يراننىڭ قازاقستاننان الاتىن استىعى بيىل دا بىلتىرعى كولەمدە ساقتالۋى مۇمكىن - ەلشى
استانا. KAZINFORM - يراننىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار يران يسلام رەۆوليۋتسياسىنىڭ 46 جىلدىعىنا وراي ب ا ق وكىلدەرىمەن كەزدەسىپ، ەكى ەل اراسىنداعى بايلانىستار تۋرالى مالىمەت بەردى.

كەزدەسۋ بارىسىندا ەلشىگە ەكى اراداعى استىق ساۋداسىنىڭ بۇگىنى مەن كەلەشەگى تۋرالى سۇراقتار قويىلدى.
- يران قازاقستاننىڭ يمپورتتايتىن استىق كولەمى ءبىر جىلدا بىردەن 40 پايىز ارتۋىنا ەشقانداي گەوساياسي جاعداي اسەر كەتكەن جوق. بۇل ەكى ەلدىڭ مەملەكەت قايراتكەرلەرىنىڭ جانە استىق بيزنەسىمەن اينالىساتىنداردىڭ اراسىنداعى ءوزارا تىعىز بايلانىستىڭ جەمىسى. ونىڭ الدىنداعى جىلدارى قازاقستان ەكسپورتتايتىن استىقتىڭ تومەندەۋىنە باعا سەبەپ بولعان ەدى. قازىر باعا ءبىراز تەپە-تەڭدىككە كەلدى.
رەسمي تەھران وزىنە قاجەتتى ازىق-تۇلىكتى، باسقا دا ماڭىزدى تاۋارلاردى ەڭ اۋەلى كورشىلەس، باۋىرلاس ەلدەردەن يمپورتتاۋدى باسىم باعىت رەتىندە ۇستانادى، مۇنى باسا ايتۋ كەرەك، - دەدى يران ەلشىسى.
ونىڭ سوزىنشە، كاسپيدىڭ ايدىنىن ءبولىسىپ جاتقان ىرگەلەس ەل بيىل دا قازاقستاننان الاتىن استىق كولەمىن ارتتىرۋى مۇمكىن.
- قازاقستاننىڭ يرانعا ەكسپورتتايتىن تاۋارلارىنىڭ كولەمى ىشكى الەۋەتىنە دە بايلانىستى. كەيبىر جىلدار وزىمىزدە كوپ ءوندىرىلىپ جاتادى. مۇنداي كەزدە قازاقستان ەكسپورتىنىڭ كولەمى ازايادى دەگەندەي.
بيىل قازاقستاننان قانشا استىق الاتىنىمىز دا وسى ىشكى وندىرىسكە بايلانىستى. ول كوكتەمگە قاراي بەلگىلى بولادى. مەنىڭ بولجامىم بويىنشا بىلتىرعى مولشەر تومەندەمەيدى دەپ ويلايمىن. وسى كولەم ساقتالىپ، ءتىپتى جوعارىلاۋى مۇمكىن، - دەدى ديپلومات.
ال اۋىل شارۋاشىلىعى مينيسترلىگىنىڭ مالىمەتى بويىنشا، يران باعىتىنا ەكسپورتتالعان استىق كولەمى ءبىر جىلدا ەكى ەسە ارتقان. جالپى، بىلتىر قازاقستاننان 8,1 ميللين توننا توننا استىق شىعارىلعان.
ونىڭ ىشىندە:
- وزبەكستانعا - 3,3 ميلليون توننا، بۇل 2023 -جىلعى دەڭگەيدەن %5- عا تومەن (3,45 ميلليون توننا)؛
- تاجىكستانعا - 1,2 ميلليون توننا، (1 ميلليون توننا)؛
- قىرعىزستانعا - 140 مىڭ توننا، (73 مىڭ توننا)؛
- قىتايعا - 1,7 ميلليون توننا، (1,9 ميلليون توننا)؛
- اۋعانستانعا - 289 مىڭ توننا، 2023 -جىلدان (449 مىڭ توننا)؛
- يرانعا - 526 مىڭ توننا، (245 مىڭ توننا) استىق جونەلتكەن.
اۆتور
ەسىمجان ناقتىباي