پويىزداردا ۇشاقتاعىداي تاماقتانۋ جۇيەسىن ەنگىزۋ جوسپارلانىپ وتىر

ونىڭ ايتۋىنشا، ۇلتتىق تاسىمالداۋشى جولاۋشىلارعا تاماق ۇسىنۋدىڭ جاڭا تاسىلدەرىن قاراستىرىپ جاتىر.

- الداعى ۋاقىتتا تاماقتانۋ قىزمەتىن جەتىلدىرۋدى جوسپارلاپ وتىرمىز. اتاپ ايتقاندا، ۇشاقتارداعىداي تاماقتانۋ جۇيەسىن جاساعىمىز كەلەدى. تاعامدار شاعىن پورتسيامەن، جولاۋشىلارعا ىڭعايلى ەتىپ ۇسىنىلادى. ال قالاعاندار قوسىمشا پورتسياعا تاپسىرىس بەرە الادى، - دەدى ءانۋار احمەتجانوۆ.

سونىمەن قاتار كومپانيا جولاۋشىلارعا پويىزدا وتىرىپ، جەتكىزۋ قىزمەتتەرى ارقىلى قالاعان تاعامىنا تاپسىرىس بەرۋ مۇمكىندىگىن ۇسىنۋدى كوزدەپ وتىر.

ءانۋار احمەتجانوۆتىڭ ايتۋىنشا، مۇنداي قىزمەتتەردى دامىتۋعا پويىزداردا سپۋتنيكتىك ينتەرنەتتىڭ ىسكە قوسىلۋى مۇمكىندىك بەرەدى. جولاۋشىلار جول ۇستىندە تاماققا تاپسىرىس بەرۋمەن قاتار، ۆوكزالعا الدىن الا تاكسي شاقىرىپ، وزدەرىنە قاجەتتى ونلاين قىزمەتتەردى پايدالانا الادى.

- ينتەرنەت ءبىز ءۇشىن تۇپكى ماقسات ەمەس. بۇل - جاڭا قوسىمشا قىزمەتتەردى دامىتۋدىڭ نەگىزى. قوزعالىستاعى پويىزدا تۇراقتى سيفرلىق بايلانىستىڭ بولۋى بۇرىن بولماعان مۇمكىندىكتەرگە جول اشادى، - دەدى باسقارما ءتوراعاسى.

ازىرگە ۇشاقتارداعىداي تاماقتانۋ جۇيەسىنىڭ ناقتى قاشان ەنگىزىلەتىنى ايتىلعان جوق.

ايتا كەتەيىك، بۇعان دەيىن قازاقستاندا 51 باعىت بويىنشا قاتىنايتىن 108 پويىز قۇرامىنداعى 1500-دەن استام ۆاگون Starlink سپۋتنيكتىك ينتەرنەتىمەن جابدىقتالعانى حابارلاندى.