وزبەكستان بىزگە تەرى شيكىزاتىنىڭ كوزى رەتىندە قاراپ وتىر - نۇرمان نۇپتەكەيەۆ
استانا. KAZINFORM - قازاقستان- وزبەك ىسكەرلىك كەڭەسى وتىرىسىنىڭ قورىتىندىسى بويىنشا تەرى وڭدەۋ سالاسىندا ارىپتەستىك ورناتۋ تۋرالى كەلىسىمگە قول قويىلعان ەدى.
قازاقستان تەرى جانە ءجۇن وڭدەۋشىلەر قاۋىمداستىعىنىڭ ءتوراعاسى نۇرمان نۇپتەكەيەۆ Kazinform تىلشىسىنە وسى كەلىسىمىنىڭ استارىندا قانداي ۋاعدالاستىقتار جاتقانىن ايتتى.
«وتكەندە قازاقستان مەن وزبەكستاننىڭ اۋىل شارۋاشىلىعى ۆيتسە-مينيسترلەرىنىڭ كەزدەسۋى بولدى. سول كەزدەسۋگە ەكى ەلدىڭ اۋىلشارۋاشىلىعى تاۋار وندىرۋشىلەرىنىڭ وكىلدەرى دە قاتىستى. قازاقستان تەرى جانە ءجۇن وڭدەۋشىلەر قاۋىمداستىعىنىڭ اتىنان مەن دە قاتىستىم.
بۇگىنگى ىسكەرلىك كەڭەس وتىرىسىندا قول قويىلعان قۇجاتتىڭ جاي-جاپسارى سول كەزدە ناقتىلانعان. ازىرگە ول قۇجاتتا ناقتى ءبىر ارەكەت، ايقىن جوبا نەمەسە ارىپتەستىكتىڭ الگوريتمدەرى كورسەتىلمەگەن. جالپىلاما ماندەگى ۋاعدالاستىقتار عانا دەۋگە بولادى. سول كەزدەسۋدەن تۇيگەنىم، وزبەك تاراپى بىزدەن وڭدەۋگە جارامدى تەرىنى شيكىزات رەتىندە الىپ وتىرعىسى كەلەدى. وڭدەۋگە جارامدى تەرى دەگەن - بۇقانىڭ تەرىسى. ءىرى قارادان باسقا ءتولدىڭ تەرىسى تۋرالى اڭگىمە جوق بۇل جەردە.
قازىر قازاقستان اۋماعىنان شىعاتىن تەرىگە 200 دوللار كولەمىندە كەدەندىك باج. وزبەكستاندىق ارىپتەستەر سول باجدى الىپ تاستاساق، وڭتۇستىك وڭىردەن تەرى قابىلدايتىن بەكەتتەر اشۋعا دايىن ەكەندەرىن ايتتى»، - دەيدى كاسىپكەر.
تەرى وڭدەۋشىلەر قاۋىمداستىعىنىڭ باسشىسى مۇنداي سيپاتتاعى ارىپتەستىكتىڭ پايداسى تۋرالى كۇمانى بار.
«ارىپتەستىك ورناتىپ، تەرەزەسى تەڭ سەرىكتەس بولعىسى كەلسە، وندا الماتىداعى تەرى وڭدەۋ زاۋىتىنا ينۆەستيتسيا سالىنۋى دۇرىس بولادى. سول جەرگە بۇكىل قازاقستاننان تەرى جيناپ، اياق كيىم تىگىپ، جارتىلاي وڭدەلگەن دايىن ءونىم (Wet Blue) جاسالسا دەگەن وي بار.
ال شيكى تەرىنى باجسىز وتكىزىپ جىبەرسەك، قىسقارىپ-قىسقارىپ جابىلۋدىڭ از الدىندا تۇرعان 4 زاۋىتتى تۇبەگەيلى تۇرالاتامىز. تىم قۇرىعاندا وڭدەلگەن تەرى كۇيىندە جونەلتەيىك. ونداي ءونىم دايىنداۋعا بىزدەگى زاۋىتتار دايىن. تاپسىرىس ارقىلى رەسمي تۇردە الىپ وتىرادى. ال قازىرگى ايتىپ وتىرعان ۇسىنىستارى ءبىزدى شيكىزات بەرەتىن «ساۋىن سيىر» رەتىندە پايدالانۋ نيەتىنە كوبىرەك ۇقسايدى. رەسەي، تۇركيا، قىتايدان كەيىن وزبەكستانعا شيكىزات جەتكىزۋشى ەل بولامىز دەمەسەك، ارىپتەستىكتى تەڭ تەرەزەلى دەڭگەيدە ورناتۋىمىز قاجەت»، - دەيدى نۇرمان نۇپتەكەيەۆ.
ونىڭ ايتۋىنشا، بۇگىن ەكى تاراپ قول قويعان كەلىسىم قازاقستانداعى تەرى وڭدەۋ ماسەلەسىن شەشەتىن قۇجات بولادى دەپ ايتۋعا ەرتە.
«ءالى دە پىسىقتاپ، ءوز مۇددەمىزگە سايكەستەندىرمەسەك بولمايدى. بۇل تۇرعىدا ءبىزدىڭ مەملەكەتتىك ورگاندار وتاندىق تەرى وڭدەۋشىلەردىڭ ۇستانىمىنا قۇلاق ءتۇرۋى كەرەك. وزبەكستاندىق قاۋىمداستىقتىڭ باسشىلارى جىلىنا 1,5 ميلليون تەرى وڭدەيتىن زاۋىت اشقاندارىن، سوعان شيكىزات جەتپەي تۇرعانىن ايتادى. سول شيكىزاتتان اياق كيىم تىگىپ، ەۋروپاعا ساتپاقشى. ايتۋلارىنشا، قازىردىڭ وزىندە-اق ەۋروپاعا كيىم جەتكىزە باستاعان. وسى تەرى وڭدەيتىن جاڭا زاۋىتتىڭ كارىز تازارتۋ جۇيەسىن 6 ميلليون دوللارعا سالىپ بەرگەن. ال بىزدە ازىرگە نەسيە الۋدىڭ ءوزى قيىن. قازىر زاۋىتتار تەرى وڭدەپ، ونى جەلاتينگە جىبەرىپ، اۋپىرىمدەپ كۇنەلتىپ وتىر»، - دەيدى نۇرمان نۇپتەكەيەۆ.
اۆتور
ەسىمجان ناقتىباي
