ويىنشىلارى و باستان مىقتى قۇراما مەن باپكەر عانا باسىمدىققا يە - ستانيسلاۆ چەرچەسوۆ
استانا. KAZINFORM - فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ اگەنتتىك تىلشىسىنە بەرگەن سۇحباتىندا الداعى جوسپارى مەن لەگيونەرلەرگە قاتىستى پىكىر ءبىلدىردى.
- ستانيسلاۆ سالام ۇلى، بيىلعا قانداي جوسپارىڭىز بار؟
- ءجيى قويىلاتىن سۇراق. ءبىراق، ويىن قاشان وتەتىنىن، نەگە دايىندالۋ كەرەكتىگىن بىلمەي جاتىپ جوسپار قۇرۋ مۇمكىن ەمەس. قازىر جەرەبە تاستالدى، ەندى قاشان، قايدان باستايتىنىمىزدى انىق تۇسىنەمىز. جوسپار وسىدان شىعادى.
بىزدە سىرتتا ەكى ويىن اشىق الاڭدا وتەدى، دەمەك «قالاي دايىندالامىز؟» دەگەن سۇراق اۆتوماتتى تۇردە تۋىندايدى. قازاقستاندا ناۋرىز ايىندا كۇن سالقىن، سوندىقتان اشىق الاڭ دايىن بولمايدى. قازىر وسى ماسەلەنى قالاي شەشۋ كەرەكتىگىن تالقىلاپ جاتىرمىز. مۇمكىن ءبىر جەرگە جينالاتىن شىعارمىز. جاڭا عانا ليگانىڭ جاڭا پرەزيدەنتىمەن وسى ماسەلە تۋرالى سويلەستىك. جۇمىس ءجۇرىپ جاتىر، ونىڭ كوبى كوزگە تۇسپەيدى، سىزدەر تەك 90 مينۋتتىق ويىندى عانا كورەسىزدەر.
- قانداي وزگەرىستەر بولۋى مۇمكىن؟
- ارينە، وزگەرىستەر بولادى. مىسالى، باۋىرجان يسلامحان جاعىمسىز جاعدايعا تاپ بولدى. جاراقات الدى، وتا جاسالدى، وكىنىشكە قاراي ناۋرىز ايىندا بولمايدى. وسى ۋاقىت ىشىندە بەلگىلى دەڭگەيگە كوتەرىلگەن ويىنشى.
كىم، قانداي كۇيدە؟ قاي كلۋبقا اۋىسادى؟ كىم، قالاي وينايدى؟ باپكەر فۋتبولشىنى قانداي پوزيتسيادا قولدانادى؟ وسى سياقتى سۇراقتارعا قاتىستى ەشتەڭە ايتا المايمىن.
مەن قانشا جىلدان بەرى رەسەي قۇراماسىندا، قازاقستان قۇراماسىندا جۇمىس ىستەپ كەلەم. ءبارى ءبىز جوسپارلاعانداي بولعانىن كورگەن ەمەسپىن، ەشقاشان ولاي بولعان ەمەس. ويتكەنى، ۇنەمى اياقاستى بىردەڭە بولىپ قالادى. ءبىز قايدا باعىت الىپ بارا جاتقانىمىز جايلى كورىنىس، تۇسىنىك بار. ال قالعانىن جاعداي كورسەتەدى.
- قازاقستان قۇراماسىنداعى قىزمەتىڭىزدى قالاي باعالايسىز؟
- ەگەر تازا سانداردى سويلەتسەك، وندا ناشار. ەگەر ىشكى جاقتان الىپ قاراساق، ءبىراز جاعىمدى ساتتەر بار.
ءيا، ءبىز گول سوققان جوقپىز جانە از ۇپاي جينادىق. «مۇنداي قيىن توپتا كوپ ۇپاي جينايمىز» دەپ ايتۋ تاياز ويلاۋ بولار...
ارينە، ءبىز دە وڭ ناتيجەنى قالايمىز، ءبىراق، قاندايدا ءبىر سەبەپتەرمەن ساتسىزدىككە ۇشىرادىق. بىزگە قازىر جيناقتالعان تاجىريبە كومەكتەسەدى دەپ ۇمىتتەنەمىز. ەڭ باستىسى، ويىنشىلار ساقاداي ساي ما، ولاردىڭ دايىندىعى قالاي؟ ! مىسالى، دارابايەۆتىڭ، زارۋتسكيدىڭ جانە پوكاتيلوۆتىڭ ازىرگە كەلىسىمشارتتارى جوق.
- قاندايدا ءبىر سەبەپتەرمەن ساتسىزدىككە ۇشىرادىق دەيسىز... دەگەنمەن، ناشار ناتيجەنىڭ باستى سەبەبى نەدە دەپ ويلايسىز؟ جاتتىعۋ جەتكىلىكسىز بە؟ قارجىلاندىرۋ از با، الدە فۋتبولشىلار ءالسىز بە؟
- بىزگە حوللاند، ارناۋتوۆيچ، تاعى سول سياقتىلار جەتىسپەيدى. بەلگىلى، بەلگىسىز سەبەپتەرمەن و باستان-اق مىقتى كلۋبتار، قۇرامالار بار. ءبىز دە قازىر سولارمەن تەڭەسۋ ءۇشىن، باعدارلامامىزدى ورىنداۋ باعىتىندا جۇمىس ىستەپ جاتىرمىز.
بىرىنشىدەن، بۇل جولعى ۇلتتار ليگاسىندا بىزدە وتپەلى ماتچتار بولعان جوق.
ەكىنشىدەن، بىزدە كىشكەنتاي قادام جاساۋعا كومەكتەسەتىن ۇيىمداستىرۋ جاعى بولعان جوق. ءبىز جۇيەنى قايتا قۇرىپ، ءتورت قورعاۋشىعا كوشتىك. بۇل ويىنشىلارعا ۇنايدى. قورعانىستى، تەپە-تەڭدىكتى ساقتاۋ ءۇشىن شابۋىلعا تاعى ءبىر ويىنشىنى قوستىق. بۇرىشتان كوبىرەك دوپ بەرە باستادىق جانە دوپ كوبىرەك ۇستالدى. مىسالى، سلوۆەنيامەن ويىندا 100-دەن كوپ پاس بەردىك، بىزدە دوپ بولدى.
ويىنشىلارى و باستان مىقتى قۇراما مەن باپكەر عانا باسىمدىققا يە. ويتكەنى، ەكى كۇندە كوماندالىق ويىنعا، فيزيكالىق جاعدايلارعا اسەر ەتۋ مۇمكىن ەمەس. باستاپقىدان باسەكەلەستىك ورتادا وينايتىن جەكە ويىنشىلار كۇشتىرەك. يسپانيادا، يتاليادا، گەرمانيادا وينايتىن ويىنشى، ول ۇنەمى وسى دەڭگەيدە جاتتىعادى. ءبىز بۇل جاعىنان ارتتا قالعانبىز. ءبىراق، ەڭ باستىسى، قازىر بىزدە ىنتا بار، مۇمكىندىك بار.
- كەيىنگى كەزدە قازاقستاندا لەگيونەرلەر ماسەلەسى ءجيى قوزعالىپ ءجۇر. «ولاردان ەشقانداي پايدا جوق» دەگەن سىن ايتىلادى...
- 2014 -جىلى مەن «دينامونى» جاتتىقتىردىم، ول كەزدە دە وسى سۇراقتى قويدى. قۇرامادا 6 لەگيونەر، 5 رەسەي ازاماتى ويناۋ كەرەك بولدى. ويىنعا دايىندالىپ جاتقاندا، ونى دا ساناۋ كەرەك. ماسەلە، قۇرامادان كىم شىعادى، كىم، كىمدى اۋىستىراتىنىندا ەمەس، ەڭ باستىسى قۇرامادا قانشا لەگيونەر بارى، شەكتەۋ بولۋى كەرەك. ءبىراق، مەن 8 ساپالى لەگيونەردى ۇسىندىم. ويتكەنى، شەكتەۋ بولسا، ەشقانداي كلۋب نەگىزگى ەمەس ويىنشىنى المايدى. ناقتى 8، 7, 9 لەگيونەر بولۋ كەرەك دەپ ايتپايمىن، بەلگىلى ءبىر شەك بولۋى كەرەك. سوندا باسەكەلەستىك ورتا بولادى. لەگيونەرلەر ءتولقۇجات ءۇشىن وينامايدى. بارلىق جەردە شەتەلدىكتەر بار، قازاقستان جەكە الەمدە ءومىر سۇرمەيدى عوي. ال لەگيونەرلەر لايىقتى ما، ونى ءار كلۋب ءوزى شەشۋى كەرەك.
بۇعان دەيىن حابارلاعانىمىزداي، قازاقستان فۋتبول فەدەراتسياسى چەرچەسوۆتىڭ وتستاۆكاعا كەتۋى جونىندە مالىمدەمە جاساعان بولاتىن.
سونداي- اق وتكەن جىلدىڭ اياعىنا قاراي فەدەراتسياسىنىڭ جاڭا پرەزيدەنتى تاعايىندالدى.
اۆتور
داۋلەت ىزتىلەۋ
