ينۆەستيتسيا تارتۋ ىسىندە بيۋروكراتياعا مۇلدە جول جوق - مەملەكەت باسشىسى

ينۆەستيتسيالىق شتابتىڭ جۇمىسى جوبالاردى ۋاقىتىلى جانە كەدەرگىسىز جۇزەگە اسىرۋعا باعىتتالادى.

بۇل تۋرالى بۇگىن ەلوردادا «التىن ساپا» جانە «پارىز» سىيلىقتارىنىڭ جەڭىمپازدارىن ماراپاتتاۋ كەزىندە مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى Kazinform.

«مەن جۋىرداعى جولداۋىمدا 2029-جىلعا قاراي ۇلتتىق ەكونوميكا كولەمىن ەكى ەسە، ياعني 450 ميلليارد دوللارعا دەيىن ۇلعايتۋ جونىندە ماڭىزدى مىندەت جۇكتەدىم. بۇل مىندەت - بوس قيال ەمەس، ۇكىمەتتىڭ مۇقيات ەسەپتەگەن ءىس- قيمىل جوسپارى. ونى ورىنداۋ ءۇشىن جاڭا ينۆەستيتسيالىق سيكلدى ىسكە قوسۋ قاجەت. ول ەل ەكونوميكاسىنىڭ ماڭىزدى ەلەمەنتىنە اينالادى»، - دەدى قاسىم-جومارت توقايەۆ.

مەملەكەت باسشىسى وتكەن اپتادا ينۆەستيتسيا تارتۋ جۇمىستارىنىڭ تيىمدىلىگىن ارتتىرۋ تۋرالى جارلىققا قول قويعانىن ەسكە سالدى.

«ەندى ينۆەستيتسيالىق شتابتىڭ جۇمىسى جوبالاردى ۋاقىتىلى جانە كەدەرگىسىز جۇزەگە اسىرۋعا باعىتتالادى. شتابقا زاڭدى كۇشى بار، ۋاقىتشا نورماتيۆتىك قۇقىقتىق اكتىلەردى ازىرلەۋ قۇقىعى بەرىلدى. وعان شەشىمدەر قابىلداۋعا قۇزىرەت بەرۋ اسا ماڭىزدى. ونى مەملەكەتتىك ورگاندار مەن ۇلتتىق كومپانيالار مىندەتتى تۇردە ورىنداۋى كەرەك. مۇنداي شارالار ەلىمىزدەگى ينۆەستيتسيالىق كليماتتى جاقسارتۋعا ىقپال ەتۋدى كوزدەيدى. بۇل جۇمىس ينۆەستيتسيالىق شتابتىڭ بارلىق مۇشەسىنە جەكە-جەكە جاۋاپكەرشىلىك جۇكتەيدى»، - دەدى پرەزيدەنت.

قاسىم-جومارت توقايەۆ ينۆەستيتسيا تارتۋ ىسىندە «بيۋروكراتياعا مۇلدە جول جوق - بارىنشا ناقتى ءىس-ارەكەت» قاعيداتى باسشىلىققا الىنۋى قاجەت ەكەنىن قاداپ ايتتى.

«قولعا الىنعان ءىستىڭ ناتيجەسى مەملەكەتتىك اپپاراتتىڭ ءجىتى نازارىندا بولۋعا ءتيىس. وزدەرىڭىزگە ءمالىم، مەنىڭ تاپسىرماما سايكەس، وڭدەۋ سەكتورىنا قارجى سالاتىن ينۆەستورلار كەلەسى جىلدان باستاپ ءۇش جىلعا سالىقتان بوساتىلادى. بۇرىن-سوڭدى مۇنداي جۇيەلى شارالار بولماعان ءارى ونىڭ شەشۋشى سيپاتى بار. ايتپەسە، ينۆەستيتسيا ءۇشىن وتە جوعارى حالىقارالىق باسەكەلەستىك قالىپتاسىپ تۇرعان جاعدايدا كوزدەگەن ماقساتقا قول جەتكىزۋ قيىنعا سوعادى»، - دەدى مەملەكەت باسشىسى.
ينۆەستيتسيالىق جوبالاردى «جاسىل ءدالىز» قاعيداتى بويىنشا قولداۋ جۇيەسى ەنگىزىلەدى.
«وزدەرىڭىزگە بەلگىلى، بۇعان دەيىن وتاندىق بيزنەستى نەگىزسىز تەكسەرۋلەر مەن زاڭسىز قىلمىستىق قۋدالاۋدان قورعاۋ جونىندە تاپسىرما بەرگەن بولاتىنمىن. قابىلدانعان شارالاردىڭ ناتيجەسىندە كاسىپكەرلىك سالاسىنداعى تىركەلگەن قىلمىستار سانى ەكى ەسە (837-دەن 402-گە دەيىن) ازايدى. اقتاۋ نەگىزى بويىنشا توقتاتىلعان قىلمىستىق ىستەر سانى شامامەن بەس ەسە (416-دان 92-گە دەيىن) قىسقاردى»، - دەدى قاسىم- جومارت توقايەۆ.
پرەزيدەنت ينۆەستيتسيالىق جوبالاردى پروكۋراتۋرا ورگاندارىنىڭ سەرۆيستىك قاداعالاۋىنا باسا ءمان بەرىلەتىنىن ايتتى.
«ينۆەستيتسيالىق جوبالاردى «جاسىل ءدالىز» قاعيداتى بويىنشا قولداۋ جۇيەسى ەنگىزىلەدى. بۇل ينۆەستورلارعا رۇقسات بەرەتىن قۇجاتتى الۋ ءىسىن وڭايلاتادى جانە جەدەلدەتەدى. سونداي- اق ولارعا جەر ۋچاسكەلەرىن بەرۋ جانە كوممۋنيكاتسيا جۇرگىزۋ جۇمىستارىن جەڭىلدەتەدى»، - دەدى مەملەكەت باسشىسى.
اۆتور
مارلان جيەمباي