وزبەكستاندا شاڭ كوتەرگەندەرگە ايىپپۇل سالىنۋى مۇمكىن

استانا. قازاقپارات - وزبەكستاندا شاڭ كوتەرىپ، اۋانى لاستاعاندارعا ايىپپۇل سالىنۋى مۇمكىن. بۇل نورما اسىرەسە قۇرىلىس كومپانيالارىنا قاتىستى. ءتيىستى قۇجاتتى سەنات دەپۋتاتتارى ماقۇلدادى.

زاڭدا كورسەتىلگەندەي، اينالانى شاڭداتقاندارعا 3 ميلليون سۋمنان 18 ميلليون سۋمعا دەيىن ايىپپۇل سالۋ كوزدەلگەن. ول ءبىزدىڭ اقشاعا اينالدىرعاندا شامامەن 120 مىڭ مەن 700 مىڭ تەڭگە ارالىعىندا بولادى. كەيبىر دەپۋتاتتار ايىپپۇل سومماسىنىڭ از ەكەنىن ايتىپ، ونى پاتەر باعاسىنىڭ شارشى مەترىمەن تەڭەستىرۋدى سۇرادى.

«سەبەبى قۇرىلىس كومپانيالارىنا ەكولوگياعا باس اۋىرتپاي، ايىپپۇل تولەپ جۇرە بەرگەن الدەقايدا ءتيىمدى»، - دەيدى ولار.

زاڭنىڭ ورىندالۋىن ەكولوگيا ينسپەكتورلارى قاداعالايدى. تابيعات جاناشىرلارىنىڭ كەلتىرگەن دەرەگىنە سۇيەنسەك، 500 شارشى مەتر قۇرىلىس الاڭىنان اۋاعا شامامەن 4,5 توننا شاڭ توزاڭ كوتەرىلەتىن كورىنەدى.

پوكيزا احمەدجانوۆا، وزبەكستان وليي ءماجىلىس سەناتورى:

- «اشىق قۇرىلىس» پورتالىندا زاڭدى بەلشەسىنەن باسقان قۇرىلىس كومپانيالارىنىڭ ۇپايلارىن الۋ قاجەت. رەيتينگى تومەن بولسا تۇتىنۋشىلار ولاردى اينالىپ وتەدى. قازىر وسىنداي ءتاسىل زاڭسىز اعاش كەسكەندەرگە قولدانىلىپ جاتىر. سالدارىنان ۇلكەن كومپانيالاردىڭ رەيتينگىلەرى ءتۇسىپ كەتكەن.

ەكولوگيا مينيسترلىگىنىڭ وكىلى دەپۋتات ۇسىنىسىن قولداپ، زاڭ شىققاننان كەيىن ارنايى تالاپ ەنگىزىلەتىنىن جەتكىزدى. ەسكە سالا كەتەيىك، الەمنىڭ ءىرى قالالارىندا اۋا ساپاسىن ناقتى ۋاقىت رەجيمىندە باقىلايتىن شۆەتساريا كومپانياسىنىڭ دەرەگىنشە تاشكەنت قالاسى ەكولوگياسى ناشار العاشقى وندىقتىڭ تىزىمىندە تۇر.

24.kz