يران سانكسيالاردى قايتارۋ تەتىگى ىسكە قوسىلعان جاعدايدا «قاتاڭ جاۋاپ» قايتارۋعا ۋادە ەتتى

استانا. KAZINFORM - تەگەران سوعىس بولعان جاعدايدا ايماقتاعى بارلىق ەلدەر زارداپ شەگەتىنىن ەسكەرتتى، دەپ حابارلايدى Kazinform مەنشىكتى ءتىلشىسى.

يران س ءى م باسشىسى ابباس اراكچي ب ۇ ۇ- نىڭ يرانعا قارسى سانكسيالارىن قالپىنا كەلتىرۋ ءۇشىن «snapback» مەحانيزمى ىسكە قوسىلسا، «قاتاڭ» جاۋاپ بولاتىن ەسكەرتتى. بۇل تۋرالى ول جەكسەنبى كۇنى پارلامەنتتىڭ ۇلتتىق قاۋىپسىزدىك جانە سىرتقى ساياسات جونىندەگى كوميتەتىندە ەسەپ بەرۋ كەزىندە مالىمدەدى، دەپ حابارلايدى IRNA.

كوميسسيا وكىلى ەبراگيم رەزايدىڭ ايتۋىنشا، اراكچي تەگەراننىڭ ديپلوماتياعا بەرىك ەكەنىن، ءبىراق قىسىمعا شىدامايتىنىن باسا ايتتى.

- يران ەشقاشان كەلىسسوز ۇستەلىنەن كەتپەدى جانە ديپلوماتيانى جاقتايدى، ءبىراق سانكسيالاردى كەرى قايتارۋ تەتىگىنىڭ ىسكە قوسىلۋىنا قاتاڭ جاۋاپ بەرەدى، - دەپ كەلتىردى IRNA ونىڭ ءسوزىن.

اراكچي ا ق ش- پەن وماننىڭ اراعايىندىعىمەن جۇرگىزىلىپ جاتقان كەلىسسوز تەك يادرولىق ماسەلەلەرگە قاتىستى ەكەنىن اتاپ ءوتتى. ديالوگ قايتا باستالعان ساتتەن بەرى ول ا ق ش- تىڭ تاياۋ شىعىستاعى ارنايى وكىلى ستيۆ ۋيتكوفپەن بەس كەلىسسوز كەزەڭىن وتكىزدى - ۇشەۋى ماسكاتتا جانە ەكەۋى ريمدە.

رەزايدىڭ ايتۋىنشا، مينيستر سونىمەن قاتار يزرايل يرانداعى ۋراندى بايىتۋعا تولىق تىيىم سالۋدى قولدايتىن جالعىز ەل ەكەنىن مالىمدەدى. بۇل رەتتە اراكچي ايماقتىق بايىتۋ ورتالىعىن قۇرۋ مۇمكىندىگىن مويىندادى، ءبىراق ەل ىشىندە مۇنداي وپەراتسيالاردى توقتاتۋ مۇمكىندىگىن جوققا شىعاردى.

سونداي- اق ول «سوعىس بولعان جاعدايدا ايماقتاعى بارلىق ەلدەر زارداپ شەگەتىنىن» ەسكەرتتى.

رەزاي اتاپ وتكەندەي، كەيبىر يراندىق دەپۋتاتتار ا ق ش- پەن كەلىسسوزگە قازىردىڭ وزىندە كۇمانمەن قاراپ، ۆاشينگتوننىڭ اراداعى ديالوگقا قاراماستان جاڭا سانكسيالار ەنگىزەتىنىنە نازار اۋداردى.

«Snapback» مەحانيزمى دەگەنىمىز نە ؟

«Snapback» ، نەمەسە سانكسيالاردى اۆتوماتتى تۇردە قايتارۋ مەحانيزمى 2015 -جىلى يرانمەن يادرولىق كەلىسىمدى (JCPOA) ماقۇلداعان ب ۇ ۇ قاۋىپسىزدىك كەڭەسىنىڭ №2231 قارارىندا بەكىتىلگەن. ول كەلىسىمگە قاتىسۋشى كەز كەلگەن ەلگە يران كەلىسىمشارت تالاپتارىن بۇزدى دەپ ەسەپتەسە، وعان قارسى حالىقارالىق سانكسيالاردى قالپىنا كەلتىرۋگە مۇمكىندىك بەرەدى.

مەحانيزمنىڭ باستى ەرەكشەلىگى - سانكسيالار ب ۇ ۇ قاۋىپسىزدىك كەڭەسىندە تالقىلاۋسىز جانە داۋىس بەرۋسىز اۆتوماتتى تۇردە قايتارىلادى. ياعني، باسقا ەلدەر قارسى بولسا دا، بۇل شارالار شاعىم تۇسكەننەن كەيىن 30 كۇننەن كەيىن كۇشىنە ەنەدى.

قازىرگى كەزدە ۇلى بريتانيا، فرانسيا جانە گەرمانيا بۇل مەحانيزمدى بەلسەندىرۋدى قاراستىرىپ وتىر. شەشىم قابىلداۋدىڭ سوڭعى مەرزىمى - 2025 -جىلدىڭ 18-قازانى. ەگەر سانكسيالار قايتا كۇشىنە ەنسە، بۇل يادرولىق كەلىسىمدى ءىس جۇزىندە توقتاتادى، ال تەگەران ۋراندى بەيبىت جولمەن بايىتۋ قۇقىعىنىڭ نەگىزى رەتىندە تالاپ ەتىپ وتىرعان يادرولىق قارۋدى تاراتپاۋ تۋرالى كەلىسىمنەن شىعامىن دەپ قورقىتتى.

ەسكە سالا كەتسەك، بۇعان دەيىن ترامپ ا ق ش يرانمەن يادرولىق كەلىسىمگە جاقىن قالعانىن مالىمدەگەن بولاتىن.

اۆتور

زارينا تۋعانبايەۆا