ي. ماسك يمپورتتىق باج سالىعىن الىپ تاستاۋدى سۇرادى

استانا. قازاقپارات - ميللياردەر يلون ماسك دونالد ترامپتان يمپورتتىق باج سالىعىن الىپ تاستاۋدى سۇراعان.

 The Washington Post مالىمەتىنشە، كاسىپكەر اق ءۇي باسشىسىمەن ەكەۋ-ارا كەزدەسىپ، سويلەسكەن. ءبىراق بۇدان ناتيجە شىقپاعان كورىنەدى. امەريكا پرەزيدەنتىنە يمپورتتىق باج سالىعىن ەنگىزۋدى، ساۋدا بويىنشا كەڭەسشىسى پيتەر ناۆاررو ۇسىنعان. ءبىراق يلون ماسكتىڭ تاريفتەرگە قاتىستى كوزقاراسى باسقا. سوندىقتان ميللياردەر ونى الەۋمەتتىك جەلىدە قاتاڭ سىناپ-مىنەدى.

ال ساراپشىلار دونالد ترامپتىڭ ماڭايىنداعىلار اراسىندا الاۋىزدىق پايدا بولدى دەپ توپشىلادى. ىزىنشە اق ءۇيدىڭ باسپا ءسوز حاتشىسى كەرولاين ليۆيتت مالىمدەمە جاسادى.

 كەرولاين ليۆيتت، اق ءۇيدىڭ باسپا ءسوز حاتشىسى:

- بۇل ەكى ادامنىڭ ساۋدا جانە تاريفتەر بويىنشا كوزقاراستارى مۇلدەم سايكەس كەلمەيتىنى انىق. اق ءۇيدىڭ جۇمىسى اشىق جۇرگىزىلەدى. سوندىقتان ولار پىكىر تالاستىرۋعا حاقىلى. بۇل پرەزيدەنت ءارتۇرلى تاراپتىڭ پىكىرىن تىڭداۋعا دايىن ەكەنىن كورسەتەدى. ءبىراق دونالد ترامپ بارلىق جاقتىڭ پىكىرىن ەسكەرە وتىرىپ، امەريكا حالقىنىڭ مۇددەسىنە ساي، ەڭ ءتيىمدى شەشىم قابىلدايدى.

 24.kz