وزبەكستاندا تۋىستار اراسىنداعى نەكەگە تىيىم سالۋ ۇسىنىلدى

تاشكەنت. KAZINFORM - وزبەكستاندا جاقىن تۋىستارمەن نەكەلەسۋگە تىيىم سالۋ ۇسىنىلادى. وتباسى جانە ايەلدەر ىستەرى كوميتەتى «وتباسى كودەكسىنە» وسىنداي وزگەرىس ەنگىزۋدى جوسپارلاپ وتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

قوعامدىق تالقىلاۋعا شىعارعان قۇجاتتا جازىلعانداي، وزبەكستاندا ەكىنشى، ءۇشىنشى جانە ءتورتىنشى دارەجەلى تۋىستىق قاتىناسى بار ادامدار اراسىندا نەكەگە تىيىم سالۋ قاراستىرىلىپ وتىر.

2023 -جىلى تۋا بىتكەن دەرت پەن گەنەتيكالىق اۋرۋى بار بالالاردىڭ %9,7- ى جاقىن تۋىستاردىڭ نەكەسىنەن تۋعان.

«تالداۋعا سايكەس، 2023 -جىلى تۋا بىتكەن دەرتى مەن گەنەتيكالىق اۋرۋى بار بالالاردى %9,7- ى جاقىن تۋىستاردىڭ نەكەسىنەن تۋعان. 2021 -جىلى بۇل كورسەتكىش - %9,1، 2022 -جىلى %8,3 بولعان ەدى. بۇل رەتتە ەڭ جوعارى كورسەتكىشتەر سۇرحانداريا (%31,6)، قاشقاداريادا (%26)، سىرداريا (13%)، انديجان (%12) ، سامارقان (%10,3) جانە بۇحارا وبلىستارىندا (%10,1) بايقالىپ وتىر»، - دەلىنگەن قۇجاتتا.

دەگەنمەن مەديتسينالىق گەنەتيكالىق تەست ناتيجەسى بويىنشا نەكە قۇرۋعا نيەتتى جۇپتار مەن ولاردىڭ بولاشاق پەرزەنتتەرىنىڭ دەنساۋلىعىندا ىقتيمال دەرتتەردىڭ بولمايتىنى تۋرالى دالەلدەمە الىنسا، وندا نەكەگە رۇقسات ەتىلەدى. بۇل ورايدا زاڭ جوباسىن ازىرلەگەن كوميتەت وڭتۇستىك كورەيا، رەسەي، شۆەيساريا، ۇلى بريتانيا، ۋكراينا، ا ق ش جانە كورشىلەس ەلدەردىڭ تاجىريبەسىن نەگىزگە العان.

اكەسى مەن اناسىنىڭ باۋىرلارى، ولاردىڭ بالالارى، اتاسى مەن اجەسىنىڭ باۋىرلارى، ولاردىڭ بالالارى جانە تاعى دا باسقالارى ەكىنشى، ءۇشىنشى جانە ءتورتىنشى دارەجەلى تۋىس بولىپ سانالادى.

ايتا كەتەيىك، قازىر وزبەكستاندا اتا-اناسى ءبىر جانە بولەك باۋىرلار مەن اپالى-سىڭلىلەر اراسىنداعى نەكەگە رۇقسات ەتىلمەيدى.

اۆتور

ءاليحان اسقار