماموگلۋدى قاماۋعا الۋعا وردەر بەرىلگەنىن حابارلاعان ەدىك.

CNN Turk تەلەارناسى گۋبەرناتوردىڭ تۇتقىندالۋ سەبەبىن حابارلادى.

- ىستانبۇلدىڭ وپپوزيتسيالىق مەرى ەكرەم يماموگلۋ سىبايلاس جەمقورلىقپەن، پاراقورلىقپەن جانە بوپسالاۋمەن اينالىسقان ۇيىمعا قاتىسى بار دەگەن ايىپپەن قاماۋعا الىندى. ونىڭ ۇيىنە ءتىنتۋ جۇرگىزىلىپ، پوليتسيا كۇزەتىمەن سوت عيماراتىنا جەتكىزىلدى، - دەپ حابارلادى تەلەارنا.

پروكۋراتۋرا سونىمەن قاتار سىبايلاس جەمقورلىق، پارا الۋ، الاياقتىق جانە پاراقورلىق جاسادى دەگەن كۇدىككە ىلىنگەن 100 ادامدى تۇتقىنداۋعا، تىنتۋگە جانە ۇستاۋعا بۇيرىق بەرگەنىن حابارلادى.

سونداي-اق وسى اپتادا ىستانبۇل ۋنيۆەرسيتەتى يماموگلىنىڭ ديپلومىنىڭ زاڭسىز ەكەنىن انىقتاپ، ونى قايتارىپ الدى. قالالىق پروكۋراتۋرا بۇعان دەيىن ونىڭ ديپلومىنىڭ شىنايىلىعىن تەكسەرۋدى تالاپ ەتكەن بولاتىن.

ىستانبۇل مەرى وپپوزيتسيالىق رەسپۋبليكالىق حالىق پارتياسى وتكىزگەن ىشكى سايلاۋدا پرەزيدەنتتىككە جالعىز كانديدات بولىپ سايلانعان. ول الداعى پرەزيدەنتتىك سايلاۋدا بيلىك پارتياسىنىڭ كانديداتىنا باستى باسەكەلەس بولا الۋى مۇمكىن ەدى.

ەكرەم يماموگلۋ 2024 -جىلدىڭ ساۋىرىندە ىستانبۇل مەرى بولىپ قايتا سايلانعان. ول بۇعان دەيىن 5 جىل بويى قالانى باسقارعان.

ايتا كەتەيىك، تۇركيانىڭ باسقارۋشى پارتياسى ەلدە مەرزىمىنەن بۇرىن پرەزيدەنت سايلاۋىن وتكىزۋدى قاراستىرىپ جاتقانىن جازعان ەدىك.

اۆتور

جاراسقان نۇرىبايەۆ