ۇيعىر تەاترىنىڭ قۇرىلعانىنا 90 جىل تولدى

استانا. قازاقپارات - بيىل قۇدىس قوجامياروۆ اتىنداعى ۇيعىر مۋزىكالىق كومەديا تەاترىنىڭ قۇرىلعانىنا 90 جىل. مادەنيەت وشاعىنىڭ تاريحى 1934-جىلدان باستاۋ الادى. سول كەزدە «انارحان» مۋزىكالىق دراماسىمەن شىمىلدىعىن اشتى.

سودان بەرى تەاتر ارتيستەرى ونداعان قويىلىمدى ساحنالادى. سپەكتاكلدەر قازاق جانە ورىس تىلدەرىندە ىلەسپە اۋدارمامەن جۇرەدى. ۇيعىر تەاترىنىڭ تاريحى تەرەڭدە جاتىر. 1918-جىلى الماتىدا «از ساندى ۇلتتار كلۋبى» ۇيىمداستىرىلىپ، ونىڭ قۇرامىندا ۇيعىر، تاتار، وزبەك دراما ۇيىرمەلەرى جۇمىس ىستەي باستاعان. سول كلۋبتا العاشقى پەسالار قويىلعان.

1934-جىلى وبلىستىق ۇيعىر مۋزىكالىق دراما تەاترى بولىپ قۇرىلادى. II دۇنيەجۇزىلىك سوعىس كەزىندە ونەر ورداسى الماتى وبلىسىنىڭ شەلەك كەنتىنە كوشىرىلەدى. 20 جىلدان كەيىن الماتىعا قايتا ورالعان. سودان بەرى كورەرمەندەرىنەن الىستاعان ەمەس.

ءدىلمۇرات باحاروۆ، ق. قوجامياروۆ اتىنداعى ۇيعىر مۋزىكالىق كومەديا تەاترىنىڭ ديرەكتورى:

- بيىل ءبىز ءۇشىن ەرەكشە جىل. تەاترىمىزدىڭ 90 جىلدىق مەرەيتويى اياسىندا مادەنيەت جانە اقپارات مينيسترلىگىنىڭ قولداۋىمەن ءىس-شارالار رەتىن بەلگىلەدىك. تۇركياعا گاسترولعا بارامىز. وعان تۇركى مادەنيەتىن جانە ونەرىن دامىتۋ حالىقارالىق ۇيىمى دا قولداۋ ءبىلدىرىپ وتىر. وعان قوسا، مۋزىكالىق سپەكتاكلدەر فەستيۆالىن وتكىزۋ تۋرالى جوسپارىمىز بار.

مادەنيەت وشاعى 1964-جىلدان باستاپ رەسپۋبليكالىق ۇيعىر مۋزىكالىق دراما تەاترى دەپ اتالا باستاعان. اراعا ءۇش جىل سالىپ، مۋزىكالىق كومەديا تەاترى اتانادى. 70 جىلدىق مەرەيتويىنا وراي، ك س ر و- نىڭ حالىق ءارتىسى، سازگەر قۇدىس قوجامياروۆتىڭ ەسىمى بەرىلگەن.

گۇلباھار ماسيروۆا، ق. قوجامياروۆ اتىنداعى ۇيعىر مۋزىكالىق كومەديا تەاترىنىڭ ءبولىم مەڭگەرۋشىسى:

- ءبىزدىڭ تەاتر كوپتەگەن ەلدەرگە گاسترولدىك ساپارمەن باردىق. تۇركيا، ۆەنگريا، پاكىستان، پورتۋگاليا. ءبىرقاتار ەلدەرگە ۇيعىر ونەرىن اپارىپ، تانىستىردىق. ءبىزدىڭ تەاتردى ءبىرىنشى كۇنىنەن باستاپ قازاق زيالى قاۋىمى وتە جاقسى قولدادى. 1936-جىلى عابيت مۇسىرەپوۆ ءوزىنىڭ قوزى كورپەش-بايان سۇلۋ شىعارماسىن جازىپ، وسى قازاقستان بويىنشا ەڭ ءبىرىنشى ءبىزدىڭ تەاترعا بەرگەن.

قازىر تەاتر رەپەرتۋارىندا «نازۋگۋم»، «راناگۇل»، «ماحمۋت قاشقاري»، «ءلايلى-ءماجنۇن» سياقتى ونداعان سپەكتاكل بار. سونىڭ ىشىندە بىرنەشە جىلدان بەرى تەاتر ساحناسىنان تۇسپەي كەلە جاتقان قويىلىمدار بار.

ازيزجان يسكانداروۆ، رەجيسسەر:

- «ءبىز «نازۋگۋمدى» جاڭالاپ ەكىنشى رەت ۇسىنىپ وتىرمىز. العاش رەت 1970-جىلدارى قويىلعان. 2015-جىلى جازۋشى تۇرعان توقتاموۆتىڭ رومانىنىڭ جەلىسىمەن سپەكتاكلدى قايتا ساحنالادىق. بۇل شىعارما حالقىنىڭ ازاتتىعى ءۇشىن، ءوزىنىڭ ماحابباتى ءۇشىن كۇرەسكەن قىز نازۋگۋمعا ارنالادى.

بۇگىندە تەاتر رەپەرتۋارىندا ۇيعىر دراماسىمەن قوسا، ورىس، وزبەك، قىرعىز، باشقۇرت، ازەربايجان، گرۋزين جانە قازاق جازۋشىلارىنىڭ شىعارمالارى بار. 2016-جىلى مادەنيەت وشاعى كۇردەلى جوندەۋدەن ءوتىپ، قاجەتتى قۇرال-جابدىقتارمەن تولىقتى. تەاتر ۇجىمى مۋزىكالىق كومەديا جانرىنا، وعان قوسا بالالارعا ارنالعان شىعارمالارعا دا نازار اۋدارۋدى جوسپارلاپ وتىر. ال، 90 جىلدىق مەرەيتويىن ماۋسىم ايىندا اتاپ وتەدى.

قارلىعاش قايىپبەكوۆا، مۇحيت قۇدىقبايەۆ

www.24.kz