نەمىس قىزى باقاناس اۋىلىندا قازاق ءتىلىن وقىتادى

بۇل باعدارلامادا وزگە ۇلت وكىلدەرىنە قازاقشا ۇيرەتۋدىڭ ەرەكشەلىكتەرى ەسكەرىلگەن، دەپ حابارلايدى 24KZ.

الينا كان مەكتەپتە ورىس تىلىندە ءبىلىم الادى. الايدا قازاق تىلىنەن ساباق بەرەتىن ۇستازى ونىڭ تىلگە دەگەن قىزىعۋشىلىعىن وياتىپ، تەرەڭىرەك مەڭگەرۋگە ىقپال ەتەدى. سونىڭ ارقاسىندا الينا قازاق ءتىلىن تەك ءتۇسىنىپ قانا قويماي، ەركىن ءارى كوركەم سويلەۋ دەڭگەيىنە جەتەدى. كەيىن بۇل قىزىعۋشىلىعى ۇلكەن اۋەستىككە، ودان سوڭ ماماندىققا اينالدى. قازىر ول وزگە ۇلت وكىلدەرىنە مەملەكەتتىك ءتىلدى ۇيرەتىپ ءجۇر.

الينا كان، قازاقستان حالىق كەڭەسىنىڭ مۇشەسى:

- باسقا ۇلت وكىلدەرى قازاق ءتىلىن قالاي ۇيرەنەدى، قانداي ارتىقشىلىقتارى، كەمشىلىكتەرى بار سونىڭ بارلىعىن مەن ءوزىمنىڭ باسىمنان وتكىزىپ، ەندى ءوز وقۋشىلارىما دا نەشە ءتۇرلى لايفحاكتارمەن، قازاق ءتىلىن قالاي تەز ۇيرەنۋگە بولادى، قالاي قورقىنىشتى باسۋعا بولادى وسىنىڭ بارلىعىن ءوزىم ۇيرەتىپ ءجۇرمىن.

الينا بۇگىندە ءوز تاجىريبەسىن وقىتۋ ادىستەمەسىنە اينالدىرعان. شاكىرتتەرىنە بىردەن كوپ اقپارات بەرىپ، اۋىرلاتپاۋعا تىرىسادى. كوپ جاڭا ءسوز جاتتاۋدىڭ ورنىنا بىرنەشە ءسوزدى تاڭداپ، ولاردى كۇندەلىكتى قولدانۋعا كەڭەس بەرەدى. تەوريانى كوپ وقىعاننان گورى، اڭگىمە تىڭداپ، فيلم كورىپ، ءان ايتقان ءتيىمدى. «ەڭ باستىسى، قاتەلەسۋدەن قورىقپاۋ كەرەك»، - دەيدى ول.

الينا كان، قازاقستان حالىق كەڭەسىنىڭ مۇشەسى:

- قازاق ءتىلىنىڭ ەرەكشەلىكتەرى - ۇندەستىك زاڭى بار. باسقا تىلدەردە ۇندەستىك زاڭى جوق. ەشقانداي ساقتالمايدى دا، مەن وقۋشىلارىما، جالپى كوپ ادامعا سول قيىن بولىپ تۇرادى، ۇندەستىك زاڭىن ساقتاۋ دەگەن. مەن قالاي ۇيرەندىم، ءدال سولاي وقۋشىلارىما ۇيرەتەمىن. كوپ تىڭداڭىزدار، ادامدار قالاي سويلەيدى، سونى تىڭداڭىزدار. ءبىر ءسوزدى جاتتاپ الدىڭىزدار ما، سونى كۇندە كۇندە قايتالاڭىزدار.

الينانىڭ شاكىرتتەرىنىڭ اراسىندا مانۋالدى تەراپيەۆت الەكساندر زيليگايەۆ تا بار. ول قازاق ءتىلىن تەك ءوزى ءۇشىن ۇيرەنىپ جۇرگەن جوق. نەگىزگى ماقساتى - پاتسيەنتتەرمەن ەركىن سويلەسۋ. قازىر ول گرامماتيكانى ءتۇسىنىپ، شاقتاردى اجىراتا الادى. ەركىن سويلەپ كەتپەسە دە، ءتىل سىندىرعانى بايقالادى.

الەكساندر زيليگايەۆ، وتەگەن اۋىلىنىڭ تۇرعىنى:

- مەن قازاق ءتىلىن ۇيرەنىپ ءجۇرمىن. الينامەن ساباقتار ماعان قاتتى ۇنايدى. باسىندا ساباققا كەلگەندە قازاق ءتىلىن مۇلدە بىلمەدىم. قازىر كىشكەنە بولسا دا قازاقشا سويلەي الامىن. بولاشاقتا قازاق تىلىندە ەركىن سويلەگىم كەلەدى. بىرنەشە ءتىلدى مەڭگەرۋ قازىر زامان تالابى، ءتىپتى زاماناۋي ترەندكە اينالدى.

«دەسە دە، ەڭ باستىسى مەملەكەتتىك ءتىل - قازاق ءتىلىن ۇيرەنۋگە كوڭىل بولگەن دۇرىس»، - دەيدى جاس مامان. بۇل - ازاماتتىق مىندەت. ءارى قازاق ءتىلىن مەڭگەرۋ - جارقىن بولاشاققا باستايتىن كوپىر.