وزبەكستان باسشىسى مەملەكەتتىك ورگاندارعا قىزمەتتىك شىعىنداردى قىسقارتۋدى تاپسىردى
تاشكەنت. KAZINFORM - وزبەكستان پرەزيدەنتى شاۆكات ميرزيەۆ ورتالىق جانە جەرگىلىكتى مەملەكەتتىك ورگانداردى بيۋدجەت قاراجاتىن قاتاڭ ۇنەمدەۋگە مىندەتتەيتىن قاۋلىعا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

قۇجاتقا سايكەس، بيۋدجەت تاپشىلىعىنىڭ شەكتى دەڭگەيىنەن (%3 -دان كوپ بولماۋى ءتيىس) اسىپ كەتەتىن شىعىندارعا قوسىمشا كىرىس بولعان كەزدە نەمەسە وزگە دە قاجەتتىلىكتەرگە باعىتتالاتىن قاراجاتتى قىسقارتۋ ەسەبىنەن عانا رۇقسات ەتىلەدى.
بۇل رەتتە مەملەكەتتىك ورگاندارعا جوعارى لاۋازىمدى شەنەۋنىكتەردىڭ جالاقىسىن كوتەرۋ (ەڭ تومەنگى جالاقى مولشەرىن كوتەرۋدى ەسەپتەمەگەندە) ، قىزمەتتىك كولىك پەن قىمبات جيھاز جانە كەڭسە كەرەك-جاراقتارىن ساتىپ الۋ بويىنشا باستاما كوتەرۋگە تىيىم سالىنادى. ورىندى قاجەتتىلىك بولسا، وندا قاراجات تىكەلەي مينيسترلەر كابينەتىنىڭ كەلىسىمى نەگىزىندە بولىنەدى.
سونىمەن، بيۋدجەتتى جوسپارلاۋ بارىسىندا مەملەكەتتىك ۇيىمداردىڭ جيھاز بەن كەڭسە كەرەك-جاراقتارىنا ارنالعان شىعىندارىن بىلتىرمەن سالىستىرعاندا %10- عا قىسقارتۋ تاپسىرىلدى.
بۇعان قوسا، حوكيمياتارعا جەرگىلىكتى بيۋدجەت ەسەبىنەن شتات سانىن ۇلعايتۋعا تىيىم سالىنادى.
ەسكە سالايىق، بىلتىر جەلتوقساندا وزبەكستان پارلامەنتى ەلدىڭ 2025 -جىلعا ارنالعان بيۋدجەتىن ماقۇلدادى. وعان ساي، شوعىرلاندىرىلعان بيۋدجەت كىرىسى 431 تريلليون سۋم (شامامەن $33,4 ميلليارد)، شىعىستار 480,5 تريلليون سۋم ($37,3 ميلليارد) شاماسىندا جوسپارلانعان.
سونىمەن قاتار، وزبەكستاندا جەمقورلىققا بەيىم كەلەتىن شەنەۋلىكتەردى ەرتە انىقتاۋ تاجىريبەسى ەنگىزىلمەك.
اۆتور
ءاليحان اسقار