يران پرەزيدەنتى ەلدىڭ قۋاتتى بولۋى نەگە بايلانىستى ەكەنىن ايتتى
استانا. KAZINFORM - يران پرەزيدەنتى ماسۋد پەزەشكيان ەلدىڭ تۇراقتى دامۋى مەن ۇلتتىق مۇددەلەرىن قورعاۋدىڭ باستى شارتى قوعامداعى بىرلىك پەن ىنتىماق ەكەنىن مالىمدەدى، دەپ حابارلايدى IRNA.
مەملەكەت باسشىسى بۇل تۋرالى ۇلتتىق بالالار اپتالىعىنا وراي ۇيىمداستىرىلعان «وتان كۇلكىسى» اتتى فەستيۆالدە ايتتى.
ءىس- شارا بارىسىندا پەزەشكيان بالالارعا بىرلىكتىڭ ماڭىزىن ءتۇسىندىرۋ ءۇشىن ءبىر بۋما شىبىق تۋرالى مىسال كەلتىردى. ونىڭ ايتۋىنشا، جەكە تۇرعان شىبىقتى سىندىرۋ وڭاي بولعانىمەن، ءبىر بۋماعا بىرىكتىرىلگەن شىبىقتاردى سىندىرۋ الدەقايدا قيىن. سول سياقتى ىنتىماعى جاراسقان قوعام دا سىرتقى قىسىمعا توتەپ بەرە الادى.
- ەگەر ءبىز بىرىكسەك، ەشكىم ءبىزدى جەڭە المايدى. ال ءارقايسىمىز جەكە ارەكەت ەتسەك، ءبىزدى السىرەتۋ وڭاي بولادى. سوندىقتان ءبىر- بىرىمىزگە كومەكتەسىپ، ءاردايىم قولداۋ كورسەتۋىمىز كەرەك. سوندا عانا بارلىق سالادا دامۋعا قابىلەتتى قۋاتتى يراندى قۇرا الامىز، - دەدى ماسۋد پەزەشكيان.
يران پرەزيدەنتى كۇش-جىگەردى بىرىكتىرۋ تەك قوعامدىق ومىردە عانا ەمەس، عىلىم، الەۋمەتتىك قىزمەت جانە گۋمانيتارلىق ىنتىماقتاستىق سالالارىندا دا ماڭىزدى ەكەنىن اتاپ ءوتتى.
ونىڭ پىكىرىنشە، ەلدىڭ بولاشاعى قوعامنىڭ بارلىق وكىلىنىڭ ورتاق ماقسات جولىندا جۇمىلا ارەكەت ەتۋىنە بايلانىستى.
پرەزيدەنتتىڭ بۇل مالىمدەمەسى وتباسىن قولداۋعا جانە جاس ۇرپاقتىڭ دامۋىنا باعىتتالعان مەملەكەتتىك ءىس-شارالار اياسىندا جاسالدى.
ايتا كەتەيىك، بۇعان دەيىن ماسۋد پەزەشكيان يرانداعى ازا تۇتۋ راسىمىنە قاتىسقان ميلليونداعان ازاماتقا العىس ايتىپ، حالىقتىڭ ىنتىماعى مەن ۇلتتىق بىرلىگىنىڭ ماڭىزىن اتاپ وتكەن بولاتىن.
