ينفلياتسيا 12 پايىزعا بارۋى مۇمكىن - ازامات ءامرين

استانا. KAZINFORM - ۇلتتىق ەكونوميكا ءمينيسترىنىڭ ءبىرىنشى ورىنباسارى ازامات ءامرين قوسىلعان قۇن سالىعىنىڭ مولشەرلەمەسىن 12 پايىزدان 16 پايىزعا كوتەرۋ ينفلياتسياعا قالاي اسەر ەتەتىنىن ايتتى.

- بۇل شارالار قازىرگى الەۋمەتتىك-ەكونوميكالىق دامۋ بولجامىنداعى ينفلياتسيا بولجامىنا قوسىمشا 2,5-3 پايىز ۇستەۋى مۇمكىن دەپ وتىرمىز. سوندا بىلتىر ينفلياتسيا دەڭگەيى 8,6 پايىز بولسا، سوعان 2,5 پايىز قوسساق، 2026 -جىلى ينفلياتسيا شامامەن 12 پايىز ءوسىم بولادى. ءبىراق بۇل ينفلياتسيا دا قىسقا مەرزىمدى بولادى. ياعني، ءبىر جىل كولەمىندە ساقتالادى. ال 2027، 2028 -جىلدارى قالپىنا قايتىپ كەلەدى. بۇل بولجامدى ەسەپتەۋدىڭ بارشا مودەلدەرى راستادى، - دەدى - ۆيتسە-مينيستر.

سونداي-اق، ول ۇسىنىلعان تۇزەتۋلەردىڭ ءبارىن ءوڭىر- وڭىردە 2,5 مىڭنان استام كاسىپكەرمەن تالقىلاپ كەلگەندەرىن ەسكە سالدى.

- رەفورما جاساردىڭ الدىندا بۇكىل وڭىرلەرگە بارىپ قايتتىق. بيزنەس قاۋىمداستىقپەن تالقىلاۋ جۇمىستارىنا 6 جۇمىس توبى اتسالىسقانىن بىلەسىزدەر. وسى جۇمىس اياسىندا 2,5 مىڭنان استام جەكە كاسىپكەرمەن جانە جەكە شارۋاشىلىق باسشىلارىمەن كەزدەستىك. ولاردىڭ بۇكىل ۇسىنىستارىن تىڭداپ، جازىپ الدىق. قازىر سول ۇسىنىستاردى تالقىلاۋ ءجۇرىپ جاتىر. ءماجىلىستىڭ وسى ماسەلەگە بايلانىستى قۇرىلعان جۇمىس توبىندا دا وسى ماسەلەلەردى تەرەڭ پىسىقتايمىز دەپ ويلايمىن، - دەدى ازامات ءامرين.

ەسكە سالساق، 20 -اقپاندا ماجىلىسكە سالىق كودەكسىنىڭ تۇزەتىلگەن جوباسى ەنگىزىلگەن ەدى. بۇگىن سول قۇجاتتى پىسىقتايتىن ءماجىلىستىڭ جۇمىس توبى ىسكە كىرىستى.

كودەكستىڭ جاڭا رەداكسياسىنداعى نەگىزگى تۇزەتۋلەر مىنالار:

➤ قوسىلعان قۇن سالىعى بويىنشا مىندەتتى تىركەۋ شەگىن تومەندەتۋ - 20000 م ر پ (78,6 ميلليون تەڭگە) 3800 م ر پ (15 ميلليون تەڭگە) دەيىن؛

➤ قوسىلعان قۇن سالىعىنىڭ مولشەرلەمەسىن ارتتىرۋ - %12- دان %16- عا دەيىن، بۇعان قوسا ءبىرقاتار سالالار ءۇشىن تومەندەتىلگەن مولشەرلەمە %10 بەلگىلەنەدى؛

➤ جەڭىلدەتىلگەن دەكلاراتسيا بويىنشا ارنايى سالىق رەجيمىن قولدانۋدى شەكتەۋ - تەك B2C سەگمەنتىنە (بيزنەس تۇپكىلىكتى تۇتىنۋشىلار ءۇشىن) قولجەتىمدى بولادى.

اۆتور

ەسىمجان ناقتىباي