يراندا پرەزيدەنتتىك سايلاۋعا ۇمىتكەرلەردى تىركەۋ باستالدى

استانا. KAZINFORM - يراندا 30-مامىر، بەيسەنبى كۇنى پرەزيدەنتتىككە كانديداتتاردى رەسمي تىركەۋ باستالدى. ەلدە مەرزىمىنەن بۇرىن سايلاۋ يسلام رەسپۋبليكاسىنىڭ پرەزيدەنتى قىزمەتىن اتقارعان ەبراحيم رايسيدىڭ ۇشاق اپاتىنان قايتىس بولۋىنا بايلانىستى 28-ماۋسىمدا وتەدى. بۇل تۋرالى DW اقپارات اگەنتتىگى.

- تىركەلۋ ءۇشىن ۇمىتكەرلەر الداعى 5 كۇن ىشىندە يراننىڭ ىشكى ىستەر مينيسترلىگىنە جەكە كەلۋى كەرەك. كانديداتتاردى تىركەگەننەن كەيىن 12 مۇشەدەن تۇراتىن كونستيتۋتسيانى قورعاۋشىلار كەڭەسى پرەزيدەنتتىككە كانديداتتاردىڭ يدەولوگيالىق تۇرعىدان جارامدىلىعىن شەشەدى، - دەپ اتاپ ءوتتى dpa اگەنتتىگى.

كەڭەس ماقۇلدانعان كانديداتتاردىڭ تۇپكىلىكتى ءتىزىمىن 11-ماۋسىمدا جاريالايدى. سودان سوڭ ساياساتكەرلەرگە سايلاۋالدى ناۋقان جۇرگىزۋگە ەكى اپتا ۋاقىت بەرىلەدى. ەگەر سايلاۋدىڭ ءبىرىنشى تۋرىندا ۇمىتكەرلەردىڭ ەشقايسىسى ابسوليۋتتى كوپشىلىك داۋىسىن جيناي الماسا، 5-شىلدەدە ەكىنشى تۋر ءوتىپ، وندا بولاشاق پرەزيدەنت انىقتالادى.

يران پرەزيدەنتى 4 جىلدىق مەرزىمگە سايلانادى جانە بۇل لاۋازىمدى قاتارىنان ەكى رەت مەرزىمنەن ارتىق ەمەس ۋاقىت ىشىندە اتقارا الادى.

ەسكە سالا كەتسەك، 19-مامىر، جەكسەنبى كۇنى شىعىس ازەربايجاننىڭ ۆارزاكان ايماعىنداعى تەبريز قالاسىنا ۇشىپ بارا جاتىپ اپاتقا ۇشىراعان يران يسلام رەسپۋبليكاسىنىڭ سەگىزىنشى پرەزيدەنتى اياتوللا سەيەد يبراحيم رايسي قاسىنداعى رەسمي تۇلعالارمەن بىرگە قايتىس بولدى.

اۆتور

زارينا تۋعانبايەۆا