يراندا سودىرلاردىڭ شابۋىلىنان 11 پوليتسيا قىزمەتكەرى قازا تاپتى

يراننىڭ وڭتۇستىك-شىعىسىنداعى سيستان جانە بەلۋدجيستان پروۆينتسيالارىنداعى پوليتسيا بولىمدەرىنە جاسالعان شابۋىلدان كەمىندە 11 پوليتسيا قىزمەتكەرى قازا تاپتى، دەپ حابارلايدى Kazinform BBC اگەنتتىگىنە سىلتەمە جاساپ.

اگەنتتىكتىڭ حابارلاۋىنشا، شابۋىلداۋشىلاردىڭ بىرنەشەۋى اتىپ ولتىرىلگەن.

«راسك قالاسىنداعى پوليتسيانىڭ شتاب- پاتەرىنە جاسالعان تەرروريستىك شابۋىل بارىسىندا 11 پوليتسيا قىزمەتكەرى قازا تاۋىپ، تاعى بىرنەشەۋى جاراقات العان»، - دەپ حابارلادى پروۆينتسيا گۋبەرناتورىنىڭ ورىنباسارى اليرەزا مارحاماتي.

«پوليتسيا قىزمەتكەرلەرى ەرلىكپەن قورعاندى جانە بىرنەشە شابۋىلداۋشىنى جاراقاتتادى».

شابۋىل ءتۇن جارىمىندا جاسالعان جانە ول كەينىگى جىلدارداعى ەڭ قانقۇيلى وقيعا دەپ باعالانىپ وتىر.

بۇل ارەكەت ءۇشىن جاۋاپكەرشىلىكتى 2012 -جىلى قۇرىلىپ، يراننىڭ تەررورلىق ۇيىمدار تىزىمىنە ەنگىزىلگەن «دجاەش ال- ادل» (ادىلدىك اسەرى) مۇسىلمان-سۇنيتتتەر توبى الىپ وتىر.

كەيىنىرەك مەملەكەتتىك اقپاراتتىق IRNA اگەنتتىگى 7 پوليتسيا قىزمەتكەرىنىڭ جاراقات العانىن، ولاردىڭ كەيبىرىنىڭ جاعدايى مۇشكىل ەكەنىن حابارلادى.

وقيعا ورنىنا سيستان جانە بەلۋدجيستان پروۆينتسيالارىنىڭ پوليتسيا باستىعى كەلدى. يران بيلىگىنىڭ حابارلاۋىنشا، جاعداي يران بيلىگىنىڭ باقىلاۋىندا، تەرگەۋ باستالدى.

اۆتور

ايدار وسپاناليەۆ