وزبەكستان پرەزيدەنتى جەمقورلىقپەن كۇرەسكە جاۋاپتى 117 شەنەۋلىكتى قىزمەتىنەن بوساتۋدى تاپسىردى
تاشكەنت. KAZINFORM - وزبەكستان پرەزيدەنتى شاۆكات ميرزيەۆ سىبايلاس جەمقورلىققا قارسى ۇلتتىق كەڭەستىڭ كەڭەيتىلگەن وتىرىسىن وتكىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ونىڭ بارىسىندا وزبەكستان باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ جۇمىسىن سىنعا الدى. شاۆكات ميرزيەۆتىڭ ايتۋىنشا، ۆەدومستۆو تەك ستاتيستيكامەن اينالىسىپ، قىلمىستاردىڭ الدىن الۋعا دەن قويمايدى.
- اگەنتتىك قىزمەتكەرلەرى مينيسترلىكتەر مەن وڭىرلەرگە بارىپ، ماسەلەنى ناقتى شەشۋدىڭ ورنىنا قوزعالعان قىلمىستىق ىستەردىڭ سانىن عانا ەسەپتەۋمەن اينالىسىپ كەلەدى. ياعني، ۆەدومستۆو ستاتيستيستيكا قۇرىلىمىنىڭ قىزمەتىن اتقارىپ وتىر، - دەدى وزبەكستان باسشىسى.
ول اتاپ وتكەندەي، ەلدەگى جەمقورلىق قىلمىستارىنىڭ %75- ى اۋداندار مەن ماحالليالاردا انىقتالعان. ماسەلەن، پاراقورلىق دەرەكتەرى نىسانداردى ورتالىق ينفراقۇرىلىمعا قوسۋ، ليتسەنزيا الۋ، جەڭىلدىكپەن بەرىلەتىن نەسيە ۇسىنۋ جانە جۇمىسقا قابىلداۋ كەزىندە جيى تىركەلەدى.
تيىسىنشە، شاۆكات ميرزيەۆ سالاعا جاۋاپتى ۆەدومستۆو قىزمەتكەرلەرىنىڭ جۇمىسىن جەتىلدىرۋدى تاپسىردى. وسىعان بايلانىستى وزبەكستان باسشىسى پرەمەر- مينيستر ابدۋللا اريپوۆقا 117 مينيسترلىك پەن مەملەكەتتىك ورگانداعى سىبايلاس جەمقورلىققا قارسى كۇرەس شارالارىنا جاۋاپتى مامانداردى جۇمىستان بوساتۋدى تاپسىردى.
- ولاردىڭ ورنىنا ادال، ءبىلىمدى ءارى كاسىبي كادرلاردى تاعايىنداۋ قاجەت. سايكەسىنشە، ولارعا ناقتى مىندەتتەر جۇكتەۋ ماڭىزدى. بۇدان باسقا، مينيسترلەر ءوز ۆەدومستۆولارىنداعى سىبايلاس جەمقورلىق قىلمىستارى ءۇشىن ساياسي جاۋاپكەرشىلىك الۋى ءتيىس، - دەدى ش. ميرزيەۆ.
ەسكە سالايىق، بىلتىر وزبەكستاندا قىلمىستىق جاۋاپقا تارتىلعان لاۋازىمدى تۇلعاردىڭ سانى %37,2- عا ءوستى. تيىسىنشە، جەمقور شەنەۋنىكتەر مەملەكەتكە $278,3 ميلليون زالال كەلتىردى.
بۇعان دەيىن حابارلاعانىمىزداي، وزبەكستاندا جەمقورلىققا بەيىم كەلەتىن شەنەۋنىكتەردى ەرتە انىقتاۋ تاجىريبەسى ەنگىزىلمەك.
سونىمەن قاتار، بىلتىر كورشىلەس ەلدە ەكونوميكانىڭ دامۋىنا سەلقوس قاراعان 300-گە جۋىق شەنەۋنىك جۇمىستان بوساتىلدى.
مۇنىمەن بىرگە، وزبەكستاندا ينۆەستيتسيا تارتۋ ىسىندە ولقىلىققا جول بەرگەن ءبىرقاتار جوعارى لاۋازىمدى شەنەۋنىك قىزمەتىن بوساتقان بولاتىن.
سونىمەن قاتار، 2024 -جىلى وزبەكستاندا مەملەكەتتىك قىزمەتتە ءجۇرىپ، كاسىپكەرلىك سۋبەكتىلەرىنە يەلىك ەتكەن مينيسترلىكتەردىڭ 398 مامانى انىقتالدى.
اۆتور
ءاليحان اسقار
