ياندەكس تاكسيگە قاتىستى تەرگەۋ اياقتالدى
باسەكەلەستىكتى قورعاۋ جانە دامىتۋ اگەنتتىگى ياندەكس تاكسيگە قاتىستى تەرگەۋدى اياقتادى، دەپ حابارلايدى Kazinform.
تەرگەۋ قورىتىندىسى بويىنشا كومپانيا باقىلاۋ-كاسسالىق ماشينالاردىڭ باعدارلامالىق قامتاماسىز ەتۋىن تەحنيكالىق قولداۋ قىزمەتتەرىن جۇكتەۋدە كورسەتىلگەن تاكسوپاركتەردىڭ ەكونوميكالىق قىزمەتىن ۇيلەستىرگەنى ءۇشىن اكىمشىلىك جاۋاپكەرشىلىككە تارتىلدى. سونداي- اق، ياندەكس تاكسي مونوپولياعا قارسى ورگانعا اقپارات بەرمەگەنى ءۇشىن دە اكىمشىلىك جازا الدى.
ياندەكس تاكسي قازاقستاننىڭ سيفرلىق ەكوجۇيەسىن قولداۋ قورىنا ءوز ەركىمەن 3 ميلليارد تەڭگە اۋداردى.
سونداي- اق اگەنتتىك پەن ياندەكس تاكسي مونوپولياعا قارسى كومپلاەنس جاساسىپ، ونىڭ اياسىندا مىناداي شارالار كەشەنىن ىسكە اسىرۋ كوزدەلگەن:
- بىرىنشىدەن، جۇرگىزۋشىلەر ءۇشىن ەڭبەكاقىنى ارتتىرۋ شارتىنىڭ ءبىرى رەتىندە، ەگەر تاپسىرىس جول ءجۇرۋ اقىسىنىڭ بازالىق قۇنىنان ەكى ەسە اساتىن بولسا، وسى جىلدىڭ 14-جەلتوقسانىنان باستاپ، ياندەكس كوميسسياسىن ءوندىرىپ الۋدى توقتاتاتىن بولدى؛ (ەكونوميكالىق اسەرى جىلىنا شامامەن 2 ميلليارد تەڭگەگە)؛
- جۇرگىزۋشىلەر ءۇشىن قوسىمشا بونۋستىق باعدارلاما ەنگىزۋ (2024-جىلى سالا اينالىمى مەن ينفلياتسيانىڭ وسۋىنە بايلانىستى 7-10 ميلليارد تەڭگە)؛
- تاريف قالىپتاستىرۋدىڭ اشىقتىعىن ارتتىرۋ ماقساتىندا تاريفتى نە ءۇشىن كوتەرگەنى جانە قانداي وزگەرىس بولعانى تۋرالى نەگىزدەمە كەلتىرە وتىرا، پايدالانۋشى قوسىمشاسىن جاقسارتۋ.
- ەكىنشىدەن، جولاۋشىلار ءۇشىن جاڭارتىلعان «بىرگە» تاريفى ەنگىزىلەدى، ول ءتىپتى ەڭ جوعارى سۇرانىس بولىپ تۇرعاننىڭ وزىندە، تومەن باعامەن تاكسيگە تاپسىرىس بەرۋگە مۇمكىندىك بەرەدى (تاريفتى х2-گە دەيىن كوتەرۋگە شەكتەۋلەر)؛
- اگرەگاتور تاكسي قىزمەتتەرىنە ەڭ جوعارى سۇرانىس جاعدايىندا، مىسالى، قولايسىز اۋا رايىندا نەمەسە مەرەكە كۇندەرى х3-تەن جوعارى تاريفتى كوتەرۋگە شەكتەۋلەر ەنگىزەدى - توقسانىنا اتالمىش دەڭگەيدەن جوعارى ساپارلاردىڭ سانى %5 - دان اسپايتىن بولادى؛
- بالامەن جۇرەتىن جولاۋشىلار ءۇشىن «بالالار» تاريفى ەنگىزىلەدى، ول بالالار كرەسلوسى نەمەسە بۋستەرى بار اۆتوكولىكتى شاقىرۋعا مۇمكىندىك بەرەدى.
تاكسي جۇرگىزۋشىلەرىمەن ءتيىمدى قارىم- قاتىناس جاساۋ جانە كليەنتتەرمەن بايلانىستى قولداۋ ءۇشىن call-ورتالىقتا «كادىمگى» وپەراتور جۇمىس ىستەيتىن بولادى.
سونىمەن قاتار، جولاۋشىلار مەن جۇرگىزۋشىلەردىڭ مۇددەلەرىنىڭ تەپە-تەڭدىگىن قامتاماسىز ەتەتىن كەلەسى جۇيەلى شارالار قابىلداندى:
- اگەنتتىك زاڭناماعا تۇزەتۋ ەنگىزۋگە باستاماشىلىق جاسادى، ولاردى ەنگىزۋ جۇرگىزۋشىلەرگە ياندەكس- پەن تاكسوپاركسىز تىكەلەي جۇمىس ىستەۋگە مۇمكىندىك بەرەدى (تاكسوپارك كوميسسياسى - % 4-8)؛
- ياندەكس باعدارلامالىق قامتاماسىز ەتۋدى، سونداي- اق باعا بەلگىلەۋگە اسەر ەتەتىن فاكتورلاردى (اۋا رايى جاعدايسى، مەرەكە كۇندەرى، سۇرانىستىڭ ارتۋى، جۇرگىزۋشىلەردىڭ بولماۋى جانە ت. ب.) ەگجەي- تەگجەيلى زەردەلەۋ ءۇشىن IT سالاسىنداعى تاۋەلسىز اۋديتورلىق كومپانيا اگەنتتىكپەن، سيفرلىق دامۋ جانە ايەروعارىش ونەركاسىبى مينيسترلىگىمەن بىرلەسىپ الگوريتمدىك باعا بەلگىلەۋ اۋديتىن جۇرگىزەدى.
«ياندەكس مىندەتتەمەلەرىنىڭ مونوپولياعا قارسى كومپلاەنس شەڭبەرىندە ورىندالۋى اگەنتتىك جانىنداعى ارنايى مونيتورينگ توبىنىڭ باقىلاۋىندا بولادى. ونىڭ قۇرامىنا كاسىبي قوعامداستىقتاردىڭ ساراپشىلارى (باستاماشىل توپتاردىڭ، كولىك، ەڭبەك جانە حالىقتى الەۋمەتتىك قورعاۋ، ادىلەت، سيفرلىق دامۋ جانە يننوۆاتسيالار مينيسترلىكتەرىنىڭ، سونداي- اق تاكسوپاركتەر قاۋىمداستىعىنىڭ وكىلدەرى) كىرەدى. بۇل تۋىندايتىن سىن-قاتەرلەردى ۋاقتىلى قاراۋعا مۇمكىندىك بەرەدى. سونىمەن قاتار، بولاشاقتا باسەكەلەستىكتى قورعاۋ سالاسىنداعى زاڭنامانى بۇزۋ فاكتىلەرى انىقتالعان كەزدە اگەنتتىك زاڭنامادا بەلگىلەنگەن ءتيىستى شارالاردى قولدانادى. كومپلاەنسپەن تولىعىراق مىنا جەردەن تانىسۋعا بولادى» دەپ مالىمدەدى اگەنتتىكتەن.
اۆتور
جانات قاپالبايەۆا
