وزبەكستان مەن تۇركيا قورعانىس سالاسىنداعى ءوزارا ءىس-قيمىلدى نىعايتا تۇسپەك

تاشكەنت. KAZINFORM - وزبەكستان پرەزيدەنتى شاۆكات ميرزيەۆتىڭ تۇركياعا جاساعان رەسمي ساپارى بارىسىندا 20 قۇجاتقا قول قويىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

Өзбек президенті
Фото: Өзбекстан президентінің баспасөз қызметі

ساپار بارىسىندا ەكى ەل باسشىلارى اۋەلى شاعىن قۇرامدا كەزدەسۋ وتكىزدى. ونىڭ اياسىندا شاۆكات ميرزيەۆ پەن رەجەپ تايپ ەردوعان وزبەك-تۇرىك قارىم-قاتىناسىن نىعايتۋ، ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى تەرەڭدەتۋ ماسەلەلەرىن تالقىلادى.

سونداي-اق، تاراپتار ءوزارا تاۋار اينالىمىن 5 ميلليارد دوللارعا جەتكىزۋگە ۋاعدالاستى. ەكى ەل پرەزيدەنتتەرى اۋىل شارۋاشىلىعى، سۋ رەسۋرستارىن باسقارۋ جانە سيفرلاندىرۋ سالاسىنداعى ارىپتەستىكتى كەڭەيتۋ ماسەلەلەرىن دە ءسوز ەتتى.

بۇعان قوسا، شاۆكات ميرزيەۆ پەن رەجەپ تايپ ەردوعان قاۋىپسىزدىك پەن قورعانىس، تەرروريزم، ەكسترەميزم جانە راديكاليزمگە قارسى ءىس-قيمىل بويىنشا سەرىكتەستىكتى نىعايتۋ قاجەتتىگىن اتاپ ءوتتى.

بۇل رەتتە وزبەكستان مەن تۇركيا باسشىلارى گازا سەكتورىنداعى زورلىق-زومبىلىقتى تەز ارادا توقتاتۋ جانە پالەستينا-يزرايل قاقتىعىسىن بەيبىت جولمەن شەشۋدىڭ ماڭىزدىلىعىنا توقتالدى.

«تۇراقتىلىق پەن ۇزاق مەرزىمدى بەيبىتشىلىك ورناتۋ ءۇشىن تاۋەلسىز ءارى ەركىن پالەستينا مەملەكەتىن قۇرۋ قاجەت»، - دەپ ءمالىم ەتتى ش. ميرزيەۆ.

شاعىن قۇرامداعى كەزدەسۋدەن سوڭ شاۆكات ميرزيەۆ پەن رەجەپ تايپ ەردوعاننىڭ توراعالىعىمەن وزبەك-تۇرىك ىسكەرلىك كەڭەسىنىڭ ءبىرىنشى وتىرىسى ءوتتى. وعان ەكى ەلدىڭ جەتەكشى كومپانيالارىنىڭ باسشىلارى دا قاتىستى.

كەڭەستە تاراپتار ەكىجاقتى ساۋدا-ەكونوميكالىق ىنتىماقتاستىقتى ودان ءارى ارتتىرۋ ماقساتىندا ونەركاسىپتىك كووپەراتسيانى ىلگەرىلەتۋ، قوسىلعان قۇن سالىعى جوعارى تاۋارلار ءوندىرىسىن ءوز اۋماعىنا شوعىرلاندىرىپ، سول ارقىلى وزگە ەلدەردىڭ نارىعىنا بىرلەسىپ شىعۋ ماسەلەلەرىن قاراستىردى.

مۇنىمەن قاتار، پرەفەرەنتسيالىق ساۋدا تۋرالى كەلىسىم شەڭبەرىندە كەدەندىك تاريفتەردى تومەندەتۋ، ستامبۋل قالاسىندا وزبەكستاننىڭ ساۋدا وكىلدىگىن اشۋ بويىنشا كەلىسىمدەر جاسالدى.

كەلىسسوز بارىسىندا ەكى ەلدىڭ كولىك-لوگيستيكالىق الەۋەتىن، ونىڭ ىشىندە ورتا ءدالىزدىڭ مۇمكىندىكتەرىن ءتيىمدى پايدالانۋ تەتىكتەرى تالقىلاندى.

ودان كەيىن ستراتەگيالىق ىنتىماقتاستىق كەڭەسىنىڭ ءۇشىنشى وتىرىسى ءوتتى. ونىڭ قورىتىندىسى بويىنشا وزبەكستان مەن تۇركيا باسشىلار كەشەندى ستراتەگيالىق ارىپتەستىكتى تەرەڭدەتۋ تۋرالى بىرلەسكەن دەكلاراتسياعا قول قويدى.

جالپى كەلىسسوزدەر ناتيجەسىندە تاراپتار ارىپتەستىكتىڭ سان سالاسىن قامتيتىن 19 قۇجاتقا قول قويدى. سايكەسىنشە، قوس پرەزيدەنت ءوز ۇكىمەتتەرىنە ءار باعىتتى دامىتۋعا ارنالعان «جول كارتاسىن» ازىرلەۋدى تاپسىردى.

اۆتور

ءاليحان اسقار

سوڭعى جاڭالىقتار