وزبەكستان پرەزيدەنتى كونستيتۋتسيا كۇنىنە وراي 483 ادامعا راقىمشىلىق جاسادى
تاشكەنت. KAZINFORM - كونستيتۋتسيا كۇنىنە وراي وزبەكستان پرەزيدەنتى شاۆكات ميرزييەۆ «جازاسىن وتەپ جاتقان، ىستەگەن ىسىنە وكىنەتىن جانە ءومىرىن وزگەرتۋگە بەت العان ادامدار توبىنا راقىمشىلىق جاساۋ» جارلىعىنا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جارلىققا ساي، 483 ادامعا راقىمشىلىق جاسالدى. ولاردىڭ ىشىندە 107 سوتتالعان نەگىزگى جازاسىن وتەۋدەن تولىق بوساتىلسا، 275 ادام مەرزىمىنەن بۇرىن شارتتى تۇردە بوستاندىققا شىعادى. سونىمەن قوسا، 7 ادامنىڭ جازاسى جەڭىلدەتىلىپ، باس بوستاندىعىنان ايىرىلعان 94 ازاماتتىڭ مەرزىمدەرى قىسقاردى.
راقىمشىلىق جاسالعانداردىڭ قاتارىندا شەت مەملەكەتتەردىڭ 25 ازاماتى، 32 ايەل، 60 جاستان اسقان 5 ەر ادام، 30 جاسقا دەيىنگى 274 ادام (ونىڭ ىشىندە 104 ادام كامەلەتكە تولماعان)، سونداي-اق تىيىم سالىنعان ۇيىمداردىڭ قىزمەتىنە قاتىسقان 6 ادام بار.
«بۇل - ەلىمىزدە جۇرگىزىلىپ جاتقان گۋمانيزم ساياساتىنىڭ جانە حالقىمىزدىڭ مەيىرىمدىلىك پەن جاناشىرلىق سياقتى اسىل قاسيەتتەرىنىڭ جارقىن كورىنىسى»، - دەلىنگەن وزبەكستان باسشىسىنىڭ باسپا ءسوز قىزمەتى تاراتقان حابارلامادا.
جارلىقتى ورىنداۋ شەڭبەرىندە جاۋاپتى ۆەدومستۆولارعا راقىمشىلىق العان ادامداردى وتباسىنا قايتارۋ، ولاردىڭ قوعامعا بەيىمدەلۋىنە جاردەمدەسۋ جانە جۇمىسقا ورنالاستىرۋ جونىندە تاپسىرمالار بەرىلدى.
ەسكە سالايىق، بيىل ساۋىردە ورازا ايت قارساڭىندا وزبەكستان پرەزيدەنتى شاۆكات ميرزيەۆ 426 ادامعا راقىمشىلىق جاساعان ەدى.
