وزبەكستاندا قىلمىستىق توپتىڭ 22 مۇشەسى ۇستالدى، ىشىندە م م ا سپورتشىسى بار

وزبەكستاننىڭ بارلىق اۋماعىندا قىلمىستىق توپتاردى ۇستاۋعا باعىتتالعان اۋقىمدى رەيدتەر ءجۇرىپ جاتىر. فەرعانا وبلىسىندا ۇيىمداسقان قىلمىستىق توپتىڭ 22 مۇشەسى ۇستالدى، ونىڭ اراسىندا م م ا سپورتشىسى حۋمويۋن تۋحتامۋرودوۆ بار.

بۇدان بولەك، ۇيىمداسقان توپتىڭ باسشىسى دا ۇستالدى. Kazinform اگەنتتىگى بۇل تۋرالى Gazeta.uz باسىلىمىنا سىلتەمە جاساپ حابارلايدى.

«ماڭىزدى 40 كۇن» اكسياسى اياسىندا وزبەكستاننىڭ بۇكىل اۋماعىندا كريمينوگەندىك جاعدايدى جاقسارتۋ جانە قىلمىستىڭ جولىن كەسۋ بويىنشا اۋقىمدى جەدەل الدىن الۋ شاراسى ءوتىپ جاتىر.

ءىس- شارا 21 -قاراشادان 31- جەلتوقسانعا دەيىن جالعاسادى.

فەرعانا وبلىسىنىڭ قۇقىق قورعاۋ ورگاندارى 248 تۇلعانىڭ تۇرعىلىقتى مەكەنجايىندا بىرلەسكەن جەدەل ىزدەستىرۋ شارالارىن، قىلمىس جاساۋعا بەيىم تۇلعالار تاراپىنان قۇقىق بۇزۋ فاكتىلەرىن انىقتاۋ بويىنشا 106 ءىس- شارا جۇرگىزدى، بۇل 66 قىلمىستى اشۋعا مۇمكىندىك بەردى.

ناتيجەسىندە 4,75 كەلى ەسىرتكى، 78 پسيحوتروپتىق جانە كۇشتى اسەر ەتەتىن زاتتار، 41 قارۋ، وق- ءدارى جانە سۋىق قارۋ رەتىندە پايدالانۋعا بولاتىن زاتتار، سونداي- اق 45 كومپيۋتەر، تەلەفون جانە ءدىني ادەبيەت تاركىلەندى.

قۇقىق قورعاۋ ورگاندارى قىلمىس جاساپ، سوت پەن تەرگەۋدەن قاشىپ، ىزدەۋدە بولعان 37 ادامدى ۇستادى.

«ارنايى شارا بارىسىندا قىلمىستىق توپتاردىڭ قۇرامىندا بولىپ، بۇزاقىلىق جاساعان 22 ادام ۇستالدى. ولاردىڭ اراسىندا ارالاس جەكپە- جەكپەن اينالىساتىن حۋمويۋن تۋحتامۋرودوۆ (لاقاپ اتى «بورز» ) بار. 27 -قاراشادا ول قوقاندا ەكى ادامعا دەنە جاراقاتىن سالىپ، وقيعا ورنىنان قاشىپ بارا جاتقاندا ۇستالدى»، - دەپ حابارلادى وبلىستىق ىشكى ىستەر دەپارتامەنتىنەن.

سونداي- اق فەرعانادا ۇيىمداسقان قىلمىستىق توپتىڭ باسشىسى ا. ماميروۆ قىلمىس جاساعان جەرىنەن ۇستالىپ، تەرگەۋ ورگاندارىنا تاپسىرىلدى.

اۆتور

زارينا تۋعانبايەۆا