وڭتۇستىك كورەيانىڭ بيلىكتەن شەتتەتىلگەن پرەزيدەنتى جاۋاپ الۋعا كەلۋدەن تاعى باس تارتتى

استانا. KAZINFORM - بۇل ول ۇستالعاننان كەيىن ءۇشىنشى كۇنى بولدى، دەپ حابارلايدى Yonhap اقپارات اگەنتتىگى.

جۇما كۇنى وڭتۇستىك كورەيانىڭ بيلىكتەن شەتتەتىلگەن پرەزيدەنتى يۋن سوك يەل اسكەري جاعدايدى ەنگىزۋ ارەكەتى بويىنشا جاۋاپ الۋعا كەلۋدەن تاعى باس تارتتى.

سىبايلاس جەمقورلىقتى تەرگەۋ باسقارماسى (CIO) دەنساۋلىعىنا بايلانىستى الدىڭعى جاۋاپ الۋدى وتكىزىپ العان سوڭ، ونى تاڭعى ساعات 10-دا (جەرگىلىكتى ۋاقىت بويىنشا) كەلۋىن تالاپ ەتتى.

- پرەزيدەنت بۇگىن CIO- عا كەلمەيدى، - دەدى ونىڭ ادۆوكاتى جانە كوپتەن بەرى دوسى سوك دونگ حەن Yonhap اگەنتتىگىنە.

يۋن سارسەنبى كۇنى كەشكە تەرگەۋشىلەر ونى رەزيدەنسياسىندا ۇستاپ، ءىس كەڭسەسىنە اپارعان كەزدەن باستاپ ۋاقىتشا ۇستاۋ اباقتىسىندا وتىر.

ول سەۋلدىڭ ورتالىق اۋماقتىق سوتىنا ءوزىن ۇستاۋدىڭ زاڭدىلىعىن تەكسەرۋ تۋرالى ءوتىنىش بەردى. ءبىراق سوت بەيسەنبى كۇنى كەشكە ونى قابىلداماي، يۋن سوك يەلدى قاماۋدا قالدىردى.

تەرگەۋ باسقارماسى جۇما كۇنى كەشكە 48 ساعاتتىق قاماۋ مەرزىمى اياقتالعانعا دەيىن يۋندى تۇتقىنداۋعا رەسمي وردەر بەرۋ ءۇشىن ءوتىنىش بەرەدى دەپ جوسپارلانىپ وتىر.

وڭتۇستىك كورەيانىڭ بيلىكتەن قۋىلعان پرەزيدەنتى يۋن سوك يەل سارسەنبى كۇنى الەۋمەتتىك جەلىدە ءوز قولىمەن جازعان مالىمدەمەسىن جاريالادى.

اۆتور

زارينا تۋعانبايەۆا