يسپانيادا ءۇي ساتىپ العان شەتەلدىكتەر 100 پايىز سالىق تولەيدى
استانا. قازاقپارات - يسپانيادا جىلجىمايتىن مۇلىك ساتىپ العان شەتەلدىكتەر ءۇشىن 100 پايىز سالىق ەنگىزىلەدى، دەپ حابارلايدى 24kz.
قازىر ونىڭ مولشەرى %12- تەن اسپايدى. ءبىراق سالىقتان ەۋرووداققا مۇشە ەلدەردىڭ ازاماتتارى بوساتىلادى. بۇل تۇرعىن ءۇي داعدارىسىن ەڭسەرۋگە باعىتتالعان شارا. ويتكەنى شەتەلدىكتەر جىل سايىن 27 مىڭ جىلجىمايتىن مۇلىك نىسانىن ساتىپ الادى. اۋا رايى جىلى بولعاسىن، كوبى وسىندا ءوز ۇيىندە دەمالىعىسى كەلەدى. سودان باسپانا باعاسى شارىقتاپ، بۇدان جەرگىلىكتى تۇرعىندار وپىق جەپ وتىر.
جالپى كەيىنگى 10 جىلدا ەۋروپادا ۇيلەر شامامەن %50- كە قىمباتتاعان. اسىرەسە، يسپانياداعى جاعداي كۇردەلى. ەندى جەرگىلىكتى بيلىك ماسەلەنى شەشۋ ءۇشىن سالىقتى كوتەرۋدەن بولەك الەۋمەتتىك باسپانا سالۋ، جالعا بەرۋ ەرەجەلەرىن رەتتەۋ سەكىلدى شارالاردى قاراستىرىپ جاتىر.
