وزبەكستان كيىك سانىن كوبەيتۋدى كوزدەيدى
استانا. KAZINFIRM - وزبەكستاندا 100 شاقتى عانا كيىك قالدى. بۇل جەرگىلىكتى ەكولوگتاردى الاڭداتىپ وتىر، دەپ حابارلايدى 24kz.
ولاردىڭ ايتۋىنشا، وسىدان 20-25 جىل بۇرىن اقبوكەندەردىڭ كوپتىگىنەن جەر قايىساتىن. ويتكەنى قازاق دالاسىن جايلاعان مىڭداپ، ميلليونداپ سانالاتىن كيىك بالاسى جازدا سارى ارقانى جايلاۋ ەتسە، قىستاۋى وزبەكستان، قاراقالپاقستاندى پانالايتىن. ەندى جىلى جاقتا كيىك قالمادى. وعان سەبەپ نە؟
الەمدەگى كيىكتىڭ %99- ءى قاشاننان قازاق جەرىن مەكەندەيدى. كيەلى جانۋارلار كەڭ بايتاق دالانىڭ ەركەسى. قازىر ءتىپتى ادامنان ۇرىكپەيدى. اۋىل ىشىنە ەمىن-ەركىن كىرىپ، ازىق ىزدەيتىن بولعان. كەڭەس ۇكىمەتى تۇسىندا اقبوكەندەردىڭ ءبىر بولىگى كۇن سۋىتا وزبەكستان اۋماعىنا ءوتىپ جۇرگەن. ءبىراق شەكارا بەكىتىلگەنەن سوڭ كوش توقتاعان. ەكولوگتار وسىلاي دەيدى.
الەكساندر كازاكو، وزبەكستان ەكولوگيا جانە قورشاعان ورتا مينيسترلىگى سىرتقى ساياسات ءبولىمىنىڭ باس مامانى:
- شەكارا تەمىر سىممەن تارتىلدى. تەمىر جول سالىندى. سودان كەيىن كيىكتەردىڭ كوشىپ ءجۇرۋ ميگراتسياسى بۇزىلدى. قازىر بىزدە اقبوكەندەرگە ارنالعان قورىق بار. اۋماعى 1 ميلليون گەكتار جەردى الىپ جاتىر. الايدا كيەلى جانۋارلاردىڭ سانى 100 ءدىڭ ار جاق بەر جاعىندا. ال قازاقستاندا 2 ميلليوننان استى.
وسىمدىكتىڭ 33 تۇرىمەن قورەكتەنەتىن، كۇنىنە 40 شاقىرىم ءورىس جاسايتىن كيىكتەردىڭ تابيعات بولجاۋ قاسيەتى دە بار. قالىڭ قار جاۋار، اياز قاتتى بولاتىن جىلدارى اقبوكەندەر ارقادان بەتپاقدالا ارال-قاراقۇمعا دەيىن بارىپ قىستايدى. بۇل كيىكتىڭ ەجەلگى جولى. وزبەكستان ەكولوگتارى ەندى كيىك سانىن كوبەيتۋ ءۇشىن قازاقستاننىڭ تاجىريبەسىنە سۇيەنبەك.
حاليوللا شەرىمبەتوۆ، وزبەكستان ەكولوگيا جانە قورشاعان ورتا مينيسترلىگىنىڭ باسقارما باسشىسى:
- كيىكتەر تەز كوبەيەدى. ەگەر بار جاعدايدى جاساساق، پوپۋلياتسياسىن قالپىنا كەلتىرە الامىز. ءبىراق ءۇستىرت اقبوكەندەرى ونسىز دا كوپ ەمەس. 5 ءتۇرىنىڭ ىشىندە ەڭ ازى سانالادى. وسى تۇستا قازاقستانمەن بىرلەسە جۇمىس ىستەۋىمىز كەرەك. بىزدە 2010 -جىلى جاسالعان كيىكتەردى قورعاۋ جونىندەگى مەملەكەتارالىق كەلىسىم بار. سونىڭ تالاپتارىن ورىنداۋدى جەدەلدەتپەك نيەتتەمىز.
قازاقستان كيىك پوپۋلياتسياسىن جويىلىپ كەتۋدەن ساقتاپ، قايتا قالپىنا كەلتىرگەن بىردەن-ءبىر مەملەكەت. حالىقارالىق تابيعاتتى قورعاۋ ۇيىمدارى كيىككە جاسالعان قامقورلىقتى جوعارى باعالايدى. الايدا قازىرگى اقبوكەندەردىڭ كوپتىگى جەرگىلىكتى شارۋالاردىڭ كاسىبىنە كەدەرگى كەلتىرگەن. ەگىس القاپتارىنا ءتۇسىپ، جايلىمداردى تاپتاپ كەتەدى. قازىر بۇل ماسەلە كۇن تارتىبىندە تۇر.
