يران ترامپتى ءولتىرۋدى ەشقاشان جوسپارلاماعان - پرەزيدەنت پەزەشكيان
استانا. KAZINFORM - يران ەشقاشان ا ق ش-تىڭ جاڭا سايلانعان پرەزيدەنتى دونالد ترامپتى ءولتىرۋدى جوسپارلاماعان.

بۇل تۋرالى يران پرەزيدەنتى ماسۋد پەزەشكيان سەيسەنبىدە NBC News-كە بەرگەن سۇحباتىندا، ترامپ پەن ا ق ش ۇكىمەتىنىڭ بۇرىنعى مالىمدەمەسىن جوققا شىعاردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قاراشا ايىندا فەدەرالدى تەرگەۋ بيۋروسى (ف ب ر) مەن ا ق ش ادىلەت مينيسترلىگى پاكىستان ازاماتى ساياسي قايراتكەرلەردى، سونىڭ ىشىندە ا ق ش- تىڭ جاڭادان سايلانعان پرەزيدەنتى دونالد ترامپتى قاستاندىقپەن ءولتىرۋ ماقساتىندا يرانمەن ىنتىماقتاستىقتا بولدى دەپ كۇدىكتەنگەنىن ايتتى.
امەريكالىق قۇقىق قورعاۋ ورگاندارى شابۋىل جاسالماي تۇرىپ-اق بولجامدى جوسپاردى بۇزدى دەپ مالىمدەدى.
ا ق ش بيلىگى بۇل قاستاندىق يراننىڭ جوعارى دارەجەلى يراندىق گەنەرال كاسەم سۇلەيمانيدىڭ قايتىس بولعانى ءۇشىن كەك الۋ ارەكەتتەرىنىڭ ءبىر بولىگى ەكەنىن ايتتى، ول باعدادتا ترامپتىڭ ءبىرىنشى پرەزيدەنتتىك مەرزىمىندە ونىڭ بۇيرىعىمەن جاسالعان امەريكالىق درون سوققىدان قازا تاپتى.
2024 -جىلى ا ق ش- تاعى سايلاۋ ناۋقانى كەزىندە ترامپ ونى ءولتىرۋ ارەكەتتەرىنىڭ ارتىندا يران تۇرۋى مۇمكىن دەپ مالىمدەدى.
- ەشقانداي جاعدايدا يسلام رەسپۋبليكاسى ەشكىمدى، ونىڭ ىشىندە دونالد ترامپتى ءولتىرۋ جوسپارىن جاساماعان جانە ەشقاشان جاسامايدى. بىزدە تەرىس نيەت باسىنان بولعان جوق، ترامپقا قارسى قاستاندىق جاسايدى دەگەن قاۋەسەت يزرايل مەن باسقا ەلدەردىڭ يرانعا قارسى دۇشپاندىقتى جانداندىرۋ جولىندا جاسالعان قاستاندىق، - دەدى ماسۋد پەزەشكيان لەستەر حولتپەن NBC Nightly News باعدارلاماسىندا بەرگەن سۇحباتىندا يراننىڭ ترامپتى ءولتىرۋ جوسپارى بار ما دەگەن ساۋالعا جاۋاپ بەرە تۇرىپ.
سونداي- اق NBC News ەفيرىندە ماسۋد پەزەشكيان يران يسلام رەسپۋبليكاسى «ايماقتا جانە الەمدە بەيبىتشىلىككە ۇمتىلادى، سوعىسقا يتەرمەلەۋدى، قول سۇعۋشىلىقتى جانە سيونيستىك رەجيمنىڭ گەنوتسيدىن ايىپتايدى جانە تەڭ جانە ادال كەلىسسوزدەرگە دايىن» دەپ مالىمدەدى.
مالىمدەمەنىڭ سوڭعى بولىگى - يراننىڭ تەڭ كەلىسسوزدەرگە دايىن ەكەندىگى دونالد ترامپتىڭ جاڭا اكىمشىلىگى ءۇشىن ماڭىزدى حابارلاما بولۋى مۇمكىن، دەپ حابارلايدى IRNA يران اقپارات اگەنتتىگى.
ماسۋد پەزەشكيان يران نەگىزىنەن ترامپتىڭ ەكىنشى اكىمشىلىگىمەن ديالوگقا اشىق ەكەنىن ايتتى. ءبىراق، ول امەريكا قۇراما شتاتتارى بۇرىن ءوز مىندەتتەمەلەرىن ورىنداماعانىن جانە يران ۇكىمەتىن قۇلاتۋعا تىرىسقانىن ايتتى.
سونىمەن قاتار پرەزيدەنت يراننىڭ يادرولىق قوندىرعىلارىنا شابۋىل جاسالعان جاعدايدا ءوزىن قورعاۋعا دايىن بولاتىنىن مالىمدەدى. ول سونداي-اق يراننىڭ يادرولىق قارۋ جاساۋعا ۇمتىلعانى تۋرالى اقپاراتتى جوققا شىعاردى، ياعني شىندىققا جاناسپايدى.
- ءبىز كەز-كەلگەن ارەكەتكە جاۋاپ بەرەتىنىمىز تۇسىنىكتى جايت. ءبىز سوعىستان قورىقپايمىز، ءبىراق وعان ۇمتىلمايمىز، - دەيدى يران پرەزيدەنتى.
قاستاندىقتار مەن ارالاسۋلار
وتكەن جىلعى ا ق ش سايلاۋىندا جەڭىسكە جەتكەن جانە كەلەسى دۇيسەنبىدە قىزمەتكە كىرىسەتىن دونالد ترامپ ناۋقان كەزىندە ەكى قاستاندىقتان امان قالدى. بىرەۋى قىركۇيەكتە فلوريدا شتاتىنداعى ۆەست پالم- بيچتە ءوز الاڭىندا گولف ويناعان كەزدە، ەكىنشىسى پەنسيلۆانيا شتاتىنداعى باتلەردەگى شىلدە ميتينگى كەزىندە.
تەرگەۋشىلەر يراننىڭ ولاردىڭ ەشقايسىسىنا قاتىسى بار ەكەندىگى تۋرالى ەشقانداي دالەل تاپپادى.
يران بۇعان دەيىن ا ق ش- تىڭ امەريكاندىق ىستەرگە، سونىڭ ىشىندە كيبەر وپەراتسيالار ارقىلى ارالاسقانى تۋرالى ايىپتاۋلارىن جوققا شىعارعان.
ءوز كەزەگىندە تەگەران ۆاشينگتون ءوزىنىڭ ىستەرىنە ونداعان جىلدار بويى ارالاسىپ، 1953 -جىلعى پرەمەر- مينيسترگە قارسى توڭكەرىستەن باستاپ، 2020 -جىلى امەريكالىق دروندى سوققىدان ونىڭ اسكەري قولباسشىسىن ولتىرۋگە دەيىنگى ءبىرقاتار وقيعاعا سىلتەمە جاساپ وتىرعانىن ايتادى.
ايتا كەتسەك، كەشە يران مەن ەۋروپالىق وداقتىڭ ءۇش ەلى سانكسيالاردى جويۋ تۋرالى كەلىسسوز باستادى.
داۋلەت ىزتىلەۋ
اۆتور