وزبەكستان پرەزيدەنتى «قىتاي-قىرعىزستان-وزبەكستان» تەمىرجول جوباسىنا قاتىسۋشىلارعا بەينەۇندەۋ جولدادى
تاشكەنت. قازاقپارات – 6-ماۋسىمدا بەيجىڭدە «قىتاي- قىرعىزستان- وزبەكستان» تەمىر جولىن سالۋ جونىندەگى ستراتەگيالىق جوبانى جۇزەگە اسىرۋ تۋرالى كەلىسىمگە قول قويۋ ءراسىمى ءوتتى، دەپ حابارلايدى وزبەكستان پرەزيدەنتىنىڭ باسپا ءسوز قىزمەتى.

وزبەكستان رەسپۋبليكاسىنىڭ پرەزيدەنتى شاۆكات ميرزيەۆ ءىس-شاراعا قاتىسۋشىلارعا بەينەۇندەۋ جولدادى. كەلىسىمگە قول قويۋ راسىمىنە بايلانىستى قىتاي حالىق رەسپۋبليكاسىنىڭ ءتوراعاسى شي جينپيڭ مەن قىرعىز رەسپۋبليكاسىنىڭ پرەزيدەنتى سادىر جاپاروۆ تا ءوز ۇندەۋلەرىن جولدادى.
وزبەكستان باسشىسى بۇل ماڭىزدى ينفراقۇرىلىمدىق جوبانى جۇزەگە اسىرۋدىڭ باستالۋى كەڭ بايتاق وڭىردەگى ەكونوميكالىق جانە كولىكتىك بايلانىستى نىعايتۋعا باعىتتالعان تاريحي وقيعا ەكەنىن اتاپ ءوتتى.
- بۇل تەمىر جول قىتايدى ءبىزدىڭ ايماقپەن بايلانىستىراتىن ەڭ قىسقا قۇرلىقتاعى جولعا اينالادى. بۇل جول ءبىزدىڭ ەلدەرگە بولاشاعى زور ترانساۋعاندىق ءدالىز ارقىلى وڭتۇستىك ازيا مەن تاياۋ شىعىستىڭ كەڭ نارىعىنا شىعۋعا مۇمكىندىك بەرەدى، - دەدى شاۆكات ميرزيەۆ.
جوبانى ىسكە اسىرۋ ناتيجەسىندە پايدا بولاتىن ەكونوميكالىق تيىمدىلىك جاڭا كاسىپورىندار مەن ون مىڭداعان جۇمىس ورىندارىن قۇرۋعا، ءوزارا ساۋدا كولەمىن ەكى ەسەگە ارتتىرۋعا، وندىرىستىك كووپەراتسيانى كەڭەيتۋگە، ينۆەستيتسيالىق تارتىمدىلىقتىڭ وسۋىنە جانە ەڭ باستىسى، حالىقتىڭ ءومىر ءسۇرۋ دەڭگەيىنىڭ ارتۋىنا سەپتىگىن تيگىزەدى.
كەلىسىمگە سايكەس، «قىتاي- قىرعىزستان- وزبەكستان» تەمىر جولى قاشعار- تورۋگارت- ماكمال- جالالاباد- ءاندىجان باعىتى بويىنشا وتەدى. مامانداردىڭ ايتۋىنشا، جۇك تاسىمالداۋدىڭ جىلدىق كولەمى 15 ميلليون تونناعا جەتۋى مۇمكىن. ال تاۋاردى سوڭعى تۇتىنۋشىلارعا جەتكىزۋ مەرزىمى 7 كۇنگە دەيىن قىسقارادى. سونىمەن قاتار، زاماناۋي ترانزيتتىك- لوگيستيكالىق ينفراقۇرىلىم، قويمالار مەن تەرمينالدار قۇرىلادى.
اۆتور
جاراسقان نۇرىبايەۆ