پىلدەر ادامدارعا شابۋىل جاساپ جاتىر

استانا. قازاقپارات - شري-لانكادا پىلدەر اۋلالارعا كىرىپ كەتىپ جاتىر. بۇعان ورمانداردىڭ جاپپاي وتالۋى سەبەپ. تىرشىلىك ەتەتىن ورتاسى تارىلعان سوڭ، قورەك تاپپاي، ەلدى مەكەندەردىڭ ىشىنە كىرىپ كەتەتىن بولعان. مۇنىڭ سالدارىنان ادام ومىرىنە عانا ەمەس، جانۋارلاردىڭ وزىنە دە قاۋىپ ءتوندى، دەپ حابارلايدى 24KZ.

піл
Фото: iStock

شري-لانكادا بۇرىن پىلدەر نۋ ورماننىڭ ىشىنەن وزەن- ولدەردەن سۋ ءىشۋ ءۇشىن عانا شىعاتىن. جەمىس-جيدەك جەپ، وزىمەن-ءوزى جۇرگەن جانۋارلار ەندى ازىق تاپپاعان سوڭ، اشۋعا ءمىنىپ، ادامدارعا دا شابۋىلدايتىن بولعان. بىلتىر جابايى تابيعاتتى قورعاۋ ءبولىمىنىڭ قىزمەتكەرى ديەۆاگيري باندارا ءۇيىنىڭ اۋلاسىنا كىرىپ كەتكەن سۇتقورەكتىنىڭ استىندا قالىپ، اياعى ءۇش جەردەن سىنعان ەدى. ال كومەككە كەلمەك بولعان ايەلى قازىر ارباعا تاڭىلىپ وتىر.

ديەۆاگيري باندارا، جابايى تابيعاتتى قورعاۋ ءبولىمىنىڭ قىزمەتكەرى:

- ءومىرىمىز ءبىر-اق ساتتە وزگەردى. بۇرىن ايەلىم ەكەۋمىز بۇكىل ءىستى بىرگە جوسپارلاپ، ىستەيتىنبىز. اۋىل شارۋاشىلىعىمەن اينالاستىق. قازىر وعان ارنايى كۇتىم قاجەت. بۇل ەكەۋمىز ءۇشىن دە اۋىر جاعداي.

بيلىكتىڭ ەسەبى بويىنشا 2019 -جىلدان بەرى شري-لانكادا جىلىنا 370 ءپىل ولتىرىلسە، 125 ادام باقيلىق بولادى. جەرگىلىكتى تۇرعىندار سۇتقورەكتىنى ۇيلەرى مەن ەگىس القاپتارىنا جاقىنداتپاۋ ءۇشىن قورشاۋلار تۇرعىزىپ، وعان توق ورناتىپ جاتىر. الايدا، بۇل دا قاۋىپتى. ويتكەنى، سىمدار دۇرىس تارتىلماسا، پىلدەر تۇگىلى، بالالار دا توققا ءتۇسۋى مۇمكىن.

الاڭداتارلىعى سول، اشىققان پىلدەر ەلدى- مەكەندەردى عانا ەمەس، قوقىس پوليگوندارىن دا كەزىپ كەتەتىن جاعدايعا جەتتى. ال تۇرمىستىق قالدىقتار جانۋارلاردىڭ اس قورىتۋ جۇيەسىن بۇزىپ، ولاردىڭ قىرىلۋىنا اكەلۋى مۇمكىن.

نيحال پۋشپاكۋمارا، مال دارىگەرى:

 - ولگەن پىلدەردىڭ ىشىنەن پلاستيك پاكەتتەر مەن ازىق-تۇلىك قاپتامالارى شىقتى. بۇل جانۋارلاردىڭ اسقازانى مۇنى قورىتا المايدى. نەگىزگى ازىعىنىڭ قالدىقتارى مۇلدە تابىلعان جوق. ءبىر عاسىر بۇرىن شري-لانكا اۋماعىنىڭ 70 پايىزىن جاسىل جەلەك الىپ جاتاتىن. قازىر بۇل كورسەتكىش 16 پايىزعا دەيىن سيرەدى.

ديەۆاگيري باندارا بولعان جاعدايعا پىلدەردى كىنالى سانامايدى. ونىڭ ايتۋىنا قاراعاندا، بۇل ادامزاتتىڭ تابيعاتقا جاساعان قياناتىنىڭ سالدارى. ۇكىمەتتەگىلەر ناقتى قادامعا كوشپەيىنشە، پىلدەردىڭ ەلدى- مەكەندەرگە كىرۋى توقتامايدى دەپ سانايدى.