يلون ماسك Starlink جەلىسىنىڭ وتكىزۋ قابىلەتىن ءۇش جىلدا 100 ەسە ارتتىرماق
Starlink سپۋتنيكتىك جەلىسىنىڭ وتكىزۋ قابىلەتى الداعى ەكى- ءۇش جىلدا 100 ەسە ارتۋى مۇمكىن. بۇعان جاڭا بۋىنداعى سپۋتنيكتەردى ۇشىرۋ ەسەبىنەن قول جەتكىزۋ جوسپارلانىپ وتىر، دەپ حابارلايدى تاسس.
يلون ماسكتىڭ ايتۋىنشا، ءقازىر وربيتادا Starlink جەلىسىنىڭ شامامەن 11 مىڭ سپۋتنيگى بار. ولاردىڭ باسىم بولىگى ەكىنشى بۋىنعا جاتادى. كومپانيا ءۇشىنشى بۋىنداعى (V3) سپۋتنيكتەردى ۇشىرۋدى باستاپ كەتكەن.
جاڭا اپپاراتتاردىڭ ونىمدىلىگى الدىڭعى ۇلگىلەرمەن سالىستىرعاندا 10 ەسەدەن استام جوعارى. سونىمەن قاتار SpaceX عارىشقا ۇشىرىلاتىن سپۋتنيكتەر سانىن دا 10 ەسە كوبەيتۋدى جوسپارلاپ وتىر.
ماسكتىڭ پىكىرىنشە، وسى ەكى فاكتوردىڭ ۇيلەسۋى الداعى 2-3 جىلدا سپۋتنيكتىك جەلىنىڭ مۇمكىندىگىن ايتارلىقتاي كەڭەيتۋگە جول اشادى.
بۇدان بولەك، كومپانيا ءتورتىنشى بۋىنداعى (V4) سپۋتنيكتەردى ازىرلەپ جاتىر. كاسىپكەردىڭ بولجامىنشا، ولاردىڭ قۋاتى V3 نۇسقاسىنان 10 ەسە جوعارى بولادى.
ەسكە سالايىق، SpaceX ا ق ش- تا Starship-كە ارنالعان جاڭا عارىش ايلاعىن سالاتىنى حابارلانعان بولاتىن.
بۇعان دەيىن SpaceX كومپانياسىنىڭ Starship عارىش كەمەسى العاش رەت جەر وربيتاسىنا شىعىپ، Starlink جەرسەرىكتەرىن عارىشقا شىعاردى.
